1. Nyimpa piinara yɛ hɔn adze dɛn wɔ nyansa a ɔretsea mu no ho? (Mbɛbusɛm 1:20, 21)

 AMAN pii mu no, yɛtaa hu dɛ hɛn nuanom gyinagyina mbea ahorow a nkorɔfo dzi hɔ akɔnaaba. Ebɔhwɛ no nna wɔdze enyigye rema nkorɔfo nwoma. Ana edze woho ahyɛ asɛnka edwuma no ne fa a ɔyɛ enyigye yi mu pɛn? Sɛ dɛm a, ɔda edzi dɛ esusu asɛm bi a ɔwɔ Mbɛbusɛm nwoma no mu ho. Ɔfa nyansa a ɔtsea mu wɔ abɔntsen do mbrɛ ɔbɛyɛ a nkorɔfo bɛtse ne ndze ho. (Kenkan Mbɛbusɛm 1:20, 21.) Sɛ yɛkenkan Bible no nye asafo nwoma a, yebohu “nyansa.” Ɔnnyɛ nyansa biara kɛkɛ o, mbom nyansa a ofi Jehovah hɔ. Dɛm nyansa yi nye adze a nkorɔfo hia mbrɛ ɔbɛyɛ a wobotum ayɛ dza ɔbɛma woenya onnyiewiei nkwa. Dɛm ntsi sɛ yɛma obi nwoma na ɔkenkan a, hɛn enyi gye. Naaso nnyɛ nyimpa nyina na wɔyɛ dɛm. Binom wɔ hɔ a, hɔn enyi nngye dza Bible ka no ho. Binom so dze, wodzi hɛnho fɛw. Wɔka dɛ Bible no etwa mu. Afofor so kasa tsia Nyankopɔn ne mbra a ɔfa abrabɔ ho no, na wɔka dɛ hɔn a wɔdze yɛ edwuma no hɔn tsirmu yɛ dzen na wɔyɛ hɔnho dɛ atseneneefo. Iyi nyina ekyir no, osiandɛ Jehovah dɔ hɛn ntsi, ɔmmfa ne nyansaa no mmbɔ obiara etsirmɔdzen. Ebɛn kwan do na Jehovah yɛ dɛm?

2. Henfa na yebenya nyansa a ofi Jehovah hɔ no, na nyimpa pii yɛ hɔn adze dɛn wɔ ho?

² Bible no nye kwan kor a Jehovah fa do ma nkorɔfo tse ne nyansaa ho asɛm. Nyimpa dodow no ara wɔ Bible no bi. Hɛn nwoma ahorow a ɔkyerɛkyerɛ Bible mu no so ɛ? Jehovah no mboa do no, yeetum akyerɛ hɛn nwoma ahorow no ase akɔ kasa bɔbor 1,000 mu. Hɔn a wɔkenkan na wɔdze no mu nsɛm yɛ edwuma no, wonya do mfaso. Naaso awerɛhosɛm nye dɛ nyimpa  pii ayɛ hɔn adwen dɛ worinntsie Jehovah. Sɛ ɔba no dɛ worisisi gyinae a, wɔdze hɔnho to hɔnankasa hɔn nyansaa do anaa dza afofor bɛka akyerɛ hɔn no do. Hɛndze, yɛdze Bible mu asɛm bɔ hɛn bra, ntsi wommbu hɛn hwee. Adzesua yi bɛma yeehu siantsir a nyimpa binom yɛ hɔn adze dɛm. Naaso, hom mma yendzi kan nhwɛ ndzɛmba a yɛyɛ a ɔbɛma yeenya Jehovah ne nyansaa no bi.

3. Sɛ yebotum ada nyansa a ofi Jehovah hɔ edzi a, ebɛnadze na ɔsɛ dɛ yɛyɛ?

³ Yebotum akyerɛ nyansa ase dɛ, yɛdze nyimdzee a yɛwɔ no besisi gyinae pa. Naaso nyansa a ofi Jehovah hɔ no kɔ ekyir sen dɛm. Bible no ka dɛ: ‘Jehovah no ho suro nye nyansa ahyɛse: Krɔnkrɔnnyi no ho nyimdzee nye ntseasee.’ (Mbɛ. 9:10) Sɛ yeribesi gyinae bi a no ho hia a, ɔsɛ dɛ yenya Jehovah n’adwen wɔ asɛm no ho, kyerɛ dɛ, ɔsɛ dɛ “Krɔnkrɔnnyi no ho nyimdzee” na ɔboa hɛn ma yesi dɛm gyinae no. Sɛ yesua Bible nye asafo nwoma ahorow a ɔbɔboa hɛn ma yeetum ayɛ dɛm. Sɛ yɛyɛ dɛm a, nna yɛreda nyansa a ofi Jehovah hɔ edzi.​—Mbɛ. 2:5-7.

