Wɔwoo me 1934. Nna m’awofo yɛ Switzerlandfo. Naaso nna woetu abɛtsena kurow bi a wotu sika kɔkɔɔ wɔ mu a wɔfrɛ no Timmins mu. Dɛm kurow no wɔ Ontario, Canada. Bɛyɛ 1939 mu no, me maame hyɛɛ ase kenkaan Ɔweɔn-Aban no bi, na ɔhyɛɛ ase kɔr Jehovah Adasefo asafo nhyiamu so bi. Nna me maame nye emi na mo nuanom beesia no nyina kɔ asafo nhyiamu. Wɔannkyɛr biara na me maame bɛyɛɛ Jehovah Dasefo.

Me papa dze, nna ɔnnyɛ no dɛw koraa dɛ me maame abɛyɛ Ɔdasefo, naaso nna me maame so nntse nokwar no ho gyae koraa. Afei so, nna oesi no bo dɛ ɔbɔkɔ do ara asom Jehovah. Aber a wɔbraa Jehovah Adasefo hɔn som edwuma wɔ Canada wɔ 1940 mfe no mu mpo no, me maame kɔr do soom Jehovah. Sɛ nna me papa keka mu gu me maame do anaadɛ ɔhyehyɛ no ahorba mpo a, nna me maame nya no ho abotar na ɔkyerɛ dɛ obu no. Me maame yɛɛ adze paa. Dza ɔyɛe no boaa emi na mo nuanom no ma yɛbɛgyee nokwar no. Enyigyesɛm nye dɛ, mber bi ekyir no, me papa sesaa no suban. Afei dze nna ɔnye hɛn nyina dzi no yie.

Afe 1950 mu no, mokɔr Theocracy’s Increase Assembly (Theocracy Nkɔenyim Ehyiadzi) a wɔyɛe wɔ New York no bi. Mihyiaa enuanom a wofifi wiadze n’afa ahorow nyina, na mitsiee enuanom a woewie Gilead no hɔn suahu ahorow a ɔhyɛ nkuran so. Ofitsi dɛm aber no rokɔ no, misii mo bo dɛ mebɛyɛ ber nyina som edwuma no bi. Mubodur Canada ara pɛr na mehyehyɛɛ akwampaafo fɔɔm no bi dze kɔr Bethel. Naaso Canada Bethel kyerɛɛw me krataa dɛ, gyedɛ wonuma me ansaana metum abɛyɛ ɔkwampaafo. Ntsi October 1, 1950 na wonumaa me. Bosoom kor ekyir pɛpɛɛpɛr na mebɛyɛɛ ɔkwampaafo, na wɔkaa kyerɛɛ me dɛ monkɔsom wɔ Kapuskasing. Hɔ nye bea a odzi kan a wɔmaa mokɔboaa asɛnka  edwuma no. Nna ofi beebi a menye m’ebusuafo tse dze rokɔ Kapuskasing no mu war paa.

Afe 1951 mu no, Canada Bethel no dze too enuanom a wotum ka French kasa no enyim dɛ, sɛ ɔbɛyɛ yie a nkyɛ wontu nkɔ Quebec nkɔboa asɛnka edwuma a wɔreyɛ wɔ hɔ no. Nna wohia adawurbɔfo pii ma wɔaakɔboa edwuma no wɔ hɔ. Nna mutum ka French na Borɔfo kasa nyina, ntsi meyɛɛ dɛ mobɔkɔ akɔboa, na wɔdze me kɔr Rouyn. Nna minnyim obiara wɔ hɔ. Dɛ mbrɛ medzi kan aka ho asɛm no, nna fie bi n’address pɛ na wɔdze ama me. Hom mma menka, ndzɛmba kɔr yie maa me paa. Marcel bɛyɛɛ me nyɛnko berɛbo. Medze mfe anan yɛɛ akwampaa edwuma no wɔ Quebec, na m’enyi gyee paa. Ekyir yi, mebɛyɛɛ ɔkwampaafo tsitsir.

Mowɔ Quebec no, wɔtoo nsa frɛɛ me ma mokɔr Gilead Skuul a wɔyɛɛ no wɔ South Lansing a ɔwɔ New York no bi. Nna meka adzesuakuw a otsia 26 no ho. February 12, 1956 na muwiee skuul no, na wɔmaa mokɔsomee wɔ ɔman bi a sesei wɔfrɛ no Ghana b mu. Dɛm man yi wɔ Africa n’anee afamu. Naaso ansaana mobɔkɔ Ghana no, nna ɔsɛ dɛ mesan kɔ Canada “adapɛn kakra” kesi dɛ me nkrataa a medze botu kwan no bɔtotɔ mu.

