1-2. (a) Ebɛnadze na ɔboa hɛn ma yɛkɔ do gyina ɔhaw ano da biara? Kyerɛkyerɛ mu. (b) Ebɛnadze na yebosusu ho wɔ adzesua yi mu?

“SƐ MODWENDWEN ɔhaw a mafa mu no ho a, dza muhu nye dɛ sɛ nna Jehovah nnka moho a nkyɛ ɔrennyɛ yie da.” Ana ehyia ɔhaw ma akã asɛm a ɔtse dɛm pɛn? Hɛn mu pii akã asɛm a ɔtse dɛm pɛn. Bi a ekãa dɛm ber a igyinaa yarba bi a no mu yɛ dzen anaa wo dɔfo bi no wu ho yaw ano. Sɛ ehwɛ ɔhaw a ihyiae no a, itum hu dɛ adze kor pɛ na ɔboaa wo ma itumii gyinaa ɔhaw no ano da biara da. Ɔno nye dɛ, Jehovah no sunsum krɔnkrɔn maa wo “tum no ne kɛseyɛ a ɔtra do.”​—2 Cor. 4:7-9.

² Sɛ iyi da nkyɛn a, yehia sunsum krɔnkrɔn ama yaakõ etsia nhyɛdo a wiadze yi dze ba hɛn do no. (1 John 5:19) Nkyii so, yehia ahoɔdzen ama yeetum nye ‘emumuyɛ esunsum’ edzi esi. (Eph. 6:12) Afei, hom mma yɛnhwɛ akwan ebien a sunsum krɔnkrɔn fa do boa hɛn ma yegyina ɔhaw a ɔtsetse dɛm ano. Iyi ekyir no, yɛbɔhwɛ dza yebotum ayɛ ama yeenya sunsum krɔnkrɔn no mboa kɛse.

3. Ebɛn kwan kor na Jehovah fa do boa hɛn ma yegyina ɔhaw ano?

³ Ɔkwan a Jehovah no sunsum krɔnkrɔn fa do boa hɛn nye dɛ, ɔma yenya ahoɔdzen dze yɛ biribiara a ohia dɛ yɛyɛ ɔmmfa ho ɔhaw a yehyia. Ɔsomafo Paul hun dɛ, osiandɛ ɔdze noho too “Christ ahoɔdzen” do ntsi, nna otum kɔ do som Jehovah ɔmmfa ho ɔhaw a ohyia no. (2 Cor. 12:9) Paul n’asɛmpatserɛw akwantu a otsĩa ebien mu no, ɔdze ber pii kãa asɛm no. Ber kor no ara so, ɔyɛɛ honam afamu edwuma dze hwɛɛ noho. Ɔtsenaa Aquila na Priscilla hɔn fie wɔ Corinth. Nna wɔyɛ ntamadanyɛfo. Nna Paul so wɔ nsaanodwuma a ɔtse dɛm, ntsi nda bi wɔ hɔ a, nna ɔnye hɔn bɔ mu yɛ edwuma. (Andw. 18:1-4) Sunsum krɔnkrɔn maa Paul nyaa  ahoɔdzen ma ɔdze yɛɛ honam afamu edwuma na ɔdze kãa asɛm no so.

4. Mbrɛ 2 Corinthfo 12:7b-9 kyerɛ no, ebɛn ɔhaw na Paul hyiae?

⁴ Kenkan 2 Corinthfo 12:7b-9. Dɛm kyerɛwsɛm yi mu no, Paul kãa dɛ ɔwɔ “honam mu nsoɛ.” Nna ɔrepɛ akyerɛ dɛn? Sɛ nsoɛ bi hyɛ wo honam mu a, hwɛ amandze ara a ibohu! Ntsi nna Paul rekã dɛ orihyia ɔhaw bi a no mu yɛ dzen wɔ n’asetsena mu. Ɔkãa dɛ dɛm ɔhaw yi tse dɛ “Satan no bɔfoe” bi a ɔrobobɔ no “ekutuku.” Bi a ɔnnyɛ Satan na n’abɔfo bɔn no na wɔdze Paul ne haw no bae. Ntsi, ɔnnyɛ hɔn na wɔdze nsoɛ no wɔɔ Paul no honam mu. Naaso obotum aba dɛ ber a dɛm esunsum bɔn yi hun ɔhaw a Paul rihyia no, wɔmaa ɔhaw no yɛɛ kɛse paara. Nna iyi akɛyɛ tse dɛ woripia nsoɛ no do ahyɛ Paul no honam mu. Ebɛnadze na Paul bɛyɛ?