4. Jehovah nkotsee na obotum ama yeehu nyansa ankasa. Ebɛnadze ntsi a?

⁴ Jehovah nkotsee na obotum ama yeehu nyansa ankasa. (Rom. 16:27) Ebɛnadze ntsi na Jehovah hɔ na nyansa fi? Odzi kan, Jehovah nye Ɔbɔadze no, ntsi ndzɛmba a ɔabɔ nyinara onyim no ho nsɛm nyina. (Ndw. 104:24) Otsia ebien, ndzɛmba a Jehovah yɛ no ma yehu dɛ onyim nyansa paa. (Rom. 11:33) Otsia ebiasa, hɔn a wɔdze Jehovah n’afotu yɛ edwuma no, aber nyina osi hɔn yie. (Mbɛ. 2:10-12) Sɛ yebotum enya Jehovah hɔ nyansa a, ɔsɛ dɛ yɛgye dɛm ndzɛmba ebiasa a yɛaka ho asɛm yi to mu, na yɛdze yɛ edwuma wɔ hɛn asetsena mu nye ber a yɛpɛ dɛ yesisi gyinae no.

5. Sɛ nkorɔfo anngye annto mu dɛ Jehovah na nyansa fi no hɔ a, ebɛnadze na ofi mu ba?

⁵ Nyimpa pii a wɔwɔ wiadze yi mu no gye to mu dɛ abɔdze yɛ nwanwa. Naaso wɔnngye nndzi dɛ Ɔbɔadze bi wɔ hɔ, mbom wɔka dɛ abɔdze nam adandandzi do na ɔbae. Binom so dze, wɔka dɛ wɔgye Nyankopɔn dzi, naaso hɔn adwen nye dɛ Nyankopɔn ne mbra a ɔwɔ Bible mu no etwa mu, dɛm ntsi wɔyɛ dza hɔnankasa wɔpɛ. Ebɛnadze na woefi dza wɔyɛ no mu aba? Ndɛ nyimpa pow nyansa a ofi Nyankopɔn hɔ no na wɔyɛ dza hɔnara wɔpɛ. Aso iyi ama ndzɛmba ayɛ yie? Ana wɔwɔ enyigye ankasa anaa daakye ho enyidado papabi? Ndzɛmba a woetwa hɛnho ehyia no ma yɛgye dzi paa dɛ Bible mu asɛm yi yɛ nokwar. Ɔka dɛ: ‘Nyansa anaa ntseasee anaa apam biara nnyi hɔ tsia Jehovah.’ (Mbɛ. 21:30) Iyi hyɛ hɛn nkuran ma yɛkɔ do serɛ Jehovah dɛ ɔmma hɛn ne nyansaa no bi! Naaso awerɛhosɛm nye dɛ binom nnyɛ dɛm. Ebɛnadze ntsi a?

6. Dɛ mbrɛ Mbɛbusɛm 1:22-25 ma yehu no, woananom na wɔpow nyansa a ofi Jehovah hɔ no?

⁶ Sɛ “nyansa tseatsea mu dzendzen wɔ ɔbrɔn do” a, nyimpa piinara bu ndua gu hɔn asomu. Nyimpakuw ebiasa na Bible no ka hɔnho asɛm dɛ wɔpow nyansa. Hɔn nye “mbatam,” “atwetwesifo” na “nkwasea.” (Kenkan Mbɛbusɛm 1:22-25.) Hom mma yɛnhwɛ suban a ɔma dɛm nkorɔfo yi pow nyansa a ofi Jehovah hɔ no. Afei so, yɛbɔhwɛ dza ɔsɛ dɛ yɛyɛ amma yeennsuasua hɔn.

