1. Ebɛnadze na yehia wɔ hɛn asetsena mu? Ebɛn kwan do na iyi bɛma hɛn enyi agye?

 SƐ WƆKA enyigye mapa a, ɔnnyɛ enyigye a yenya no ndɛ a, ɔkyena na atsew kɔ no. Mbom, ɔyɛ enyigye a obi botum enya no nkwa nda nyina. Obesi dɛn ayɛ yie dɛm? Jesus kae wɔ ne Bepɔw Do Asɛnka no mu dɛ, “Nhyira aka sunsum mu ehiafo,” kyerɛ dɛ, hɔn a wɔpɛ dɛ wohu Nyankopɔn yie na wɔsom no. (Matt. 5:3) Nna Jesus nyim dɛ, mbrɛ Jehovah Nyankopɔn sii bɔɔ hɛn no ntsi, yɛpɛ paa dɛ yehu hɛn Bɔfo no yie na yɛsom no. Dɛm ntsi adze a yehia wɔ hɛn asetsena mu nye dɛ yebohu Nyankopɔn yie na yaasom no. Iyi bɛma hɛn enyi agye, osiandɛ Jehovah yɛ enyigye Nyankopɔn, ntsi obiara a ɔbɔsom no no, n’enyi bɛgye.​—1 Tim. 1:11.

2-3. (a) Dɛ mbrɛ Jesus kae no, woananom so na hɔn enyi botum agye? (b) Ebɛnadze na yebosusu ho wɔ adzesua yi mu, na ebɛnadze ntsi na no ho hia dɛ yɛyɛ dɛm?

² Sɛ yennyi ɔhaw biara wɔ hɛn asetsena mu a, aso ɔno na ɔbɛma hɛn enyi agye ankasa? Oho. Jesus kaa biribi soronko koraa wɔ ne Bepɔw Do Asɛnka no mu. Ɔkaa dɛ hɔn a osian hɔn bɔn ntsi wɔabotow anaa hɔn a atseetsee a wɔrefa mu wɔ hɔn asetsena mu ntsi “hɔn werɛ ahow” no, hɔn enyi botum agye. Jesus sanee kaa dɛ, “hɔn a tsenenee ntsi wɔahaw hɔn,” anaa hɔn a “wɔbɛyaw” hɔn osiandɛ wɔyɛ Christ n’esuafo ntsi, hɔn so hɔn enyi botum agye. (Matt. 5:4, 10, 11) Naaso, yebesi dɛn enya enyigye ankasa wɔ tsebea a ɔtsetse dɛm mu?

 ³ Nna Jesus reka dɛ ɔnnyɛ asetsena pa a yebenya no na ɔbɛma hɛn enyi agye ankasa. Mbom, sɛ yesua Nyankopɔn ho adze, yɛsom no, na yɛtwe bɛn no a, ɔno na ɔbɛma hɛn enyi agye. (Jas. 4:8) Yebesi dɛn ayɛ dɛm? Adzesua yi mu no, yɛbɔhwɛ ndzɛmba etsitsir ebiasa bi a sɛ yɛyɛ a, ɔbɛma yeenya enyigye mapa.

4. Adze a odzi kan a ɔwɔ dɛ yɛyɛ ama yeenya enyigye mapa nye dɛn? (Ndwom 1:1-3)

⁴ ADZE A ODZI KAN: Sɛ hɛn enyi bɛgye ankasa a, ɔsɛ dɛ yesua Bible no. Jesus dze Nyankopɔn n’Asɛm no totoo edziban ho. Nyimpa na mbowa nyinara hia edziban ama wɔaatsena ase. Naaso nyimpa nkotsee na wobotum esua Bible no. Ohia paa dɛ yɛyɛ dɛm. Iyi ntsi Jesus kaa dɛ: “Nnyɛ paanoo nko bi na nyimpa nam do bɛtsena ase, na asɛm biara a ofi Nyankopɔn anomu so.” (Matt. 4:4) Dɛm ntsi, ɔnnsɛ dɛ yɛma Bible akenkan pa hɛn tsir do da kor mpo. Ɔdwontofo no kaa dɛ: ‘Enyigye nye nyimpa a n’enyi gye Jehovah ne mbra ho, na ɔdwen ho adzekyee na adzesaa.’​—Kenkan Ndwom 1:1-3.

5-6. (a) Ebɛnadze na yebotum esua efi Bible mu? (b) Sɛ yɛkenkan Bible a, ebɛn kwan do na obotum aboa hɛn?