5. Ebɛn kwan do na Jehovah buaa mpaa a Paul bɔe no?

⁵ Ahyɛse no, nna Paul pɛ dɛ Jehovah yi “nsoɛ” no fi no honam mu. Paul kãa dɛ: “Meserɛɛ Ewuradze [Jehovah] mpɛn ebiasa dɛ ɔmma omfi mo do.” Naaso, ɔmmfa ho mpaa a Paul bɔe no, Jehovah ennyi nsoɛ no emmfi no honam mu. Ana iyi kyerɛ dɛ Jehovah emmbua Paul ne mpaabɔ no? Ɔnntse dɛm koraa. Obuaa mpaa a ɔbɔe no. Jehovah ennyi haw no emmfi hɔ, mbom ɔmaa Paul ahoɔdzen ma ɔdze gyinaa ano. Jehovah kãa dɛ: “M’ahoɔdzen dzi mu wɔ mberɛw mu.” (2 Cor. 12:8, 9) Ɔnam Nyankopɔn no mboa do no, Paul dze enyigye na akomatɔyamu yɛɛ no som edwuma no!​—Phil. 4:4-7.

6. (a) Ebɛn kwan do na Jehovah bobua hɛn mpaabɔ? (b) Ebɛn kwan do na kyerɛwnsɛm ahorow a ɔwɔ akenkan yi mu no hyɛ wo dzen?

⁶ Tse dɛ Paul no, ana aserɛ Jehovah dɛ onyi wo mfi ɔhaw bi mu pɛn? Bi a ifii w’akoma mu bɔɔ ho mpaa mpɛn pii, naaso ɔhaw no annkɔ anaa mpo ɔbɛyɛɛ kɛse. Ana iyi maa idzii yaw ma etsee nka dɛ Jehovah nngye wo nnto mu anaa? Sɛ dɛm a, kaa Paul n’asɛm no. Mbrɛ Jehovah buaa ne mpaabɔ no, dɛmara so na obobua wo mpaabɔ! Bi a Jehovah rinnyi wo haw no mmfi hɔ. Naaso, ɔnam sunsum krɔnkrɔn do bɛma wo ahoɔdzen a ihia no ma edze eegyina ɔhaw no ano. (Ndw. 61:3, 4) Bi a wobosun wo abɔ hɔ, naaso Jehovah rinngyaa wo da.​—2 Cor. 4:8, 9; Phil. 4:13.

7-8. (a) Ebɛn kwan do na sunsum krɔnkrɔn tse dɛ mframa? (b) Ebɛn kwan do na Peter kyerɛkyerɛɛ mbrɛ sunsum krɔnkrɔn si yɛ edwuma mu?

⁷ Ebɛn kwan fofor do na sunsum krɔnkrɔn boa hɛn? Obi a ɔka po do hɛn botum ama mframa epĩa ne hɛn no ma oeekodu beebi a ɔrokɔ no asomdwee mu, ɔmmfa ho mpo dɛ po no ayɛ begyabegya no. Dɛmara so na sunsum krɔnkrɔn botum aboa hɛn ma yaakɔ do asom Jehovah ekesi dɛ yebodu Nyankopɔn no wiadze fofor no mu, ɔmmfa ho nsɔhwɛ a yehyia.

⁸ Nna ɔsomafo Peter yɛ farnyi, dɛm ntsi nna onyim mbrɛ po do akwantu tse. Ntsi ɔnnyɛ nwanwa dɛ ber a ɔkãa mbrɛ sunsum krɔnkrɔn yɛ edwuma ho asɛm no ɔdze nkasafua a ɔfa mbrɛ po do akwantu tse dzii dwuma. Ɔkãa dɛ: “Nkɔnhyɛ bi nnduaa nyimpa pɛ do mmbaa pɛn: na nyimpa fi [Nyankopɔn] mu kasaa dɛ mbrɛ Sunsum Krɔnkrɔn kãa hɔn.” Greek kasafua a wɔkyerɛɛ ase “kãa hɔn” wɔ ha no, dza ɔkyerɛ ankasa nye dɛ ibepia biribi akɔ beebi anaadɛ ebɛma do akɔ beebi.​—2 Pet. 1:21.