7. Ebɛnadze ntsi na binom ayɛ hɔn adwen dɛ wɔbɛyɛ “mbatam”?

⁷ Sɛ wɔka “mbatam” a, wɔyɛ hɔn a hɔn adwen suar, hɔn a wɔgye asɛm biara dzi anaa  hɔn a wotum dze asɛm biara daadaa hɔn. (Mbɛ. 14:15) Yɛtaa hyia nyimpa a wɔtse dɛm wɔ asɛnka mu. Ɔwodze dwen ho hwɛ. Nyimpa ɔpepem pii na nyamesom mpanyimfo nye amanyɛfo adaadaa hɔn. Hɔn mu binom wɔ hɔ a, sɛ ekyir yi wohu dɛ nyimpa a wɔtse dɛm no adaadaa hɔn a, hɔnho dwuruw hɔn paa. Naaso hɔn a Mbɛbusɛm 1:22 ka hɔnho asɛm dɛ wɔyɛ mbatam no, hɔnara na wɔayɛ hɔn adwen dɛ, mbrɛ wɔtse no wɔpɛ no dɛmara. (Jer. 5:31) Wɔyɛ dza hɔnankasa wɔpɛ, na wɔmmpɛ dɛ wobosua Bible anaa wɔdze no mu asɛm bɔbɔ hɔn bra. Nyimpa pii yɛ hɔn adze tse dɛ maame bi a ɔwɔ Quebec, Canada a ɔmmfa ne nyamesom nndzi agor. Ɔkaa kyerɛɛ Ɔdasefo bi dɛ, “Sɛ hɛn sɔfoe daadaa hɛn a, noara n’asɛm a, na hɛndze, ɔmmfa hɛnho!” Ɔda edzi dɛ yɛmmpɛ dɛ yesuasua hɔn a wɔahyɛ da ara ayɛ hɔn adwen dɛ wɔronnhwehwɛ nokwar no!​—Mbɛ. 1:32; 27:12.

8. Sɛ yebotum enya nyansa a ofi Jehovah hɔ a, ebɛnadze na ɔsɛ dɛ yɛyɛ?

⁸ Oye paa dɛ Bible no tu hɛn fo dɛ ɔnnsɛ dɛ yɛkɔ do yɛ mbatam na mbom ɔsɛ dɛ hɛn ‘adwen mu dze, yɛyɛ dɛ hɔn a woewie nyin.’ (1 Cor. 14:20) Sɛ yebotum enya nyansa a ofi Jehovah hɔ a, ɔsɛ dɛ yɛdze Bible mu afotu bɔ hɛn bra. Sɛ yɛyɛ dɛm a, nkakrankakra no, yebohu mbrɛ Bible no besi aboa hɛn ma yeekwetsir ɔhaw ahorow na yeesisi gyinae pa. Ofi ber to ber no, ɔbɛyɛ papa dɛ yɛhwɛ mbɔdzen a yɛrobɔ wɔ iyi mu. Sɛ wɔnye hɛn esua Bible no ma mber kakra egu mu ma yɛahyɛ ase rokɔ asafo nhyiamu a, ɔsɛ dɛ yebisa hɛnho siantsir a yennhyiraa hɛnho do mmaa Jehovah na wonnumaa hɛn. Sɛ woenuma hɛn a, ana yerutu mpon wɔ mbrɛ yesi ka asɛmpa no na yɛkyerɛkyerɛ no mu? Ana gyinae ahorow a yesisi no da no edzi dɛ yɛdze Bible mu afotusɛm bɔ hɛn bra? Sɛ yɛnye afofor ridzi a, ana yɛda Christianfo su edzi kyerɛ hɔn? Sɛ yehu dɛ yɛtɔ sin wɔ beebi a, ɔsɛ dɛ yɛdwendwen Jehovah ne nkaakaasɛm a “ɔyɛ okotobonyi nyansafo” no ho.​—Ndw. 19:7.

9. Ebɛnadze na “atwetwesifo” yɛ dze kyerɛ dɛ wɔpow nyansa a ofi Jehovah hɔ no?

⁹ Kuw a otsia ebien a wɔpow nyansa a ofi Jehovah hɔ nye “atwetwesifo.” Ɔyɛ a, yehyia dɛm nkorɔfo yi aber a yɛnam asɛnka mu no. Dza hɔn enyi gye ho ara nye dɛ wɔbɛserew nkorɔfo. (Ndw. 123:4) Bible no kae too hɔ dɛ, nda a odzi ekyir no mu no, hɔn a wosi atwetwe bɔdɔɔ so. (2 Pet. 3:3, 4) Ndɛ nyimpa binom yɛ hɔn adze tse dɛ ɔtseneneenyi Lot ne nsewnom no, wonntsie kɔkɔbɔ a ofi Nyankopɔn hɔ no. (Gen. 19:14) Hɔn a wɔdze Bible mu afotusɛm bɔ hɔn bra no, nyimpa pii serew hɔn. Wɔyɛ dɛm osiandɛ wɔpɛ dɛ wodzi “hɔnara hɔn emumuyɛ akɔndɔ ekyir.” (Jude 7, 17, 18) Mbrɛ Bible no si ka atwetwesifo ho asɛm no, dɛmara so na awaafo na hɔn a wɔapow Jehovah no so tse!