⁵ Jehovah efi ɔdɔ mu ama hɛn nsɛm a no ho hia wɔ Bible no mu a ɔma yehu mbrɛ yebesi enya enyigye wɔ hɛn asetsena mu. Bible no ma yehu siantsir a Nyankopɔn bɔɔ hɛn. Bio so, ɔma yehu mbrɛ yebesi atwe abɛn Nyankopɔn nye dza yɛyɛ a ɔbɛma ɔdze hɛn bɔn akyɛ hɛn. Afei so, Bible no ma yehu daakye papa a Nyankopɔn dze abɔ hɛn anohoba. (Jer. 29:11) Dɛm nokwasɛm yi a Bible no ma yehu no ma yenya enyigye mapa wɔ hɛn asetsena mu!

 ⁶ Yenyim so dɛ Bible no ma hɛn afotu a yebotum dze abɔ hɛn bra da biara. Sɛ yɛdze afotu a ɔtse dɛm bɔ hɛn bra a, hɛn enyi botum agye. Sɛ asetsena mu haw hyɛ wo do ma innhu dza ennyɛ a, gye ber pii kenkan Bible no na dwendwen ho. Jesus kaa dɛ: “Nhyira aka hɔn a wotsie Nyankopɔn asɛm na wodzi do”!​—Luke 11:28.

7. Sɛ epɛ dɛ inya wo Bible akenkan do mfaso kɛse a, ebɛnadze na ɔsɛ dɛ eyɛ?

⁷ Sɛ erekenkan Bible no a, tɔ bo ara ama w’enyi aagye dza erekenkan no ho. Mfatoho bi nye yi. Fa no dɛ obi anoa edziban bi a epɛ paa ama wo. Naaso osiandɛ epɛ no ntsɛm anaa w’adwen wɔ biribi fofor bi do ntsi, anntɔ bo ara enndzi ntsi anntse edziban no ne dɛw. Iwiei no na ihun dɛ nkyɛ ɔsɛ dɛ etɔ bo ara ama aatse ne dɛw no. Sɛ yɛrekenkan Bible no a, biribi a ɔtse dɛm botum ato hɛn. Ɔtɔ da a, yɛnntɔ bo ara nnkenkan Bible no, ntsi ebɔhwɛ no, nna yeennsua biribiara emmfi mu. Sɛ erekenkan Bible no a, tɔ wo bo ara fa enyigye kenkan. Twa dza erekenkan no ho mfonyin wɔ w’adwen mu, fa no dɛ etse hɔn a wɔrekasa no hɔn ndze, na dwendwen dza akenkan no ho. Sɛ eyɛ dɛm a, w’enyi bɛgye ankasa.

8. Ebɛn kwan do na “akowaa nokwafo nye nyansafo” no reyɛ edwuma a wɔdze ahyɛ ne nsa no? (Hwɛ ase hɔ asɛm no so.)

⁸ Jesus yii “akowaa nokwafo nye nyansafo” no dɛ ɔmma hɛn edziban wɔ ber a ɔsɛ mu. Na nokwar mu no, nkyerɛkyerɛ a wɔdze ma hɛn no ma yɛtwe bɛn Nyankopɔn na yetum som no yie so. * (Matt. 24:45) Nkyerɛkyerɛ a akowaa nokwafo no dze ma hɛn no nyina fi Kyerɛwnsɛm no mu. (1 Thess. 2:13) Ntsi, nkyerɛkyerɛ a ɔtse dɛm no ma yehu Jehovah no nsusui wɔ ndzɛmba ho dɛ mbrɛ ɔada no edzi wɔ Bible no mu no. Iyi ntsi, yɛkenkan Ɔweɔn-Aban na Nyan! magazine nye nsɛm ahorow wɔ jw.org. Yesiesie hɛnho ma asafo nhyiamu a yɛyɛ no dapɛn finimfin na dapɛn n’ewiei no. Afei so, yɛhwɛ JW Broadcasting^® dwumadzi a wɔyɛ no bosoom biara no. Sɛ yɛgye ber sua Bible no a, yebotum ayɛ adze a otsia ebien a ɔbɛma yeenya enyigye mapa.

9. Adze a otsia ebien a ɔbɛma hɛn enyi agye ankasa nye dɛn?

⁹ ADZE A OTSIA EBIEN: Sɛ hɛn enyi bɛgye ankasa a, ɔsɛ dɛ yɛdze Jehovah ne mbra bɔ hɛn bra. Ɔdwontofo no kaa dɛ: ‘Enyigye nye obiara a osuro Jehovah, na ɔnantsew n’akwan mu.’ (Ndw. 128:1) Sɛ yesuro Jehovah a, yebenya obu kɛse paa ama no, na yɛrennyɛ biribi a ɔmmpɛ. (Mbɛ. 16:6) Iyi ntsi, papa na bɔn ho mbra a Nyankopɔn dze ama hɛn wɔ Bible no mu no, yɛbɛyɛ dza yebotum biara dɛ yebedzi do. (2 Cor. 7:1) Sɛ yɛyɛ dza Jehovah pɛ na yɛpow dza okyir a, hɛn enyi bɛgye paa.​—Ndw. 37:27; 97:10; Rom. 12:9.

10. Dɛ mbrɛ Romefo 12:2 kyerɛ no, sɛ Nyankopɔn ne mbra a yenyim no da nkyɛn a, ebɛnadze bio na ɔsɛ dɛ yɛyɛ?

¹⁰ Kenkan Romefo 12:2. Sɛ obi nyim dɛ Jehovah na ɔwɔ tum dɛ ɔkyerɛ dza ɔyɛ papa na bɔn a, ɔno ara nndɔɔ so. Ɔsɛ dɛ dza Jehovah ka no, nyimpa no gye to mu na ɔdze bɔ ne bra. Mfatoho bi nye yi. Obotum aba dɛ obi nyim dɛ aban na ɔwɔ tum dɛ ɔkyerɛ mbirika a ɔwɔ dɛ ahɛnkafo kɔ wɔ kaar kwan do. Naaso ebɔhwɛ no, nna dza aban aka no ɔnngye nnto mu. Dɛm ntsi, ɔkɔ mbirika ma ɔbor dza aban akyerɛ no do koraa. Ɔsɛ dɛ yɛdze hɛn abrabɔ kyerɛ dɛ yɛgye to mu paa dɛ, sɛ yɛdze Jehovah ne mbra bɔ hɛn bra a, obesi hɛn yie. (Mbɛ. 12:28) Dɛmara na David tsee nka. Ntsi dza ɔkae faa Jehovah ho nye dɛ: “Ɔwo na ebɛkyerɛ me  nkwa kwan: enyika a ɔmee wɔ w’enyim; enyigye wɔ w’abanyimfa hɔ daa.”​—Ndw. 16:11.

11-12. (a) Sɛ ɔhaw bi hyɛ hɛn do anaa hɛn abaw mu bu a, ebɛn ahwɛyie na ɔwɔ dɛ yɛyɛ? (b) Sɛ yɛrepɛ biribi a yɛdze bɛgyegye hɛn enyi a, ebɛn kwan do na Philippifo 4:8 botum aboa hɛn?

¹¹ Sɛ ɔhaw bi hyɛ hɛn do anaa hɛn abaw mu bu a, bi a yɛbɛtse nka dɛ ɔwɔ dɛ yɛyɛ biribi ma ɔhaw no tun twa. Ntseasee wɔ mu dɛ yɛbɛyɛ biribi a ɔtse dɛm, naaso ɔwɔ dɛ yɛyɛ ahwɛyie na yaannyɛ biribi a Jehovah mmpɛ.​—Eph. 5:10-12, 15-17.

¹² Aber a ɔsomafo Paul kyerɛɛw krataa kɛmaa Philippifo no, otuu hɔn fo dɛ wɔnkɔ do ndwen ndzɛmba a ‘ɔtsen, noho tsew, ɔyɛ fɛw nye ɔbra pa ho.’ (Kenkan Philippifo 4:8.) Sɛ ehwɛ asɛm no a, nna ɔnnyɛ enyigyedze ho asɛm na Paul reka. Naaso, yebotum esusu asɛm a ɔkae no ho ber a yɛrepɛ biribi a yɛdze bɛgyegye hɛn enyi no. Yɛ dɛm adze yi ma yɛnhwɛ: Beebiara a kasafua “dza” pue wɔ Philippifo 4:8 no, fa nkasafua “ndwom,” “sene,” “nwoma,” anaa “video game” hyɛ ananmu. Dɛm a ebɛyɛ no bɔboa wo ma eehu enyigyedze a Nyankopɔn n’enyi gye ho nye dza n’enyi nngye ho. Yɛpɛ dɛ yɛdze Jehovah ne mbra a ɔkrɔn no bɔ hɛn bra. (Ndw. 119:1-3) Sɛ yɛyɛ dɛm a, yebenya tsibowa pa, na yebotum ayɛ adze a otsia ebiasa a ɔbɛma yeenya enyigye mapa.​—Andw. 23:1.

13. Adze a otsia ebiasa a ɔma hɛn enyi gye nye dɛn? (John 4:23, 24)

¹³ ADZE A OTSIA EBIASA: Fa Jehovah no som dzi kan wɔ w’asetsena mu. Jehovah na ɔbɔɔ hɛn, ntsi ɔno na ɔfata dɛ yɛsom no. (Nyi. 4:11; 14:6, 7) Dɛm ntsi, adze a ɔwɔ dɛ ohia hɛn tsitsir wɔ hɛn asetsena mu nye dɛ yɛbɔsom Jehovah wɔ ɔkwan a ɔakyerɛ dɛ yɛmfa do nsom no no. Ɔno nye dɛ yɛbɔsom no wɔ “sunsum nye nokwar mu.” (Kenkan John 4:23, 24.) Ɔsɛ dɛ yɛma Nyankopɔn no sunsum krɔnkrɔn no kyerɛ hɛn kwan ma yɛsom no dɛ mbrɛ nokwasɛm a ɔwɔ n’Asɛm mu kyerɛ no. Ɔman a yɛtse mu no, sɛ wɔdze nsa ato hɛn dwumadzi ahorow bi do o, sɛ wɔabra hɛn o, ɔwɔ dɛ yɛdze Jehovah no som dzi kan wɔ hɛn asetsena mu. Yɛrekasa yi, wɔdze hɛn nuanom bɔbor 100 ekogu efiadze. Bɔn a wɔayɛ ara nye dɛ wɔyɛ Jehovah Adasefo. * Dɛm ɔhaw yi nyina ekyir no wɔwɔ enyigye, osiandɛ wɔyɛ dza wobotum biara bɔ mpaa, wosua Kyerɛwnsɛm no, na wɔka Nyankopɔn na n’Ahendzi no ho asɛm kyerɛ nkorɔfo. Sɛ nkorɔfo soɛr tsia hɛn anaa wɔkasa tsia hɛn mpo a, hɛn enyi gye, osiandɛ Jehovah boa hɛn ma yɛdze enyimia gyina mu. Afei so, yenyim dɛ obehyira hɛn.​—Jas. 1:12; 1 Pet. 4:14.

14. Ebɛn asɛm na ɔtoo hɛn nua aberantsɛ bi a ofi Tajikistan, na ebɛnadze ntsi a?

¹⁴ Hɛn nuanom binom ehyia tsebea a no mu yɛ dzen paa. Naaso wɔwɔ enyigye mapa osiandɛ, wɔyɛ ndzɛmba etsitsir ebiasa a yɛaka ho asɛm no. Ɔwodze ma yɛnhwɛ hɛn nua bi a oedzi mfe 19 a wɔfrɛ no Jovidon Bobojonov. Ofi Tajikistan, na ɔammpen do dɛ ɔbɔkɔ sogya. Ntsi wɔkɛkyeer no wɔ ne fie wɔ October 4, 2019 na wɔdze no kɔtoo efiadze abosoom dodow bi. Wɔnye no dzii no wenwennwen dɛ obi a odzi nsɛmbɔn. Wɔkaa esisisɛm a wɔdze dzii no no ho asɛm wɔ aman pii do. Wɔbɔɔ amandzɛɛ dɛ, nna wɔpɛ dɛ wɔhyɛ no ma ɔhyɛ sogyafo hɔn atar na ɔka ntam a sogyafo ka no, ntsi wɔboor no. Iyi ekyir no, wɔdze no kɔr kɔɔt ma wobuu no fɔ na wɔdze no kɔtoo  efiadze. Beebi a wɔdze no kɔree no, nna ɔyɛ bea a wɔhyɛ nkorɔfo ma wɔyɛ edwumadzen. Ɔdaa hɔ ara kesii dɛ ɔmampanyin no kaa dɛ wonyi no ma ɔnkɔ fie. Ɔhaw a Jovidon faa mu nyina mu no, ɔamma n’enyigye annsɛɛ na ɔkɔr do soom Jehovah nokwar mu. Ebɛnadze na ɔboaa no? Aber nyina nna ɔkenkan Nyankopɔn n’Asɛm dwendwen ho.

