Sɛ yerubosua adze a, yebotum ebisa hɛnho dɛ, ‘Ebɛn adze fofor na mepɛ dɛ musua?’ Naaso, ɔsɛ dɛ yɛhwɛ yie paa amma biribi fofor a yɛpɛ dɛ yesua no aanngye hɛn adwen. Sɛ ɔba no dɛm a, ɔremma yennhu ndzɛmba a Jehovah pɛ dɛ ɔdze kyerɛkyerɛ hɛn no. Ntsi sɛ yerusua adze a, yebesi dɛn ama kwan ma Jehovah aakyerɛkyerɛ hɛn?

Serɛ Jehovah dɛ ɔmma wo nyansa. Bɔ Jehovah mpaa, na biribiara a ɔpɛ dɛ isua no seseiara no, ka kyerɛ no dɛ ɔmboa wo ma tse ase yie. (Jas. 1:5) Hwɛ yie na eennya adwen dɛ dza esua anaa inyim dada no ara ye ma wo, ntsi onnhia dɛ isua biribi fofor biara ka ho.—Mbɛ. 3:​5, 6.

Nyankopɔn n’Asɛm no wɔ tum, dɛm ntsi bɔ mbɔdzen fa dza isua fi mu no bɔ wo bra. Bible no ka dɛ: “Nyankopɔn asɛm wɔ nkwa.” (Heb. 4:12) Osian iyi ntsi, aber biara a yebosua Bible no, yebotum esua biribi fofor bi a ɔbɔboa hɛn wɔ hɛn asetsena mu. Naaso, sɛ iyi botum ayɛ yie a, ɔsɛ dɛ yɛyɛ krado dɛ yɛbɛma kwan ma Nyankopɔn afa n’Asɛm no do akyerɛ hɛn dza ɔsɛ dɛ yɛyɛ.

Kyerɛ ndzɛmba a Jehovah dze kyerɛkyerɛ wo no ho enyisɔ. Ndzɛmba a Jehovah dze kyerɛkyerɛ hɛn no, ɔtse dɛ mbrɛ ɔdze “edziban a angoa wɔ mu [anaa edziban pa]” ato hɛn pon. (Isa. 25:6) Ɔnnsɛ dɛ yeyiyi “edziban” ahorow a ɔnnyɛ hɛn dɛw no sisi nkyɛn. Sɛ yɛbɔ mbɔdzen sua dza Nyankopɔn dze kyerɛkyerɛ hɛn no a, ɔbɔboa hɛnankasa na hɛn enyi so bɛgye!