9. Aber a Peter kãa dɛ Nyankopɔn dze sunsum krɔnkrɔn “kãa” Bible akyerɛwfo no, nna ebɛn mfatoho na ɔreyɛ?

⁹ Aber a Peter kãa dɛ Nyankopɔn dze sunsum krɔnkrɔn “kãa” Bible akyerɛwfo no, nna ebɛn mfatoho na ɔreyɛ? Luke, Asomafo Ndwuma ne kyerɛwfo no so dze Greek kasafua a ɔnye iyi dzi nsɛ dzii dwuma. Ɔkãa dɛ mframa ‘paar’ po do hɛn bi, kyerɛ dɛ opĩaa hɛn no. (Andw. 27:15) Osian iyi ntsi, Bible ho ɔbemfo bi kãa dɛ, aber a Peter kãa dɛ Nyankopɔn dze sunsum krɔnkrɔn “kãa” Bible akyerɛwfo no, nna Peter dze dza osi wɔ po do no reyɛ mfatoho. Ntsi, dza nna Peter rekyerɛ nye dɛ, mbrɛ mframa si pĩa po do hɛn bi  ma odu beebi a ɔrokɔ no, dɛmara so na sunsum krɔnkrɔn kyerɛɛ Bible akyerɛwfo kwan ma wɔyɛɛ hɔn edwuma. Ɔbemfo no saan so kãa dɛ nna Bible akyerɛwfo no tse dɛ po do ahɛn a “woesi hɔn abradaa.” Dza ɔkyerɛ nye dɛ nna wɔayɛ krado dɛ wɔbɛyɛ edwuma a sunsum krɔnkrɔn kyerɛɛ hɔn dɛ wɔnyɛ no. Jehovah yɛɛ n’afamu dze, ɔmaa hɔn “mframa” anaa sunsum krɔnkrɔn. Bible akyerɛwfo no so yɛɛ hɔn afamu dze. Ɔnye dɛ wodzii sunsum krɔnkrɔn n’akwankyerɛ ekyir pɛpɛɛpɛr, na wɔyɛɛ edwuma a Jehovah dze hyɛɛ hɔn nsa no.

10-11. Sɛ sunsum krɔnkrɔn bɛkyerɛ hɛn kwan a, ebɛn ndzɛmba ebien na ɔwɔ dɛ yɛyɛ? Ma ho nhwɛdo.

¹⁰ Ndɛ, Jehovah mmfa no sunsum krɔnkrɔn nnka nkorɔfo dɛ wɔnkyerɛw n’asɛm, osiandɛ wɔakyerɛw Bible no ewie. Naaso, ɔkɔ do dze no sunsum krɔnkrɔn kyerɛ n’asomfo kwan. Jehovah kɔ do yɛ n’afamu dze boa n’asomfo. Ebɛnadze na ɔwɔ dɛ yɛyɛ ama Nyankopɔn no sunsum krɔnkrɔn aakyerɛ hɛn kwan? Ɔwɔ dɛ yɛhwɛ hu dɛ yɛreyɛ hɛn afamu dze. Yebesi dɛn ayɛ dɛm?

¹¹ Ma yɛnyɛ mfatoho yi. Sɛ obi a ɔka po do hɛn pɛ dɛ mframa boa no a, ɔwɔ dɛ ɔyɛ ndzɛmba ebien. Odzi kan, ɔwɔ dɛ ɔdze hɛn no kesi beebi a mframa no wɔ, na ɔdze n’enyim dzi beebi a mframa no robɔ kɔ no. Sɛ hɛn no si mpoano, na sɛ mframa no robɔ wɔ po no do a, mframa no runntum mmpĩa hɛn no nnkɔ n’enyim. Otsĩa ebien, ɔwɔ dɛ osi abradaa no yie. Sɛ hɛn no botum akɔ n’enyim a, gyedɛ mframa kɛhyɛ abradaa no mu ma ɔyɛ huu. Sɛ ɔba no dɛm a, mframa no bepĩa hɛn no akɔ n’enyim. Dɛmara na hɛn so, sɛ yennya sunsum krɔnkrɔn no mboa a, yerunntum nnkɔ do nnsom Jehovah da. Sɛ yebenya sunsum krɔnkrɔn no mboa a, ɔwɔ dɛ yɛyɛ ndzɛmba ebien. Odzi kan, ɔwɔ dɛ yɛyɛ ndzɛmba a Nyankopɔn no sunsum kyerɛ n’asomfo kwan dɛ wɔnyɛ. Otsĩa ebien, ɔwɔ dɛ yesi hɛn “abradaa” no yie, kyerɛ dɛ, sɛ yɛreyɛ ndzɛmba a sunsum krɔnkrɔn kyerɛ hɛn dɛ yɛnyɛ no a, ɔwɔ dɛ yɛdze hɛnho hyɛ mu fee dɛ mbrɛ hɛn ahoɔdzen botum. (Ndw. 119:32) Sɛ yɛyɛ ndzɛmba ebien yi a, sunsum krɔnkrɔn bɛma hɛn ahoɔdzen ma yaakɔ do asom  Jehovah nokwar mu eekesi dɛ yebodu Nyankopɔn no wiadze fofor no mu.

