Ɔnnsɛ dɛ yenya adwen dɛ osiandɛ nna Jesus n’esuafo 70 no nnka ho bi ma wodzii Ewuradze Ewimbir Edzidzi no ntsi, ɔkyerɛ dɛ nna Jesus nngye hɔn nnto mu bio anaadɛ nna woegyaa n’ekyir dzi. Mbom dza ɔwɔ mu nye dɛ, nna Jesus noara na ɔpɛ dɛ ɔnye n’asomafo no dzi Ewuradze Ewimbir Edzidzi dɛm aber no.

Nna Jesus gye asomafo 12 no nye esuafo 70 no nyina to mu dɛ wɔyɛ n’ekyirdzifo. Jesus hyɛɛ no som edwuma no ase no, odzii kan yii mbarimba 12 fii n’esuafo no mu, na ɔfrɛɛ hɔn asomafo. (Luke 6:​12-16) Aber a “ɔfrɛɛ Duebien no” na “ɔsomaa hɔn dɛ wɔnkɛka Nyankopɔn n’Ahendzi no ho asɛm, na wɔnsa nyarba” no, nna ɔwɔ Galilee. (Luke 9:​1-6) Ɔno ekyir no, aber a Jesus kɔr Judea no so, “[oyii] esuafo 70 afofor so, na ɔsomaa hɔn beenu beenu.” (Luke 9:51; 10:1) Ntsi sɛ yɛbɛka a, nna Jesus wɔ ekyirdzifo pii wɔ mbea ahorow a nna wɔreka no ho asɛmpa.

Ɔbɛyɛ dɛ afe biara, nna Jesus n’esuafo a wɔyɛ Jewfo no nye hɔn ebusuafo dzi Apaho no. (Ex. 12:​6-11, 17-20) Aber a nna Jesus no wu no rebɛn no, ɔnye n’esuafo no kɔr Jerusalem. Naaso Jesus ammfrɛfrɛ n’esuafo a wɔwɔ Judea, Galilee, na Perea nyina dɛ wombehyia mu ma wondzi Apaho afahyɛ no. Ɔbɛyɛ dɛ nna Jesus pɛ dɛ ɔnye asomafo no nkotsee dzi Apaho no dɛm aber no. Dɛm ntsi ɔkaa kyerɛɛ hɔn dɛ: “Mepɛ paa dɛ menye hom dzi Apaho yi ansaana mehu amandze.”—Luke 22:15.

Siantsir bi so ntsi na Jesus yɛɛ dɛm. Ɔno nye dɛ nna ɔrennkyɛr koraa ma Jesus a ɔyɛ “Nyankopɔn Eguambaa a oyi wiadze bɔn kɔ” no eewu. (John 1:29) Afei so nna ɔsɛ dɛ owu wɔ Jerusalem. Osiandɛ ofi tsetse nyina, nna hɔ na Israelfo no bɔ afɔr ma Nyankopɔn. Nna eguambaa a wodzi no Apaho da no ma Israelfo no kaa mbrɛ Jehovah sii gyee hɔn fii Egypt nkowaasom mu. Naaso nna dza Jesus n’afɔrbɔ no bɛyɛ no bɛkyɛn dza Jehovah yɛe maa Israelfo no koraa. Nna ɔbɛgye adasamba nyina efi bɔn na owu mu. (1 Cor. 5:​7, 8) Jesus no nkwa a ɔdze bɔɔ afɔr no maa asomafo 12 no bɛyɛɛ Christianfo asafo no ne fapem. (Eph. 2:​20-22) Na dza ɔwɔ mu nye dɛ, kurow krɔnkrɔn Jerusalem so wɔ “mfapem duebien” a wɔakyerɛw “Eguambaa no n’asomafo duebien no hɔn edzin duebien wowɔ do.” (Nyi. 21:​10-14) Nokwasɛm nye dɛ, nna asomafo anokwafo yi bedzi dwuma tsitsir bi ma dza Nyankopɔn abɔ ne tsirmu dɛ ɔbɛyɛ no aaba mu. Dɛm ntsi ntseasee wɔ mu dɛ nna Jesus pɛ dɛ ɔnye hɔn dzi Apaho no, na wowie ara pɛr a, ɔnye hɔn edzi Ewuradze Ewimbir Edzidzi no so aka ho.

Aber a nna Jesus nye n’asomafo no ridzi Ewuradze Ewimbir Edzidzi no, nna n’esuafo 70 no nye n’esuafo afofor a wɔaka no nnyi hɔ bi. Naaso, nna n’esuafo a wobedzi no nokwar no nyina botum enya Ewuradze Edzidzi no do mfaso. Ekyir yi, esuafo a wɔdze sunsum krɔnkrɔn seraa hɔn no nyina bɛkaa ahendzi ho ahyɛmu a Jesus nye n’asomafo no dzii no ho. Dɛm ahyɛmu yi na Jesus kaa ho asɛm kyerɛɛ n’asomafo no dɛm anafua no.—Luke 22:​29, 30.