10. Dɛ mbrɛ Ndwom 1:1 kyerɛ no, ebɛnadze na ɔsɛ dɛ yɛyɛ amma yaannyɛ hɛn adze tse dɛ atwetwesifo?

¹⁰ Ebɛnadze na ɔsɛ dɛ yɛyɛ amma yaannyɛ hɛn adze tse dɛ hɔn a wɔserew nkorɔfo? Adze kor a ɔbɔboa hɛn nye dɛ, hɔn a biribiara wobenya ho asɛm aka no, ɔnnsɛ dɛ yɛnye hɔn bɔ. (Kenkan Ndwom 1:1.) Iyi kyerɛ dɛ, ɔnnsɛ dɛ yetsie anaa yɛkenkan awaafo hɔn nsɛm. Ɔsɛ dɛ yɛyɛ ahwɛyie na hɛn adwen mu annyɛ hɛn konsee wɔ Jehovah nye akwankyerɛ a n’ahyehyɛdze no dze ma hɛn no ho, na yaannkasa enntsia. Sɛ yebotum ekwetsir esian a ɔtse dɛm a, ɔsɛ dɛ yebisa hɛnho dɛ: ‘Sɛ wɔdze akwankyerɛ anaa ntseasee fofor bi ba a, ana metaa nya ho asɛm ka? Ɔyɛ a medze m’adwen si hɔn a wodzi ndzɛmba enyim no hɔn sintɔ do?’ Sɛ yehu biribi a ɔtse dɛm wɔ hɛnho na yɛyɛ nsesa ntsɛmara a, Jehovah bɛgye hɛn ato mu.​—Mbɛ. 3:34, 35.

11. “Nkwasea” bu Jehovah ne mbra a ɔfa abrabɔ ho no dɛn?

 ¹¹ Kuw a otsia ebiasa a wɔpow nyansa a ofi Jehovah hɔ nye “nkwasea.” Wɔfrɛ hɔn nkwaseafo osiandɛ wɔmmfa Nyankopɔn ne mbra mmbɔ hɔn bra. Dza ɔtsen wɔ hɔnara hɔn enyi do na wɔyɛ. (Mbɛ. 12:15) Dɛm nkorɔfo yi pow Jehovah a ɔyɛ nyansa Fibea no. (Ndw. 53:1) Sɛ yehyia hɔn wɔ asɛnka mu a, wɔtaa kasa tsia hɛn dzendzenndzen dɛ yɛdze Bible mu afotusɛm bɔ hɛn bra. Naaso worunntum nnyɛ biribi papa biara mma hɛn. Bible no ka dɛ: “Nyansa krɔn bor ɔkwasea do dodow: ommbue n’ano wɔ kuropon ano.” (Mbɛ. 24:7) Nkwasea nnyi nyansasɛm biara ka kyerɛ hɛn. Ɔnnyɛ nwanwa dɛ Jehovah bɔ hɛn kɔkɔ dɛ “fi ɔkwasea n’enyim kɔ”!​—Mbɛ. 14:7, Baebor.

12. Ebɛnadze na ɔbɔboa hɛn na yaannyɛ hɛn adze dɛ nkwaseafo?

¹² Yɛnntse dɛ hɔn a wonntsie Jehovah n’afotu no. Hɛn dze, hɛn enyi gye ho dɛ yebohu Jehovah n’adwen wɔ ndzɛmba ho. Na ne mbra so, hɛn enyi gye ho papaapa. Sɛ yebotum ama enyigye a ɔtse dɛm aayɛ kɛse a, ɔsɛ dɛ yɛdze mfaso a yenya ber a yedzi Jehovah ne mbra do no toto ɔhaw a yehyia ber a yebu ne mbra do no ho. Hɔn a wonntsie afotu pa a Jehovah dze ma no, susu ɔhaw ahorow a wohyia no ho. Afei, hwɛ mbrɛ w’asetsena kɔ yie osiandɛ eyɛ setsie ma Jehovah no.​—Ndw. 32:8, 10.