12. Ebɛnadze na yerubosusu ho?

¹² Dze besi ha no, yeesusu akwan ebien a sunsum krɔnkrɔn fa do boa hɛn no ho. Sunsum krɔnkrɔn ma hɛn ahoɔdzen, na ɔboa hɛn ma yɛkɔ do dzi nokwar ber a yerihyia ɔhaw. Afei so, sunsum krɔnkrɔn kyerɛ hɛn kwan na ɔboa hɛn ma yɛyɛ edwuma a Jehovah hwehwɛ dɛ yɛyɛ, na iyi bɛma yenya nkwa a onnyi ewiei. Afei, hom mma yɛnhwɛ ndzɛmba anan a ɔwɔ dɛ yɛyɛ ama yeenya sunsum krɔnkrɔn no mboa kɛse.

13. Dɛ mbrɛ wɔakã wɔ 2 Timothy 3:16, 17 no, ebɛnadze na Kyerɛwnsɛm no botum ayɛ ama hɛn, naaso ebɛnadze na ɔwɔ dɛ yɛyɛ?

¹³ Odzi kan, sũa Nyankopɔn n’Asɛm. (Kenkan 2 Timothy 3:16, 17.) Nyankopɔn nam no sunsum do dze n’asɛm hyɛɛ Bible akyerɛwfo no hɔn adwen mu ma wɔkyerɛwee. Sɛ yɛkenkan Bible no na yɛdwendwen dza yɛakenkan no ho a, Nyankopɔn ne nkyerɛkyerɛ besian akɔ hɛn adwen na hɛn akoma mu. Nsɛm a ofi sunsum mu no bɛma yɛayɛ nsesa wɔ hɛn asetsena mu ama yaasɔ Nyankopɔn enyi. (Heb. 4:12) Naaso sɛ yebenya sunsum krɔnkrɔn no mboa kɛse a, ɔwɔ dɛ yɛgye ber sũa Bible no daa na yɛdwendwen dza yesũa no ho kɔ ekyir yie. Sɛ yɛyɛ dɛm a, Nyankopɔn n’Asɛm no bɛkyerɛ hɛn kwan wɔ hɛn kasaa na hɛn ndzeyɛɛ nyinara mu.

14. (a) Ebɛnadze ntsi na yebotum akã dɛ, sɛ yɛkɔ Christianfo nhyiamu a, nna yɛakɔ beebi a yebenya sunsum krɔnkrɔn? (b) Ebɛnadze na ɔbɔboa hɛn ama yeenya sunsum krɔnkrɔn no mboa kɛse wɔ hɛn nhyiamu ahorow ase?

¹⁴ Otsĩa ebien, yɛnye hɛn nuanom nhyia mu nsom Nyankopɔn. (Ndw. 22:22) Sɛ yɛkɔ Christianfo nhyiamu a, ɔkyerɛ dɛ yɛakɔ beebi a yebenya Jehovah no sunsum krɔnkrɔn. (Nyi. 2:29) Ebɛnadze ntsi na yɛkã dɛm? Osiandɛ sɛ yɛnye hɛn nuanom hyia mu som a, yɛbɔ mpaa serɛ sunsum krɔnkrɔn, yɛtow Ahendzi ndwom a ofi Nyankopɔn n’Asɛm mu, na yetsie Bible mu nkyerɛkyerɛ a hɛn nuanom a sunsum krɔnkrɔn apaw hɔn dze ma hɛn. Afei so, sunsum krɔnkrɔn boa hɛn nuanom mbaa no ma wosiesie hɔnho bɛyɛ dwumadzi a wɔdze ahyɛ hɔn nsa no. Naaso, sɛ yebenya sunsum krɔnkrɔn no mboa kɛse a, ɔwɔ dɛ yesiesie hɛnho yie ma asafo nhyiamu na yɛma mbuae wɔ ase. Dɛm kwan yi do no, ɔbɛyɛ tse dɛ mbrɛ yɛwