1. Ebɛn enyidado na Jehovah dze ama adasamba?

 JEHOVAH ama adasamba enyidado soronko bi. Ɔno nye dɛ yebenya onnyiewiei nkwa. Binom wɔ enyidado dɛ wɔbɛtsena ase daa wɔ sor dɛ sunsum abɔdze a worunnwu da. (1 Cor. 15:50, 53) Naaso nyimpa dodow no ara wɔ enyidado dɛ wɔbɛtsena asaase do daa. Dɛm nkorɔfo yi benya apɔwmudzen papa na hɔn enyi bɛgye daa. (Nyi. 21:3, 4) Dɛ yɛhwɛ kwan dɛ yebenya onnyiewiei nkwa wɔ sor o, asaase do o, enyidado a yɛwɔ no som bo ma hɛn.

2. Enyidado a yɛwɔ no gyina ebɛnadze do, na ebɛnadze ntsi na yɛreka dɛm?

² Kasafua “enyidado” a wɔdze dzii dwuma wɔ Bible mu no, yebotum akyerɛ ase dɛ “obi hwɛ kwan dɛ biribi papabi besi.” Daakye ho enyidado a yɛwɔ no, ɔbɛba mu kwan biara do osiandɛ Jehovah na ɔahyɛ hɛn bɔ. (Rom. 15:13) Yenyim bɔ a ɔahyɛ hɛn no, na yenyim so dɛ dza ɔka biara ɔyɛ. (Nka. 23:19) Yɛgye dzi paa dɛ Jehovah pɛ dɛ ɔyɛ dza ɔaka dɛ ɔbɛyɛ biara, na ɔwɔ tum a ɔdze bɛyɛ so. Dɛm ntsi enyidado a yɛwɔ no, ɔnnyɛ adaaso anaa nsusui hun bi, mbom hɛn enyidado no gyina biribi a odzi mu do.

3. Ebɛnadze na yebosusu ho wɔ adzesua yi mu? (Ndwom 27:14)

³ Hɛn sor Egya no dɔ hɛn na ɔpɛ dɛ yɛgye no dzi. (Kenkan Ndwom 27:14, NWT.) Sɛ enyidado a yɛwɔ wɔ Jehovah mu no yɛ dzen a, obotum aboa hɛn ma yeemia hɛn enyi egyina nsɔhwɛ ano na yɛdze akokodur na enyigye aahwɛ daakye kwan. Hom mma yɛnhwɛ mbrɛ enyidado a yɛwɔ no si bɔ hɛnho ban. Odzi kan no, yɛbɔhwɛ siantsir a yebotum dze enyidado a yɛwɔ no atoto sekyɛ na dadzekyɛw ho. Ɔno ekyir no, yɛbɔhwɛ mbrɛ yebesi ahyɛ hɛn enyidado no mu dzen.

4. Ebɛn kwan do na enyidado a yɛwɔ no tse dɛ sekyɛ? (Hebrewfo 6:19)

⁴ Ɔsomafo Paul ne krataa a ɔkyerɛwee kɛmaa Hebrewfo no mu no, ɔdze enyidado a yɛwɔ no totoo sekyɛ ho. (Kenkan  Hebrewfo 6:19.) Nna Paul taa fa po do tu kwan, ntsi nna onyim dɛ sɛ wɔto sekyɛ a, ɔmma mframa mmfa po do hɛn no nnkyinkyin. Da kor bi a nna ɔtse po do hɛn mu rutu kwan no, ehum kɛse bi tui ma po no do yɛɛ begyabegya. Aber a nna ehum no rutu no, ohun dɛ hɛn no mu edwumayɛfo roto sekyɛ mbrɛ ɔbɛyɛ a ehum no rimmpia hɛn no ma ɔnnkɛpem ɔbotan bi. (Andw. 27:29, 39-41) Dɛ mbrɛ sekyɛ ma po do hɛn gyina pintsinn no, dɛmara na enyidado a yɛwɔ no boa hɛn ma yɛtakyer Jehovah ho ber a yerihyia ɔhaw ahorow a no mu yɛ dzen no. Sɛ yehyia ɔhaw ahorow a, enyidado a osi pi a yɛwɔ no boa hɛn ma yɛdze abotar gyina ano osiandɛ yenyim dɛ ɔrennkyɛr ndzɛmba bɛyɛ yie. Hom mma ɔntsena hɛn adwen mu dɛ Jesus kaa dɛ wɔbɔsoɛr etsia hɛn. (John 15:20) Sɛ yɛdwendwen anohoba ahorow a Jehovah dze abɔ hɛn no ho a, ɔboa hɛn ma yɛkɔ do som no.

