1-2. Sɛ yɛkyɛ adze a, hɛn enyi gye koraa kyɛn aber a obi akyɛ hɛn adze. Ebɛnadze ntsi na Jehovah bɔɔ hɛn dɛm?

 SƐ YƐKYƐ obi adze a, hɛn enyi gye koraa kyɛn aber a obi akyɛ hɛn adze. Na ɔnnyɛ nwanwa osiandɛ dɛm na Jehovah bɔɔ hɛn. (Andw. 20:35) Dɛm asɛm yi kyerɛ dɛ, sɛ obi kyɛ hɛn adze a, hɛn enyi nngye anaa? Oho. Osiandɛ hɛn nyina nyim dɛ, sɛ obi kyɛ hɛn adze a, ɔma hɛn enyi gye. Naaso, sɛ yɛkyɛ nkorɔfo adze so a, ɔma hɛn enyi gye paa. Na oye paa dɛ Jehovah bɔɔ hɛn dɛm. Ebɛnadze ntsi na yɛreka dɛm?

² Osiandɛ Jehovah bɔɔ hɛn dɛm ntsi, ɔma hɛnankasa so tum yɛ ndzɛmba ahorow bi a ɔma hɛn enyi gye. Sɛ yɛpɛ dɛ hɛn enyi gye paa a, ɔsɛ dɛ yɛhwehwɛ akwan ahorow a yebotum afa do akyɛ nkorɔfo adze. Innhu dɛ mbrɛ Jehovah sii bɔɔ hɛn yi yɛ kama paa?—Ndw. 139:14.

3. Ebɛnadze ntsi na Bible no ka Jehovah ho asɛm dɛ ɔyɛ ‘enyigye Nyankopɔn’?

³ Kyerɛwnsɛm no ma yenya awerɛhyɛmu dɛ, sɛ yɛkyɛ adze a, hɛn enyi bɛgye. Ntsi ɔnnyɛ nwanwa koraa dɛ Bible no ka Jehovah ho asɛm dɛ ɔyɛ ‘enyigye Nyankopɔn’ no. (1 Tim. 1:11) Jehovah nye Obi a odzii kan kyɛɛ adze, na ɔkyɛ adze so sen obiara. Ɔsomafo Paul kaa dɛ, osian Jehovah ntsi na “yɛtse ase na yɛkeka hɛnho na yɛwɔ hɔ.” (Andw. 17:28) Nokwasɛm nye dɛ, “akyɛdze pa nye adom adze a odzi mu nyina” fi Jehovah hɔ.—Jas. 1:17.

4. Ebɛnadze na obotum aboa hɛn ma hɛn enyi aagye paa?

⁴ Sɛ yɛkyɛ adze a, ɔma hɛn enyi gye. Ntsi bi a hɛn so, yɛbɛpɛ dɛ yɛkyɛ adze ama hɛn enyi aagye paa. Sɛ yɛpɛ dɛ yenya enyigye a ɔtse dɛm bi dze a, nna ɔno ɔsɛ dɛ yesuasua Jehovah na yɛkyɛ adze. (Eph. 5:1) Aber a yerususu mbrɛ Jehovah si kyɛ adze ho wɔ adzesua yi mu no, ɔyɛ a hwɛ dza yebotum ayɛ aber a yɛakyɛ nkorɔfo adze na yɛtse nka dɛ wɔannkyerɛ ho enyisɔ no. Iyi bɔboa hɛn ma yaakɔ do akyɛ adze na hɛn enyi so aagye paa.

 SUASUA JEHOVAH NA KYƐ ADZE

5. Ebɛn ndzɛmba a yehia wɔ asetsena mu na Jehovah dze ma hɛn?

⁵ Ebɛn ndzɛmba ahorow na Jehovah dze akyɛ hɛn? Hom mma yensusu no mu bi ho. Jehovah dze dza yehia wɔ asetsena mu no ma hɛn. Ɔnnyɛ aber nyina na ɔma hɛn nsa ka ndzɛmba a ɔbɛma hɛnho atɔ hɛn wɔ asetsena mu, naaso dza yehia no dze, ɔdze ma hɛn. Dɛ mfatoho no, ɔma hɛn nsa ka dza yebedzi, dza yɛbɛhyɛ, nye beebi a yɛdze hɛn tsir bɔto. (Ndw. 4:8; Matt. 6:​31-33; 1 Tim. 6:​6-8) Jehovah hwɛ hu dɛ hɛn nsa bɛka ndzɛmba a yehia wɔ asetsena mu. Naaso ehwɛ a, osiandɛ ɔyɛ n’asodzii ara ntsi na ɔyɛ dɛm anaa? Ɔnntse dɛm koraa! Ebɛnadze ntsi na Jehovah yɛ iyinom nyina ma hɛn?

6. Ebɛnadze na yesua fi asɛm a ɔwɔ Matthew 6:​25, 26 no mu?

⁶ Asɛm no ara nye dɛ, Jehovah dze dza yehia ma hɛn osiandɛ ɔdɔ hɛn. Ɔwodze ma yɛnhwɛ asɛm a Jesus kae wɔ Matthew 6:​25, 26. (Kenkan.) Jesus dze ndzɛmba bi a Jehovah abɔ yɛɛ mfatoho. Ɔreka nnoma ho asɛm no, ɔkaa dɛ: “Wonndua aba, wonntwa na wɔmmboaboa ano so nngu adzekoradan mu.” Naaso, hwɛ asɛm a ɔkae toaa do. Ɔkaa dɛ: “Hom Egya a ɔwɔ sor no hwɛ hɔn.” Afei, Jesus bisaa dɛ: “Hom nnsom bo koraa nnkyɛn hɔn anaa?” Esuadze a ɔwɔ asɛm yi mu nye dɛn? Jehovah bu n’asomfo dɛ wɔsom bo koraa kyɛn mbowa. Dɛm ntsi sɛ Jehovah hwɛ mbowa dze a, nna ɔno yebotum enya awerɛhyɛmu dɛ ɔbɔhwɛ hɛn so! Egya pa biara dɔ n’ebusua na ɔhwɛ hɔn yie, na dɛmara so na osiandɛ Jehovah dɔ hɛn ntsi ɔma hɛn nsa ka dza yehia.—Ndw. 145:16; Matt. 6:32.

7. Ebɛnadze na yebotum ayɛ dze esuasua mbrɛ Jehovah si kyɛ adze no? (Hwɛ mfonyin no so.)

⁷ Hɛn so, yebotum esuasua Jehovah na yaama ɔdɔ a yɛwɔ ma nkorɔfo no ekenyan hɛn ma yɛdze dza wohia no ama hɔn. Inyim wo nua Christiannyi bi a ohia edziban anaa atar a? Jehovah botum afa wo do aboa wo nua no ma ne nsa aka dza ohia no. Jehovah n’asomfo dze, sɛ atoyerɛnkyɛm bi si a, wɔyɛ ntsɛm kɔboa hɔn a hɔnho aka no. Dɛ mfatoho no, aber a nna COVID-19 yarba no taa mu no, enuanom dze edziban, ntar, nye ndzɛmba afofor kɛmaa hɔn a wohia mboa no. Enuanom beberee so yii ntoboa dze boaa edwuma a yɛyɛ wɔ wiadze nyina no. Wɔdze dɛm ntoboa ahorow yi boae ma enuanom a hɔnho aka no nsa kaa dza wohia. Enuanom a wofii hɔn akoma mu yii ntoboa no dze asɛm a ɔwɔ Hebrewfo 13:16 no yɛɛ edwuma. Hɔ ka dɛ: “Mma hom werɛ mmfir adɔyɛ nye adzekyɛ, na dɛm afɔrbɔdze yi na ɔsɔ Nyankopɔn enyi.”

8. Ahoɔdzen a Jehovah dze ma hɛn no, ɔboa hɛn dɛn? (Philippifo 2:13)

 ⁸ Jehovah ma hɛn ahoɔdzen. Jehovah dze, noho yɛ dzen paa, na n’enyi gye ho so dɛ ɔdze n’ahoɔdzen no bi bɛma n’asomfo anokwafo. (Kenkan Philippifo 2:13.) Abɔ mpaa aserɛ Jehovah dɛ ɔmma wo ahoɔdzen mbrɛ ɔbɛyɛ a ibotum egyina nsɔhwɛ anaa ɔhaw kɛse bi ano pɛn anaa? Bi mpo a, mber bi ebɔɔ mpaa dɛ Jehovah mboa wo mbrɛ ɔbɛyɛ a ibenya ahoɔdzen dze ayɛ ndzɛmba ahorow bi a ohia dɛ eyɛ wɔ dɛm da no mu. Jehovah tsiee wo mpaabɔ no, bi a enye ɔsomafo Paul yɛɛ adwen. Ɔkyerɛɛw dɛ: “Mutum adze nyina yɛ wɔ nyia ɔhyɛ me dzen no mu.”—Phil. 4:13.

9. Yebesi dɛn esuasua mbrɛ Jehovah dze ahoɔdzen a ɔwɔ no boa afofor no? (Hwɛ mfonyin no so.)

⁹ Ɔwɔ mu dɛ bɔn wɔ hɛnho dze, naaso yebotum esuasua mbrɛ Jehovah dze n’ahoɔdzen anaa no tum boa afofor no. Mbrɛ ɔtse nye dɛ, ahoɔdzen a yɛwɔ no, yerunntum mmfa bi mma nkorɔfo dɛ mbrɛ Jehovah yɛ no. Naaso, yebotum dze ahoɔdzen a yɛwɔ no aboa afofor. Dɛ mfatoho no, enuanom a hɔn enyi efir anaa enuanom a wɔyar no, yebotum ekedzi gua abrɛ hɔn, anaadɛ yebotum ayɛ ndzɛmba ahorow bi dze aboa hɔn wɔ hɔn efie. Sɛ yɛwɔ ahoɔdzen so a, yebotum aboa ma woeesiesie Ahendzi Asa do anaa yaaboa ma woeesiesie ndzɛmba a wɔasɛɛ wɔ hɔ no. Sɛ yɛdze ahoɔdzen a yɛwɔ no yɛ ndzɛmba ahorow a ɔtsetse dɛm a, hɛn nuanom a yɛnye hɔn bɔ mu som Jehovah no nya do mfaso.

10. Ibesi dɛn dze w’anomu kasa ahyɛ afofor nkuran?

¹⁰ Mma wo werɛ mmfir dɛ, hɛn anomu asɛm wɔ tum paa. Inyim obi a ibotum akamfo no wɔ mbɔdzen a ɔrobɔ no ho anaa? Inyim obi a ohia awerɛkyekyer? Sɛ dɛm a, nna ɔno ma dɛm nyimpa no nhu dɛ edɔ no na edwen no ho so. Ibotum akɛsera no anaa afrɛ no wɔ fon do. Ibotum so akyerɛw nsɛm bi a ɔhyɛ nkuran egu kaad do dze akɛma no anaa asɛnd no email anaa tɛst mɛsegye. Onnhia dɛ eyɛ obi a w’ano atsew ana etum aka asɛm bi anaa akyerɛw biribi dze ahyɛ wo nua Christiannyi no nkuran. Mbom no, nsɛm kakraabi a ofi w’akoma mu a ebɛka akyerɛ wo nua no botum ayɛ dza obehia no dɛm da no ama oeetum akɔ do edzi Jehovah nokwar anaa oeenya enyidado dɛ ndzɛmba bɛyɛ yie.—Mbɛ. 12:25; Eph. 4:29.

11. Nyansa a Jehovah wɔ no, osi dɛn dze boa nkorɔfo?

¹¹ Jehovah ma hɛn nyansa. Osuanyi James kaa dɛ: “Sɛ hom mu bi ne nyansaa tɔ sin a, ombisa Nyankopɔn a ɔdze ma nyimpa nyina kwa na ɔnnka enyim no, na ɔdze bɛma hom.” (Jas. 1:5) Dɛm asɛm yi ma yehu dɛ, Jehovah mmfa nyansa a ɔwɔ no mmbɔ etsirmɔdzen. Ofi n’akoma mu ma nkorɔfo bi. Hyɛ no nsew so dɛ, sɛ Jehovah dze ne nyansaa no bi ma hɛn a, ‘ɔnnka hɛn enyim’ anaa ommbu hɛn enyimtsia. Sɛ yɛserɛ no dɛ ɔnkyerɛ hɛn kwan a, ɔmma yɛnntse  nnka dɛ yennyim nyansa. Mbom ɔhyɛ hɛn nkuran mpo dɛ, yɛnkɔ ne nkyɛn nkɔhwehwɛ akwankyerɛ.—Mbɛ. 2:​1-6.

12. Yebesi dɛn dze nyansa a yɛwɔ no bi aboa afofor?

¹² Hɛn so ɛ? Yebotum esuasua Jehovah na yɛdze nyansa a yɛwɔ no bi aboa nkorɔfo anaa? (Ndw. 32:8) Ndzɛmba a yeesua no, yɛwɔ hokwan pii a yebotum dze aboa afofor. Dɛ mfatoho no, yɛtaa tsetse enuanom a wɔhyɛɛ asɛnka ase nnkyɛree no ma wotu mpon wɔ asɛnka mu. Asafo mu mpanyimfo so to hɔn bo ase boa asafo mu asomfo na enuanom mbarimba a woenuma no ma wohu mbrɛ wobesi ayɛ dwumadzi ahorow a ɔhyehyɛ hɔn nsa wɔ asafo no mu no. Bio so, enuanom a wonyim adansi nye mbrɛ wosi siesie adan yie no boa ma wɔtsetse enuanom afofor ma hɔn so wotum sisi anaa wosiesie asafo adan.

13. Sɛ yɛretsetse afofor a, yebesi dɛn esuasua mbrɛ Jehovah dze nyansa a ɔwɔ no bi boa afofor no?

¹³ Enuanom a wɔtsetse enuanom afofor no, ɔsɛ dɛ wɔbɔ mbɔdzen suasua mbrɛ Jehovah dze nyansa a ɔwɔ no bi boa afofor no. Kaa dɛ, Jehovah mmfa nyansa a ɔwɔ no mmbɔ etsirmɔdzen. Ntsi hɛn so, nyimdzee na suahu a yɛwɔ no, ɔnnsɛ dɛ yɛdze bɔ hɔn a yɛretsetse hɔn no etsirmɔdzen. Ɔnnsɛ dɛ yenya adwen dɛ, sɛ yɛma hɔn a yɛretsetse hɔn no hu dza yenyim nyina a, annhwɛ a wɔbɛba abɛgye dwumadzi a ɔhyɛ hɛn nsa no ayɛ. Dɛmara so na ɔnnsɛ dɛ yɛka dɛ: ‘Emi obiara annkyerɛ me yɛ, ntsi wɔmma noara so nsua yɛ.’ Ɔnnsɛ dɛ Jehovah no somfo biara nya adwen a ɔtse dɛm da. Mbom no, ɔsɛ dɛ yefi hɛn akoma mu dze nyimdzee a yɛwɔ no boa afofor na yɛyɛ dza yebotum biara dze boa hɔn a yɛretsetse hɔn no. (1 Thess. 2:8) Yɛwɔ ahotodo dɛ, sɛ yɛyɛ dɛm a, ɔbɛma hɔn so ‘woetum akyerɛkyerɛ binom so.’ (2 Tim. 2:​1, 2) Sɛ hɛn nyina dze nyimdzee a yɛwɔ no boa hɛnho hɛnho a, ɔbɛma hɛn nyina enyi agye.

SƐ ƆYƐ TSE DƐ MBRƐ NKORƆFO NNKYERƐ DZA YƐYƐ MA HƆN NO HO ENYISƆ SO Ɛ?

14. Sɛ yɛyɛ biribi ma nkorɔfo a, ebɛnadze na hɔn mu piinara yɛ?

¹⁴ Sɛ yɛyɛ biribi ma nkorɔfo, nkanka hɛn nuanom Christianfo a, mpɛn pii no wɔkyerɛ ho enyisɔ. Bi a wɔbɔkyerɛw asɛm bi wɔ kaad do dze abɛda hɛn ase anaa wɔbɛfa kwan fofor bi do akyerɛ dɛ hɔn enyi sɔ dza yɛayɛ ama hɔn no. (Col. 3:15) Sɛ wɔyɛ dɛm a, ɔma hɛn enyi gye ankasa.

15. Ebɛnadze na ɔsɛ dɛ yɛkaa aber a binom annkyerɛ dza yɛayɛ ama hɔn no ho enyisɔ no?

¹⁵ Naaso mbrɛ ɔtse nye dɛ, ɔnnyɛ aber nyina na nkorɔfo kyerɛ dza yɛyɛ ma hɔn no ho enyisɔ. Ɔtɔ da a, bi a yɛbɛpra hɛn yamu dze hɛn ber, hɛn ahoɔdzen, anaa hɛn sika ayɛ biribi dze aboa obi, naaso obowie ase no, nna wɔakɛyɛ tse dɛ nyimpa no enyi nnsɔ dza yɛayɛ ama no no mpo. Sɛ biribi a ɔtse dɛm si a, ebɛnadze na ɔbɔboa hɛn amma hɛn werɛ aannhow anaa hɛn bo emmfuw? Ɔsɛ dɛ yɛkaa kyerɛwsɛm a hɛn adzesua yi gyina do a ɔwɔ Asomafo Ndwuma 20:35 no. Sɛ yɛkyɛ obi adze a, ɔnnyɛ dza nyimpa no bɛyɛ wɔ ho no na ɔbɛma hɛn enyi agye. Dɛm ntsi, sɛ nkorɔfo nnkyerɛ dza yɛyɛ ma hɔn no ho enyisɔ mpo a, yebotum akɔ do ara dze enyigye akyɛ adze. Ebɛnadze na obotum aboa hɛn ma yaayɛ dɛm? Hom mma yensusu no mu bi ho.

16. Ebɛnadze na obotum aboa hɛn ma yaakɔ do dze enyigye akyɛ adze?

¹⁶ Kaa dɛ sɛ ekyɛ adze a, nna irusuasua Jehovah. Jehovah dze, sɛ ɔdze ndzɛmba pa ma nkorɔfo na sɛ wɔkyerɛ ho enyisɔ o, sɛ wɔannkyerɛ ho enyisɔ o, onngyaa, mbom ɔkɔ do dze ma hɔn. (Matt. 5:​43-48) Jehovah ahyɛ hɛn bɔ dɛ, sɛ yɛkyɛ nkorɔfo adze na ‘yɛammfa ennsi hɛn enyi do dɛ hɛn nsa bɛsan aka a,’ hɛn “akatua bɛyɛ kɛse.” (Luke 6:35) Ntsi sɛ ɔtɔ da na sɛ nkorɔfo annkyerɛ dza yɛayɛ ama hɔn no ho  enyisɔ a, ɔnnsɛ dɛ yɛma ɔyɛ hɛn yaw. Sɛ yɛkyɛ nkorɔfo adze na wɔkyerɛ ho enyisɔ o, sɛ wɔannkyerɛ ho enyisɔ o, hɛn dze yenyim dɛ Jehovah botua hɛn kaw, osiandɛ ‘yɛtseew hɛn enyim’ na yɛyɛe.—Mbɛ. 19:17; 2 Cor. 9:7.

17. Ebɛnadze bio na yebotum ayɛ dze esuasua Jehovah aber a yɛrekyɛ adze no? (Luke 14:​12-14)

¹⁷ Adze fofor so a obotum aboa hɛn ma yeesuasua Jehovah aber a yɛrekyɛ adze no nye dɛ yɛdze afotusɛm a ɔwɔ Luke 14:​12-14 no bɛyɛ edwuma. (Kenkan.) Nkorɔfo a wobotum ayɛ hɛn hɔho anaa wɔakyɛ hɛn adze no, sɛ hɛn so yɛyɛ hɔn hɔho anaa yɛkyɛ hɔn adze a, ɔnnyɛ bɔn. Naaso, sɛ yehu dɛ yɛtaa kyɛ nkorɔfo adze osiandɛ yɛhwɛ kwan dɛ hɔn so wɔbɛkyɛ hɛn adze so ɛ? Sɛ dɛm a, nna ɔno ɔsɛ yɛbɔ mbɔdzen dze Jesus n’afotu no yɛ edwuma. Obi a yenyim dɛ sɛ yɛkyɛ no adze a orunntum nnyɛ bi nntua hɛn kaw no, yebotum akyɛ no adze. Sɛ yɛyɛ dɛm a, hɛn enyi bɛgye osiandɛ yerusuasua Jehovah. Afei so, ɔbɛma sɛ nkorɔfo annkyerɛ dza yɛyɛ no ho enyisɔ mpo a, hɛn enyi bɛgye.

18. Ebɛnadze na obotum aboa hɛn ma yeenya hɛn nuanom ho adwen pa?

¹⁸ Mma nnya nkorɔfo ho adwembɔn. (1 Cor. 13:7) Sɛ nkorɔfo annkyerɛ dza yɛayɛ ama hɔn no ho enyisɔ a, yebotum ebisa hɛnho dɛ: ‘Hɔn suban ara nye no, anaa awerɛfir a?’ Obotum aba dɛ biribi fofor bi ntsi na wɔannkyerɛ dza yɛayɛ ama hɔn no ho enyisɔ dɛ mbrɛ nna yɛrohwɛ kwan no. Binom wɔ hɔ a, hɔn enyi sɔ dza yɛayɛ ama hɔn no paa, naaso ɔyɛ a wonnhu dza wɔnyɛ mfa nkyerɛ ho enyisɔ. Bi a mber bi a abɛsen kɔ no nna hɔn na wɔboa afofor, ntsi obotum aba dɛ wɔfɛr dɛ sesei dze nkorɔfo roboa hɔn. Naaso ne nyina mu no, osiandɛ yɛdɔ hɛn nuanom ntsi, yebenya hɔn ho adwen pa na yaakɔ do dze enyigye akyɛ adze.—Eph. 4:2.

19-20. Ebɛnadze ntsi na ɔsɛ dɛ yenya abotar aber a yɛayɛ biribi ama nkorɔfo anaa yɛakyɛ hɔn adze no? (Hwɛ mfonyin no so.)

¹⁹ Nya abotar. Ɔhen Solomon a nna onyim nyansa paa no kaa adzekyɛ ho asɛm dɛ: “Totow w’edziban gugu nsu enyi: na daakye bi wo nsa bɛka.” (Ɔsɛnk. 11:1) Asɛm a ɔkae yi ma yehu dɛ, binom wɔ hɔ a, sɛ yɛkyɛ hɔn adze  anaa yɛyɛ hɔn papa a, bi a “daakye bi” na wɔbɛkyerɛ ho enyisɔ. Hom mma yɛnhwɛ suahu bi a osi dɛm nokwasɛm yi do dua.

²⁰ Mfe bi a abɛsen kɔ no, ɔmansin do hwɛfo bi ne yer kyerɛɛw krataa kɛmaa akyerɛbaa bi a nna wonumaa no nnkyɛree, na ɔhyɛɛ no nkuran dɛ ɔnkɔ do ara ndzi Jehovah nokwar. Bɛyɛ mfe awɔtwe ekyir no, akyerɛbaa no so kyerɛɛw ɔmansin do hwɛfo no ne yer krataa, na ɔkaa dɛ: “Mepɛ dɛ mekyerɛw wo dɛm krataa yi na mema ihu mbrɛ esi aboa me wɔ mfe a abɛsen kɔ yi mu.” Ɔtoaa n’asɛm no do dɛ: “Nna [wo krataa] no hyɛ nkuran ara yie, naaso kyerɛwsɛm a ɔwɔ mu no na ɔkaa m’akoma paa, na mese, mo werɛ emmfir da.” a Aber a ɔkaa ɔhaw ahorow bi a ohyiae ho asɛm wiei no, ɔkaa dɛ: “Nna ɔtɔ da a ɔyɛ me dɛ mimfi nokwar no mu, na mempɛ me beebi ntsena. Naaso sɛ nna mekaa kyerɛwsɛm a ɔwɔ krataa no mu no a, nna ɔhyɛ me dzen ma mokɔ do dzi Jehovah nokwar.” Ɔdze kaa ho dɛ: “Biribiara nnyi hɔ a ɔhyɛɛ me dzen wɔ mfe awɔtwe no mu kyɛn kyerɛwsɛm a nna ɔwɔ krataa no mu no.” Hwɛ mbrɛ ɔmansin do hwɛfo no ne yer no enyi gyee aber a ne nsa kaa dɛm krataa yi mfe pii ekyir no! Hɛn so, sɛ yɛyɛ biribi ma obi anaa yɛkyɛ obi adze a, bi a ekyir yi dɛm nyimpa no bɛkyerɛ ho enyisɔ.

21. Ebɛnadze ntsi na esi wo bo dɛ ebɔkɔ do ara esuasua mbrɛ Jehovah si kyɛ adze no?

²¹ Dɛ mbrɛ yeedzi kan aka no, Jehovah bɔɔ hɛn wɔ kwan soronko bi do. Ɔwɔ mu, sɛ nkorɔfo kyɛ hɛn adze a hɛn enyi gye, naaso sɛ yɛkyɛ nkorɔfo adze a, hɛn enyi gye paa. Sɛ yɛboa hɛn nuanom Christianfo a, ɔma hɛn enyi gye. Na sɛ wɔkyerɛ dza yɛayɛ ama hɔn no ho enyisɔ a, ɔma hɛn enyi gye paa. Naaso, sɛ wɔkyerɛ dza yɛayɛ ama hɔn no ho enyisɔ o, sɛ wɔannkyerɛ ho enyisɔ o, hɛn enyi botum agye osiandɛ yenyim dɛ yɛayɛ dza ɔfata. Mma wo werɛ mmfir dɛ, biribiara a edze bɛkyɛ no, ‘Jehovah botum ama wo dza ɔdɔɔ so sen dɛm.’ (2 Mber. 25:9) Asɛm no ara nye dɛ, yerunntum nnkyɛ adze nnkyɛn Jehovah. Na sɛ Jehovah nankasa so tua hɛn kaw a, enyigye dze, yɛbɛfa no kwa. Dɛm ntsi, hom mma yensi hɛn bo dɛ yɛbɔkɔ do ara esuasua hɛn sor Egya a ne tsirmu nnyɛ dzen no.