Owiee ase, motweɔɔn abosoom esuon wɔ Toronto ansaana me nsa reka me nkrataa no. Dɛm aber no nyina, nna menye Cripps ebusua no tse. Nna hɔn yamu ye paa, na hɔn ba basia Sheila so bɛyɛɛ me nyɛnko. Ekyir yi, yɛbɛpɛɛ hɛnho. Naaso aber a meyɛɛ m’adwen dɛ mebɛka akyerɛ no dɛ mepɛ dɛ mowar no no, me nsa kaa me nkrataa no. Menye Sheila bɔɔ asɛm yi ho mpaa, na yɛgyee too mu dɛ monkɔ nkedzi dwuma a nna wɔdze ahyɛ me nsa no. Naaso nna yɛbɔkɔ do ara nye hɛnho edzi nkitaho na yaahwɛ dɛ daakye bi yebotum awar a. Ɔwɔ mu, nna ɔnnda famu mma hɛn, naaso ekyir yi yebohun dɛ saana dza yɛyɛe no, nna ɔyɛ no kwan do.

Odzii bosoom kor ansaana murukodu Ghana n’ahenkurow Accra mu. Morokɔ Ghana no, mefaa train, po do hɛn, na wimuhɛn. Mubodurii no, wɔmaa meyɛɛ ɔmantɔw do hwɛfo. Mututuu akwan kɔr Ghana beebiara. Afei so, nna mokɔ kɔsom wɔ Ivory Coast (seseiara wɔfrɛ ɔman yi Côte d’Ivoire) na Togoland (seseiara wɔfrɛ ɔman yi Togo) nyina. Nna kaar a Bethel dze ama me no na medze yɛ dɛm edwuma yi, na mpɛn pii so nna mankotsee na mutu kwan no.  Naaso, sɛ nna murutu kwan akɛsera enuanom no a, nna m’enyi gye paa!

Dapɛn n’ewiei biara so, nna meyɛ dwumadzi ahorow wɔ ɔmansin ehyiadzi ase. Nna yennyi Ehyiadzi Asa biara wɔ ɔman no mu. Dɛm ntsi nna enuanom no dze nkampor na berɛw bɔ pata ma yɛtsena ase mbrɛ ɔbɛyɛ a ewia no rennhye hɛn kɛse. Nna enuanom tu hɔnho ma yɛ edziban ma enuanom a wɔaba ehyiadzi no ase no (cafeteria), naaso osiandɛ nna fridge nnyi hɔ ntsi, nna wɔmontan mbowa no wɔ beebi a ɔbɛn Ehyiadzi Asa no. Ntsi sɛ wohia bi ayɛ edziban a, nna woeku bi.

Mese, nsɛm a nna osisi wɔ ehyiadzi ahorow no ase no, nna bi yɛ serew dɛ. Mekaa dɛ da kor bi, nna Onua Herb Jennings c a nna ɔyɛ asɛmpatserɛwfo no rema ɔkasa bi. Yɛnkɔhwɛ a, nantwi bi na oeguan efi beebi a wɔamontan no no aba pata no n’ase yi. Obegyinaa bamba no enyim. Afei dze nna ɔkɔ tsir ba tsir. Dɛm ntsi Onua Herb gyae kasa. Ɔbaa no dɛm no, nna abowa no nnhu sɛ ɔmfa nyimfa o, sɛ ɔmfa bankum o. Naaso enuanom mbarimba akantsinka baanan bi bɔɔ mbɔdzen kyeer abowa no, na wɔsan dze no kɔr beebi a nna wɔamontan no no. Na mese bɔhwɛ, nna ehyiadzi no n’ase ayɛ dede.

Dapɛn a yɛbɛyɛ ehyiadzi no mu no, nna mokɔ nkuraase a ɔbɛmbɛn no, na miyi hɛn film a wɔato dzin The New World Society in Action no kyerɛ hɔn. Nna medze tam fufuw sɛn ndua ebien ntamu, na miyi film no wɔ do kyerɛ hɔn. Nna nkorɔfo enyi gye film no ho o! Hɔn mu pii wɔ hɔ a, nna wɔnnhwɛɛ film biara da. Dɛm film yi nye dza odzi kan a wɔhwɛe. Sɛ nna wohu dɛ worunuma nkorɔfo wɔ film no mu a, nna womia hɔnho bɔ hɔn nsamu dzendzenndzen. Film no boaa hɔn ma wobohun dɛ, Jehovah n’asomfo yɛ kor wɔ wiadze yi mu beebiara.

Mebaa Africa bɛyɛ mfe ebien ekyir no, minyaa hokwan kɔr afe 1958 amanaman ntamu ehyiadzi a wɔyɛe wɔ New York no bi. M’enyi gyee paa. Nna Sheila yɛ ɔkwampaafo tsitsir wɔ Quebec, na ɔno so baa ehyiadzi no bi. Aber a muhun no no, m’enyi gyee ankasa. Nna yɛakyerɛw hɛnho nkrataa dɛmara, ntsi nna ɔyɛ me dɛw paa dɛ yeehyia bio. Medze too n’enyim dɛ mepɛ dɛ mowar no, na ɔno so gyee too mu. Dɛm ntsi mekyerɛɛw krataa kɛmaa Onua Knorr d na mekaa kyerɛɛ no dɛ, sɛ ɔbɛyɛ yie a, nkyɛ ɔmma Sheila nkɔ Gilead Skuul no bi, na sɛ owie a nna ɔabɛka moho wɔ Africa. Onua Knorr peen do. Wɔka dɛ, kwan war koraa a, owie abowano. Ntsi ewiei koraa no, Sheila bodur Ghana. October 3, 1959 na yɛwaree wɔ Accra. Yɛtsee nka dɛ Jehovah na oehyira hɛn, osiandɛ yɛmaa no som yɛɛ adze a nna no ho hia hɛn paa wɔ hɛn asetsena mu.

Afe 1961 mu no, wɔmaa yɛkɔsomee wɔ Cameroon. Wɔkaa dɛ monkɔboa ma wonnya Bethel fofor wɔ hɔ. Ntsi mukodur hɔ no dze, nna adagyer nnyi po do koraa. Ɔsom edwuma a nna ɔrokɔ do wɔ Cameroon no, wɔdze hyɛɛ me nsa dɛ monhwɛ do. Nna mennyɛɛ dɛm edwuma no bi da, ntsi nna mowɔ ndzɛmba pii a ɔsɛ dɛ musua. Na wɔ afe 1965 mu no, Sheila faa yafun. Nokwasɛm nye dɛ, nna ɔnnda famu mma hɛn dɛ yɛbɛgye ato mu dɛ yɛrebɛyɛ awofo. Naaso, yegu do reyɛ ahoboa asan akɔ Canada akɔtoto hɛn ndzɛmba yie dze atweɔn hɛn ba no ara na awerɛhosɛm bi sii.

Sheila ne nyinsen no sɛɛe. Dɔkta no kaa kyerɛɛ hɛn dɛ nna hɛn ba no yɛ banyimba. Asɛm yi sii no, bɔbor mfe 50 nye yi, naaso hɛn werɛ emmfir da. Ɔwɔ mu dɛ dza osii no maa hɛn werɛ hoow paa dze, naaso yɛtoaa do somee wɔ Cameroon osiandɛ nna edwuma a yɛreyɛ no da hɛn akoma do paa.

Osiandɛ nna enuanom a wɔwɔ Cameroon no mmfa hɔnho nnhyɛ amanyɛsɛm mu ntsi, wɔtaan hɔn enyi paa. Na sɛ odu ber a ɔsɛ dɛ wɔtow aba dze yi ɔmampanyin mpo dze a, nna asɛm no asɛɛ koraa. May 13, 1970 no, biribi a nna yɛnnhwɛ kwan koraa sii. Aban no kaa dɛ Jehovah Adasefo ngyaa ɔsom edwuma a nna wɔreyɛ wɔ ɔman no mu no. Bethel fɛfɛɛfɛw a yesii no, aban no dze ne nsa too do. Nna yɛatsena hɔ abosoom enum pɛ. Dapɛn kor mpo enndu na wɔpaam asɛmpatserɛwfo a wɔwɔ ɔman no mu nyina dɛ wɔnkɔ hɔn kurow mu. Nna menye Sheila so ka ho. Aber a nna yerigya enuanom no hɔ no, nna ɔyɛ hɛn yaw paa, osiandɛ nna yɛpɛ hɔn asɛm, na nna yennyim dza ɔbɔto hɔn.

Yefii hɔ no, yɛdze hɛn enyi kyerɛɛ France Bethel, na yekedzii abosoom esia wɔ hɔ. Aber a yɛwɔ hɔ no nyina, nna morobɔ mbɔdzen dɛ mebɛyɛ dza mubotum biara mbrɛ ɔbɛyɛ a hɛn nuanom a wɔwɔ Cameroon no nsa bɛka dza nna wohia. December 1970 mu no, wɔmaa yɛkɔsomee wɔ Nigeria Bethel. Dɛm aber no, nna Nigeria Bethel no ahyɛ ase rohwɛ ɔsom edwuma a wɔyɛ no wɔ Cameroon no do. Enuanom a wɔwɔ Nigeria no so gyee hɛn fɛw do, na yɛdze enyigye somee wɔ hɔ mfe dodow bi.

Afe 1973 mu no, nna ɔsɛ dɛ yesi gyinae bi naaso nna ɔnnda famu mma hɛn. Nna yarba bi a ɔyɛ hu retseetsee me yer Sheila paa. Aber a yɛkɔr ehyiadzi bi wɔ New York no, ɔdze nyinsuwa kaa kyerɛɛ me dɛ: “Meserɛ wo, murunntum nntoa dɛm edwuma yi do bio! Maberɛ na aber biara so nna yarba rehaw me.” Nna menye me yer abɔ mu asom bɔbor mfe 14 wɔ Africa n’anee. Nna m’enyi sɔ nokwardzi a ɔdze asom no, naaso dɛm aber yi dze nna obehia dɛ yɛyɛ nsesa ahorow bi. Dɛm ntsi yesusuu hɛn asɛm no ho na yefii hɛn akoma mu bɔɔ ho mpaa mpɛn pii. Ɔno ekyir no, yesii gyinae dɛ yɛbɛsan akɔ Canada, osiandɛ nna adɔktafo botum ahwɛ no yie wɔ hɔ kyɛn beebi a nna yɛwɔ no. Nna ɔyɛ hɛn yaw paa dɛ yerigya hɛn asɛmpatserɛw edwuma nye ber nyina som edwuma no wɔ ekyir. Gyinae ahorow a yeesisii nyina, nna iyi na ɔyɛ dzen ma hɛn paa.

Yekodur Canada no, me nyɛnko bi a nna minyim no dadaada faa me wɔ n’edwuma mu. Nna ɔtontɔn kaar wɔ Toronto n’etsifi afamu hɔ beebi. Sika kakra a nna menye me yer wɔ no, yɛdze bi haa dan, na yɛdze bi so tɔɔ ngua adadaw bi sii hɛn dan no mu. Iyi maa yetumii hyɛɛ abrabɔ ase fofor a nna yɛnndze kaw biara. Nna yɛmmpɛ dɛ yɛdze ndzɛmba pii kyekyer hɛnho wɔ asetsena mu, osiandɛ nna yɛrohwɛ kwan dɛ bi a da kor da kor bi yɛbɛsan akɛyɛ ber nyina som edwuma no bio. Na enyigyesɛm so nye dɛ, wɔannkyɛr koraa na dza nna yɛrohwɛ kwan no baa mu. Ɔyɛɛ hɛn nwanwa o.

 Mehyɛɛ ase kɔboaa Ehyiadzi Asa fofor a nna worisi no wɔ Norval a ɔwɔ Ontario no. Nna mokɔ hɔ Memenda biara. Wosii Ehyiadzi Asa no wiei ekyir no, wɔkaa kyerɛɛ me dɛ monkɔhwɛ do. Dɛm aber no, nna Sheila no ho rotɔ nkakrankakra, ntsi yɛgyee too mu dɛ yebotum ayɛ dɛm dwumadzi fofor a nna wɔdze ahyɛ hɛn nsa yi. Ntsi wɔ June 1974 no, yetui kɛtsenaa dan a wɔdze maa hɛn wɔ Ehyiadzi Asa hɔ no mu. Nna ɔyɛ hɛn dɛw paa dɛ yɛasan reyɛ ber nyina som edwuma no bio.

Enyigyesɛm nye dɛ, ber rokɔ do no, nna Sheila no ho gu do ara rotɔ no. Dɛm ntsi mfe ebien ekyir no, yetumii kɛyɛɛ ɔmansin edwuma no bi. Nna ɔmansin a ɔsɛ dɛ yɛsom wɔ mu no wɔ Canada ne mantɔw bi a wɔfrɛ no Manitoba mu. Na hɔ so dze, obiara nyim dɛ hɔ yɛ awɔw paa. Naaso, nna ahokeka a enuanom a wɔwɔ hɔ no dze som no mu yɛ hyew paa, na hɛn enyi sɔɔ ɔdɔ a wɔdaa no edzi kyerɛɛ hɛn no. Yebohun dɛ ɔnnyɛ beebi a yɛsom no nye asɛm no, na mbom dza ohia paa nye dɛ yɛbɔkɔ do asom Jehovah wɔ beebiara a yɛwɔ no.

Aber a yɛyɛɛ ɔmansin edwuma no mfe bi ekyir no, wɔtoo nsa frɛɛ hɛn dɛ yɛnkɔsom wɔ Canada Bethel wɔ 1978 mu. Yekodur hɔ no, asɛm bi sii ma ɔhaaw me paa, naaso musuaa biribi fii mu. Wɔkaa dɛ menkɛma dɔnhwer kor na fa ɔkasa wɔ nhyiamu tsitsir bi a wɔyɛe wɔ Montreal no ase. Nna mebɛma no wɔ French kasa mu. Awerɛhosɛm nye dɛ, ɔkasa no annyɛ enuanom no dɛw. Dɛm ntsi onua bi a nna ɔyɛ edwuma wɔ Ɔsom Edwuma Dwumadzibea a ɔwɔ Bethel no twee m’adwen sii do, na otuu me fo wɔ ho. Asɛm no nye dɛ, dɛ mbrɛ ndɛ minyim moho dɛ sɛ ɔba no ɔkasa a mennyɛ adze no, nna nkyɛ ɔsɛ dɛ dɛm aber no so muhu no dɛm. Naaso mannye no annyɛ adwen wɔ dza ɔkae no ho. Dɛm ntsi nna menye n’enyi nnhyia koraa. Afei so mo bo fuwii osiandɛ metsee nka dɛ ɔannkamfo me, mbom dza meyɛe a wɔannkɔ yie no na ɔkaa ho asɛm. Dza meyɛe no dze, mannyɛ no yie koraa, osiandɛ medze m’adwen sii kwan a ɔfaa do tuu me fo nye adwen a nna mowɔ wɔ no ho do.

Nda kakraabi ekyir no, Nkorbata Egyinatukuw no munyi bi frɛɛ me na ɔnye me kaa dza nna ɔrokɔ do wɔ menye onua no ntamu ho asɛm. Megyee too mu dɛ mannyɛ no yie, na mepaa no kyɛw. Ɔno ekyir no, mokɔr onua no a ɔdze afotu no maa me no nkyɛn kɛpaa no so kyɛw. Ofii n’akoma mu gyee too, na ɔdze kyɛɛ me. Dza osii no boaa me ma musuaa biribi a mo werɛ nnkefir da. Ɔmaa mubohun dɛ ohia paa dɛ mokɔ do brɛ moho adze. (Mbɛ. 16:18) Maserɛ Jehovah mpɛn pii dɛ ɔmboa me ma minya dɛm suban yi bi. Afei so, mesi mo bo dɛ aber biara a obi bɛka biribi a mayɛ ho asɛm akyerɛ me no, sɛ ɔnnyɛ me dɛw mpo a, mebɛbrɛ moho adze na maagye ato mu.

Mebaa Canada Bethel no, mfe 40 abɛsen kɔ, na ofitsi 1985 reba no, menya hokwan asom dɛ Nkorbata Egyinatukuw no munyi. February 2021 na mo dɔfo Sheila wui. Ɔyɛ a mefe no paa. Medze no wu ho awerɛhow to nkyɛn a, osiandɛ mara so me mfe kɔ ara na ɔrokɔ enyim ntsi, ndzɛmba bi wɔ hɔ a munntum nnyɛ. Naaso minnyi adagyer koraa wɔ Jehovah no som mu, na iyi ma m’enyi gye osiandɛ ɔmma memmfa ‘m’adwen nnsi mo nkwa nda a orutwa mu kɔ no do pii.’ (Ɔsɛnk. 5:20) Ɔwɔ mu, mehyia ɔhaw ahorow wɔ m’asetsena mu. Naaso, sɛ medze ɔhaw ahorow no toto enyigye a menya no ho a, onndu beebiara. Medze Jehovah edzi kan wɔ m’asetsena mu, na medze mfe 70 so ayɛ ber nyina som edwuma no. Iyi ama m’akoma atɔ me yamu paa. Mobɔ mpaa dɛ hɛn enuanom mberantsɛ na nkataasia no so nkɔ do ara mfa Jehovah ndzi kan wɔ hɔn asetsena mu. Osiandɛ mowɔ awerɛhyɛmu paa dɛ sɛ wɔyɛ dɛm a hɔn enyi bɛgye wɔ hɔn asetsena mu, na hɔn akoma so bɔtɔ hɔn yamu. Nhyira a ɔtse dɛm dze, sɛ esom Jehovah nkotsee a nna wo nsa bɛka.