5. Nna Jesus nyim dɛ obowu, naaso ebɛn kwan do na enyidado a ɔwɔ no boaa no ma ogyinaa pintsinn?

⁵ Nna Jesus nyim dɛ obowu owu a ɔyɛ yaw, naaso enyidado a ɔwɔ no boaa no ma ɔkɔr do dzii Jehovah nokwar. Ɔsomafo Peter kaa nkɔnhyɛ bi a ɔwɔ Ndwom nwoma no mu ho asɛm wɔ Pentecost 33 H.B. Dɛm nkɔnhyɛ no ma yehu dɛ nna Jesus wɔ awerɛhyɛmu wɔ Jehovah mu. Nkɔnhyɛ no kaa dɛ: “Mo honam so bɔhom enyidado mu; osiandɛ irinngyaa me kra wɔ [adakamona mu,] eso eremma wo krɔnkrɔnnyi no [nnhu] mpɔtɔwee. . . . Edze w’enyim bɛma enyigye amee me.” (Andw. 2:25-28; Ndw. 16:8-11) Nna Jesus nyim dɛ obowu, naaso nna ɔwɔ enyidado a osi pi dɛ Nyankopɔn benyan no ma ɔdze enyigye aasan akɔ n’Egya nkyɛn wɔ sor.​—Heb. 12:2, 3.

6. Ebɛn asɛm na onua bi kae faa enyidado a yɛwɔ no ho?

⁶ Enyidado a Jehovah dze ama hɛn no aboa hɛn nuanom pii ma wɔdze enyimia egyina ɔhaw ano. Hom mma yɛmfa onua bi a wɔfrɛ no Leonard Chinn dɛ nhwɛdo. Nna ɔwɔ England. Aber a nna Wiadze Ko I rokɔ do no, ɔammpen do dɛ ɔbɔkɔ sogya, ntsi wɔdze no kɔtoo efiadze. Wɔdze nankotsee kɔtoo beebi abosoom ebien, na ɔno ekyir no wɔhyɛɛ no ma ɔyɛɛ edwuma a nna ɔyɛ dzen paa. Ekyir yi ɔkaa dɛ: “Dza mefaa mu no boaa me ma muhun dɛ enyidado ho hia paa ama yeetum dze enyimia egyina ɔhaw ano. Yɛwɔ ndzɛmba pii a ɔboa hɛn ma yɛhyɛ daakye ho enyidado a yɛwɔ no mu dzen. Bi nye nhwɛdo a nyimpa binom tse dɛ Jesus, asomafo no, na nkɔnhyɛfo no yɛe no, nye afei bɔhyɛ ahorow kamakama a ɔwɔ Bible mu no.” Enyidado a nna Leonard wɔ no boaa no ma ogyinaa pintsinn, na dɛmara na enyidado a hɛn so yɛwɔ no botum aboa hɛn ma yeegyina pintsinn.

7. Ebɛn kwan do na nsɔhwɛ a yehyia no hyɛ enyidado a yɛwɔ no mu dzen? (Romefo 5:3-5; James 1:12)

⁷ Sɛ yehyia nsɔhwɛ na yehu mbrɛ Jehovah si boa hɛn ma yɛdze enyimia gyina ano no a, ɔma yehu paa dɛ Jehovah gye hɛn to mu. Ɔba dɛm a, ɔhyɛ enyidado a yɛwɔ no mu dzen. (Kenkan Romefo 5:3-5; James 1:12.) Seseiara enyidado a yɛwɔ no, ɔyɛ kɛse kyɛn enyidado a nna yɛwɔ aber a yehun nokwar no. Satan pɛ dɛ nsɔhwɛ a yehyia no bunkam hɛn do, naaso Jehovah bɔboa hɛn ma yeegyina ne nyina ano.

8. Ebɛn kwan do na enyidado a yɛwɔ no tse dɛ dadzekyɛw? (1 Thessalonicafo 5:8)

⁸ Bible no san so dze enyidado a yɛwɔ no toto dadzekyɛw ho. (Kenkan 1 Thessalonicafo 5:8.) Sordaanyi hyɛ dadzekyɛw mbrɛ ɔbɛyɛ a sɛ atamfo tow biribi bɔ ne tsir a onnkepira. Hɛn so yɛnye Satan ridzi ako, ntsi ɔsɛ dɛ yɛbɔ hɛn nsusui ho ban. Ɔdze ndzɛmba pii sɔ hɛn hwɛ mbrɛ ɔbɛyɛ a ɔbɛsɛɛ hɛn adwen. Dɛ mbrɛ dadzekyɛw bɔ sordaanyi bi ne tsir ho ban  no, dɛmara na enyidado a yɛwɔ no bɔ hɛn nsusui ho ban mbrɛ ɔbɛyɛ a yɛbɔkɔ do edzi Jehovah nokwar.

9. Hɔn a wonnyi enyidado biara no, wɔyɛ hɔn adze dɛn?

⁹ Enyidado a yɛwɔ dɛ yebenya onnyiewiei nkwa no boa hɛn ma yesisi gyinae a nyansa wɔ mu. Naaso, sɛ yɛma enyidado yi ano brɛ adze na yɛhyɛ ase dwen dza yɛpɛ wɔ asetsena mu nkotsee ho a, obotum ama yeeyi hɛn adwen efi onnyiewiei nkwa a yebenya no do. Hom mma yɛnhwɛ Christianfo binom a nna wɔwɔ tsetse kurow Corinth no. Nna Nyankopɔn dze adze tsitsir bi abɔ hɔn anohoba, ɔno nye owusoɛr no. Naaso wɔmaa owusoɛr no ho enyidado a wɔwɔ no ano brɛɛ adze. (1 Cor. 15:12) Hɔn a wonnyi daakye ho enyidado biara no, Paul kaa dɛ hɔndze ara nye dɛ wobedzidzi na wɔaanom. (1 Cor. 15:32) Ndɛ so, nyimpa pii a wonnyi enyidado biara wɔ Nyankopɔn n’anohoba mu no, dɛmara na wɔyɛ hɔn adze. Biribiara a wosusu dɛ ɔbɛma hɔn enyi agye no, ɔno ara na wɔyɛ. Naaso hɛn dze, yɛwɔ enyidado wɔ owusoɛr a Nyankopɔn dze abɔ hɛn anohoba no mu. Enyidado a yɛwɔ no tse dɛ dadzekyɛw a ɔbɔ hɛn nsusui ho ban. Afei so ɔboa hɛn ma yɛnnyɛ ndzɛmba a ɔbɛsɛɛ ebusuabɔ a yɛnye Jehovah wɔ no.​—1 Cor. 15:33, 34.

10. Ebɛn kwan do na enyidado a yɛwɔ no botum abɔ hɛnho ban efi nsusui a ɔnntsen ho?

¹⁰ Enyidado a yɛwɔ no botum so abɔ hɛn nsusui ho ban amma yeennya adwen dɛ yerunntum nnyɛ adze a ɔbɛma Jehovah agye hɛn ato mu da. Dɛ nhwɛdo no, binom botum aka dɛ: ‘Emi paa, dɛ mibenya onnyiewiei nkwa dze, ɔnnyɛ nokwar koraa. Mfaso biara nnyi mo do. Murunntum nnyɛ adze a ɔbɛma Nyankopɔn agye me ato mu da.’ Sɛ yɛbɛkaa a, nsɛm a ɔtsetse dɛmara na Job ne nyɛnko Eliphaz kekaa kyerɛɛ Job. Eliphaz kaa dɛ: ‘Dasanyi nye woana na no ho bɛtsew?’ Ɔtoaa do kaa Nyankopɔn ho asɛm dɛ: “Hwɛ, ɔmmfa [no] werɛ nnhyɛ n’akrɔnkrɔmfo mu; nyew, sorsor mpo ho nntsew wɔ n’enyi do.” (Job 15:14, 15) Nna nsɛm yi nnyɛ nokwar koraa! Ma ɔntsena w’adwen mu dɛ Satan pɛ dɛ inya adwen a ɔtse dɛm. Onyim dɛ sɛ ekɔ do nya adwen a ɔtse dɛm a, enyidado a ewɔ no ano bɛbrɛ adze. Ntsi, pow nsusui a ɔtse dɛm, na kɔ do dwendwen Jehovah n’anohoba ahorow ho. Jehovah pɛ paa dɛ inya onnyiewiei nkwa na ɔbɔboa wo ma wo nsa aka. Mma w’adwen mu nnyɛ wo konsee wɔ dɛm nokwasɛm yi ho da.​—1 Tim. 2:3, 4.

11. Aber a yɛrotweɔn dɛ enyidado a yɛwɔ no bɛba mu no, ebɛnadze ntsi na ɔwɔ dɛ yenya abotar?

¹¹ Enyidado a yɛwɔ no, ɔnnyɛ aber nyinara na ɔyɛ mberɛw dɛ yɛbɛhyɛ mu dzen. Yebotum atse nka dɛ Nyankopɔn akyɛr dodow dɛ ɔbɛma n’anohoba ahorow no aba mu. Ɔsɛ dɛ ɔtsena hɛn adwen mu dɛ Jehovah atsena ase fi tsetseetse na ɔbɔkɔ do atsena ase afebɔɔ. Ntsi dza yesusu dɛ akyɛr no, Jehovah n’enyi do dze, ɔnnkyɛree koraa. (2 Pet. 3:8, 9) Dza Jehovah aka nyinara ɔbɛma wɔaba mu wɔ ber a ɔfata mu, naaso bi a ɔnnyɛ ber a yɛhwɛ kwan no na ɔbɛma aba mu. Enyidado a yɛwɔ no, ebɛnadze na obotum aboa hɛn ama yaakɔ do ahyɛ mu dzen na yeenya abotar atweɔn ekesi dɛ Nyankopɔn n’anohoba ahorow bɛba mu?​—Jas. 5:7, 8.

12. Dɛ mbrɛ Hebrewfo 11:1, 6 kyerɛ no, ebɛn kwan do na Bible no ma yehu dɛ enyidado nye gyedzi nam?

¹² Enyidado a yɛwɔ no, Jehovah na ɔbɛma wɔaba mu, ntsi sɛ yɛkɔ do twe bɛn no a, yebotum ahyɛ enyidado a yɛwɔ no mu dzen. Nokwasɛm nye dɛ Bible no ma yehu dɛ enyidado nye gyedzi nam. Sɛ yɛwɔ enyidado a, ɔbɛma yɛagye edzi dɛ Jehovah wɔ hɔ na “ɔyɛ hɔn a wɔhwehwɛ n’ekyir kwan no katuafo.”  (Kenkan Hebrewfo 11:1, 6.) Sɛ yɛgye dzi paa dɛ Jehovah wɔ hɔ a, enyidado a yɛwɔ dɛ ɔbɛyɛ dza ɔaka biara no, yɛbɛhyɛ mu dzen. Hom mma yɛnhwɛ akwan a yebotum afa do ahyɛ ebusuabɔ a yɛnye Jehovah wɔ no mu dzen, nye mbrɛ dɛm a yɛbɛyɛ no bɛhyɛ enyidado a yɛwɔ no mu dzen.

13. Ebɛn ndzɛmba na yɛyɛ a ɔbɛma yɛabɛn Nyankopɔn?

¹³ Bɔ Jehovah mpaa na sua n’Asɛm no. Ɔwɔ mu dɛ yɛmmfa hɛn enyi nnhu Jehovah dze, naaso yebotum abɛn no. Sɛ yɛbɔ no mpaa a, yɛwɔ awerɛhyɛmu dɛ otsie hɛn. (Jer. 29:11, 12) Hɛn so yetsie Nyankopɔn aber a yɛkenkan Bible no na yɛdwendwen ho no. Sɛ yesua mbrɛ Jehovah sii hwɛɛ n’asomfo anokwafo a wɔtsenaa ase wɔ tsetse mber mu no ho adze a, ɔbɛma enyidado a yɛwɔ no akɔ do ayɛ kɛse. Biribiara a ɔwɔ Bible mu no, “wɔkyerɛwee maa hɛn nkyerɛkyerɛ, ama ɔnam abotar na Kyerɛwnsɛm n’awerɛkyekye do yeenya enyidado.”​—Rom. 15:4.

14. Ebɛnadze ntsi na ɔsɛ dɛ yɛdwendwen dza Jehovah ayɛ ama afofor no ho?

¹⁴ Dwendwen mbrɛ Jehovah esi ama no bɔhyɛ aba mu no ho. Ma yɛmfa dza Jehovah yɛe maa Abraham na Sarah no dɛ nhwɛdo. Nna woenyin dodow ma dɛm ntsi worunntum nnwo. Naaso Jehovah hyɛɛ hɔn bɔ dɛ wɔbɔwo. (Gen. 18:10) Abraham yɛɛ n’adze dɛn wɔ bɔ a Jehovah hyɛe no ho? Bible no ka dɛ, Abraham nyaa ‘enyidado na ɔgyee dzii dɛ ɔbɛyɛ aman pii hɔn egya.’ (Rom. 4:18) Nyimpa enyi do dze, nna enyidado biara nnyi hɔ mma no, naaso ɔgyee Jehovah dzii dɛ ɔbɛyɛ dza ɔaka no. Jehovah amma dɛm ɔbarimba nokwafo yi nsa ennsi famu da! (Rom. 4:19-21) Kyerɛwtohɔ ahorow a ɔtsetse dɛm no boa hɛn ma yenya awerɛhyɛmu dɛ aber nyina Jehovah bɛyɛ dza ɔaka no. Sɛ yesusu dɛ dza Jehovah aka no runntum mmba mu a, ɔsɛ dɛ yenya awerɛhyɛmu dɛ ɔbɛyɛ dza ɔaka no.

15. Ebɛnadze ntsi na ɔsɛ dɛ yɛdwendwen dza Jehovah ayɛ ama hɛn no ho?

 ¹⁵ Dwendwen dza Jehovah ayɛ ama wo no ho. Bible no ma yehu Nyankopɔn no bɔhyɛ ahorow a aba mu no. Ibotum adwendwen mbrɛ dɛm bɔhyɛ ahorow yi aboa wo no ho. Dɛ nhwɛdo no, Jesus hyɛɛ bɔ dɛ n’Egya dze dza ihia wɔ asetsena mu no bɛma wo. (Matt. 6:32, 33) Jesus asan ama wo awerɛhyɛmu dɛ, sɛ eserɛ Jehovah hɔ sunsum krɔnkrɔn a, ɔdze bɛma wo. (Luke 11:13) Jehovah edzi bɔhyɛ ahorow a ɔtse dɛm yi do. Ibotum adwendwen bɔhyɛ ahorow a ɔama aba mu wɔ w’asetsena mu ho. Dɛ nhwɛdo no, ɔahyɛ wo bɔ dɛ ɔdze wo bɔn bɛkyɛ wo, ɔbɛkyekye wo werɛ na ɔbɛma wo dza ihia biara ama enye no ntamu ebusuabɔ no mu aakɔ do ayɛ dzen. (Matt. 6:14; 24:45; 2 Cor. 1:3) Sɛ edwendwen dza Jehovah ayɛ ama wo no ho a, ɔbɛma agye edzi paa dɛ dza ɔaka dɛ ɔbɛyɛ ama wo daakye no so ɔbɛyɛ.

16. Ebɛnadze ntsi na enyidado a yɛwɔ no yɛ akyɛdze a ɔsom bo?

¹⁶ Onnyiewiei nkwa ho enyidado a yɛwɔ no yɛ akyɛdze a ɔsom bo a Nyankopɔn dze ama hɛn. Yɛdze enyigye rohwɛ daakye papabi kwan, na yenyim dɛ mbrɛ ɔtse biara so ɔbɛba. Enyidado a yɛwɔ no tse dɛ sekyɛ. Ɔboa hɛn ma yegyina pintsinn ber a yerihyia nsɔhwɛ na ɔtaa no. Afei so, ɔboa hɛn ma yegyina owu mpo ano. Enyidado a yɛwɔ no tse dɛ dadzekyɛw so. Ɔbɔ hɛn nsusui ho ban ma yɛtwe hɛnho fi bɔn ho na yɛyɛ dza ɔtsen. Hɛn enyidado a ogyina Bible do no twe hɛn bɛn Nyankopɔn na ɔma yehu ɔdɔ kɛse a ɔwɔ ma hɛn no. Sɛ yɛkɔ do hyɛ enyidado a yɛwɔ no mu dzen a, yenya do mfaso paa.

17. Ebɛnadze ntsi na enyidado a yɛwɔ no ma yedzi dɛw?

¹⁷ Ɔsomafo Paul hyɛɛ Romefo no nkuran wɔ ne krataa a ɔkyerɛwee kɛmaa hɔn no mu. Ɔkaa kyerɛɛ hɔn dɛ: “Hom ndzi dɛw wɔ enyidado mu.” (Rom. 12:12) Nna Paul botum edzi dɛw, osiandɛ nna onyim dɛ sɛ odzi Jehovah nokwar kesi ewiei a, obenya onnyiewiei nkwa wɔ sor. Hɛn so, enyidado a yɛwɔ no botum ama yeedzi dɛw, osiandɛ yɛgye dzi paa dɛ Jehovah bedzi no bɔhyɛ nyinara do. Ɔdwontofo no kaa dɛ: ‘Enyigye nye nyia n’enyidado wɔ Jehovah ne Nyankopɔn mu, nyia odzi nokwar daa no.’​—Ndw. 146:5, 6.