15. Ebɛn kwan do na Jovidon kɔr do suaa Jehovah ho adze aber a nna ɔda efiadze no?

¹⁵ Aber a nna Jovidon wɔ efiadze no, nna onnyi Bible na asafo nwoma biara naaso ɔkɔr do suaa Jehovah ho adze. Osii dɛn yɛɛ dɛm? Nna enuanom no dze edziban rekɛma no wɔ efiadze hɔ a, wɔkyerɛw daa asɛm no wɔ baag a edziban no gu mu no ho. Iyi ntsi, da biara nna otum kenkan Bible no dwendwen ho. Aber a woyii no fii efiadze no, afotu a ɔdze maa hɔn a wonnhyiaa ɔsoɛrtsia a no mu yɛ dzen biara nye dɛ: “Seseiara a hom nnhyiaa nsɔhwɛ biara yi, hom botum dze hokwan a hom wɔ no edzi dwuma yie akenkan Bible nye hɛn nwoma ahorow ama hom eenya Jehovah ho nyimdzee pii.”

16. Ebɛnadze na Jovidon dze n’adwen sii do?

¹⁶ Hɛn nua yi dze Jehovah ne mbra bɔɔ ne bra. Ɔanndwendwen ndzɛmba bɔn ho na ɔannyɛ dza ɔnntsen so, mbom ɔkɔr do dze  n’adwen sii Jehovah do na ɔyɛɛ n’apɛdze. Afei so, Jovidon dwendween mbrɛ Nyankopɔn n’abɔdze si yɛ nwanwa no ho. Anapa biara nna ɔtse nnoma hɔn su. Odu ewimbir so a, nna ɔhwɛ bosoom na nworaba a wɔwɔ wimu no. Ɔkaa dɛ: “Jehovah n’abɔdze a ɔtsetse dɛm no maa m’enyi gyee na ɔhyɛɛ me nkuran so.” Sɛ yɛkyerɛ Jehovah n’abɔdze nye Bible mu nkyerɛkyerɛ a ɔdze ma hɛn no ho enyisɔ a, hɛn enyi bɛgye na ɔbɔboa hɛn ma yɛdze enyimia egyina ɔhaw a yehyia no ano.

17. Ebɛn kwan do na 1 Peter 1:6, 7 botum aboa obi a orihyia ɔhaw tse dɛ dza Jovidon hyiae no?

¹⁷ Adze fofor a Jovidon yɛe nye dɛ ɔdze Jehovah no som dzii kan wɔ n’asetsena mu. Nna onyim dɛ adze a ohia paa nye dɛ ɔdze nokwardzi bɔsom nokwar Nyankopɔn no. Jesus kaa dɛ: ‘Sɔr Jehovah wo Nyankopɔn, na no nko na som no.’ (Luke 4:8) Nna dza asogyafo no na hɔn mpanyimfo no pɛ ara nye dɛ Jovidon bɛka dɛ ɔnnyɛ Jehovah Dasefo bio. Naaso, nna adzekyee na adzesaa nyina ɔbɔ Jehovah mpaa dzendzenndzen serɛ no dɛ ɔmboa no amma oeemmbu ne mbra do. Nnyɛ ɔno nko, nna ɔserɛ no dɛ ɔmboa no ma ɔnkɔ do nsom no wɔ nokwar mu. Aber a nna wɔnnkyeer no, wɔmmboor no na wɔmmfaa no nnkɔtoo efiadze no, nna ɔwɔ gyedzi. Naaso aber a ɔfaa dɛm ɔhaw yi nyina mu no, nna ɔtse dɛ mbrɛ wɔasɔ ne gyedzi ahwɛ, na iyi maa ne gyedzi yɛɛ dzen kɛse. Seseiara n’enyi gye dɛ ɔwɔ gyedzi a ɔtse dɛm.​—Kenkan 1 Peter 1:6, 7.

18. Ebɛnadze na yɛyɛ a ɔbɛma hɛn enyi akɔ do agye?

¹⁸ Jehovah nyim dza yɛyɛ a ɔbɛma hɛn enyi agye ankasa. Yɛahwɛ ndzɛmba ebiasa bi a sɛ yɛyɛ a ɔbɛma yeenya enyigye mapa. Ɔmmfa ho nsɛndzendzen biara a yebehyia no, sɛ yɛyɛ dɛm ndzɛmba ebiasa yi a, hɛn enyi bɔkɔ do agye. Sɛ ɔba no dɛm a, yebotum aka dɛ: ‘Enyigye nye ɔman a Jehovah yɛ hɔn Nyankopɔn’!​—Ndw. 144:15.