13. Ana Jehovah hyɛ hɛn dɛ yɛmfa n’afotu nyɛ edwuma?

¹³ Jehovah mmfa nyansa a ofi sor no nnkam obiara, naaso ɔnnhyɛ obiara dɛ ɔmfa nyɛ edwuma. Hɔn a wɔmmfa nyansa a ɔdze ma no nnyɛ edwuma no, ɔma wohu dza ɔbɔto hɔn. (Mbɛ. 1:29-32) Hɔn a wonntsie Jehovah no, wobotwa “hɔnankasa kwan do aba.” Hɔn a wɔtse dɛm no fa yaw na amandzehu pii mu wɔ hɔn asetsena mu na ewiei koraa no Jehovah bɛsɛɛ hɔn. Naaso hɔn a wotsie afotu pa a Jehovah dze ma na wɔdze yɛ edwuma no, Jehovah ma hɔn awerɛhyɛmu bi. Ɔno nye dɛ: “Obiara a obetsie me no, ɔbɛtsena hɔ sɔkyee, na no ho adwe no dɛ onnkosuro mbusu.”​—Mbɛ. 1:33.

14-15. Ebɛnadze na yebotum esua efi Mbɛbusɛm 4:23 no mu?

¹⁴ Sɛ yɛdze nyansa a Jehovah dze ma hɛn no yɛ edwuma a, yenya do mfaso aber nyina. Adzesua yi ama yeehu dɛ Jehovah mmfa ne nyansaa no nnkam obiara. Dɛ nhwɛdo no, yenya afotu a onntwa mu da wɔ Mbɛbusɛm nwoma no mu. Sɛ yɛdze afotu a ɔtse dɛm no yɛ edwuma a, yenya do mfaso aber nyina. Hom mma yensusu afotu no mu anan pɛ ho.

¹⁵ Bɔ w’akoma ho ban. Bible no ka dɛ: ‘Fa mbɔdzen nyinara kora w’akoma do; na no mu na nkwa pue fi ba.’ (Mbɛ. 4:23) Hom mma yɛnhwɛ dza yɛyɛ dze bɔ akoma a ɔda hɛn mu no ho ban. Ɔsɛ dɛ yedzi edziban a ahoɔdzen wɔ mu, yɛtsentsen hɛn apɔw mu na yekwetsir ndzeyɛɛ bi a obotum ahaw akoma no.  Yebotum so ayɛ biribi a ɔtse dɛm dze abɔ akoma a Bible no ka ho asɛm no ho ban. Ɔsɛ dɛ yesua Nyankopɔn n’Asɛm no dabaa. Afei so, ɔsɛ dɛ yesiesie hɛnho ana yaakɔ asafo nhyiamu, na sɛ yɛkɔ so a, ɔsɛ dɛ yɛma mbuae. Bio so, ɔsɛ dɛ yɛyer hɛnho yɛ asɛnka edwuma no mu. Iyi da nkyɛn a, ɔwɔ dɛ yekwetsir suban bɔn biara. Sɛ yebotum ayɛ dɛm a, biribiara a ɔbɛma yeenya nsusui bɔn no, ɔwɔ dɛ yɛtwe hɛnho fi ho koraa. Bi nye enyigyedze a ɔbrafi wɔ mu nye fɛkuw bɔn.

16. Ebɛnadze ntsi na sɛ yɛdze Mbɛbusɛm 23:4, 5 yɛ edwuma ndɛ a, ɔbɔboa hɛn?

¹⁶ Ma w’enyi nsɔ dza ewɔ no. Bible no ka dɛ: “Mma mmfona woho dɛ ebɛyɛ ɔhonyanyi; . . . Ana edze w’enyiwa besi dza onnyi hɔ do? Na ampaara dɛ ahonya fuw atsaban dɛ ɔkɔr a otu fa sor.” (Mbɛ. 23:4, 5) Ahonyadze na sika nntsena hɔ daa. Naaso awerɛhosɛm nye dɛ, ndɛ esikafo na ehiafo nyinara dza osi hɔn enyi do ara nye dɛ wobenya sika pii. Iyi ntsi wɔtaa yɛ ndzɛmba a ɔma nkorɔfo bɔ hɔn dzin bɔn nye ndzɛmba a ɔsɛɛ anyɛnkofa a wɔnye afofor wɔ no. Afei so, wɔyɛ ndzɛmba mpo a ɔbɔ hɔn yarba. (Mbɛ. 28:20; 1 Tim. 6:9, 10) Naaso nyansa a yɛbɛda no edzi no bɔboa hɛn amma yaammfa hɛn adwen nyina ennsi sika do. Sɛ yɛammfa hɛn adwen nyina ennsi sika do a, hɛn enyi remmber adze. Afei so, hɛn enyi bɔsɔ dza yɛwɔ no na hɛn enyi bɛgye.​—Ɔsɛnk. 7:12.

17. Dɛ mbrɛ wɔaka wɔ Mbɛbusɛm 12:18 no, yebesi dɛn enya “onyansafo ne tɛkyerɛma”?

¹⁷ Dwen ansaana akasa. Sɛ yɛannhwɛ yie a, yebotum aka nsɛm ma epira afofor. Bible ka dɛ: ‘Obi wɔ hɔ a otu nsɛm bumbum dɛ nkrantsee no nwowɔe: na onyansafo ne tɛkyerɛma dze, apɔwmudzen a.’ (Mbɛ. 12:18) Sɛ yebotum ama asomdwee atsena yɛnye afofor ntamu a, ɔnnsɛ dɛ yɛkeka hɔnho nsɛm bɔn kyerɛ nkorɔfo. (Mbɛ. 20:19) Mbrɛ ɔbɛyɛ a yɛrennka nsɛm a ɔbɛhaw hɛn nuanom no, ɔsɛ dɛ yɛkenkan Nyankopɔn n’Asɛm no na yɛdwendwen ho dabaa. (Luke 6:45) Sɛ yɛdwendwen dza Bible ka no ho a, ɔbɔboa hɛn ma hɛn kasaa aayɛ dɛ “nyansa no nsunyiwa” na ɔbɛma nkorɔfo ho adwe hɔn.​—Mbɛ. 18:4.

18. Sɛ yɛdze Mbɛbusɛm 24:6 yɛ edwuma a, ebɛn kwan do na ɔbɔboa hɛn wɔ asɛnka edwuma no mu?

 ¹⁸ Fa akwankyerɛ yɛ edwuma. Bible no ma hɛn afotu pa bi. Ɔka dɛ: ‘Nyansa apam na edze bɔkɔ wo ko, na afotufo dodow mu na konyimdzi wɔ.’ (Mbɛ. 24:6) Sɛ yɛdze dɛm afotu yi yɛ edwuma a, ɔma yetum kyerɛkyerɛ na yɛka asɛmpa no yie. Ma yɛnhwɛ siantsir a ɔtse dɛm. Yɛdze akwankyerɛ a wɔdze ma hɛn wɔ asɛnka edwuma no ho no yɛ edwuma na yɛnnyɛ dza hɛnankasa yɛpɛ. Hɛn nsa ka akwankyerɛ pa wɔ hɛn Christianfo nhyiamu ase. Sɛ yɛkɔ hɔ a, hɛn nuanom a hɔnho akokwaa ma Bible mu ɔkasa na wɔyɛ dwumadzi ahorow ma yesua biribi fi mu. Iyi da nkyɛn a, Jehovah n’ahyehyɛdze no ma hɛn edwindadze ahorow a ɔboa nkorɔfo ma wɔtse Bible no ase. Dɛm edwindadze ahorow yi bi nye hɛn nwoma nye video ahorow no. Ana irusua kwan pa a ibotum afa do dze dɛm edwindadze ahorow yi edzi dwuma?

19. Etse nka dɛn wɔ nyansa a Jehovah dze ma no ho? (Mbɛbusɛm 3:13-18)

¹⁹ Kenkan Mbɛbusɛm 3:13-18. Yɛda Jehovah ase paa dɛ ɔama hɛn afotu a no mu da hɔ wɔ n’Asɛm Bible no mu. Sɛ nnyɛ dɛm afotu yi a yɛdze bɔ hɛn bra a, nkyɛ yɛwɔ hen? Adzesua yi mu no, yɛahwɛ afotu pa ahorow a ɔwɔ Mbɛbusɛm nwoma no mu. Sɛ Mbɛbusɛm nwoma no da nkyɛn a, Jehovah ama hɛn afotu pii wɔ Bible mu nwoma a aka no so mu. Hom mma yensi hɛn bo aber nyina dɛ yɛdze nyansa a ofi Jehovah hɔ no bɔbɔ hɛn bra. Nyimpa pii a wɔwɔ wiadze yi mu no mmbu nyansa a ofi Nyankopɔn hɔ no, naaso hɛn dze, yɛgye dzi paa dɛ “obiara a ɔkora [nyansa]” do no, n’enyi bɛgye!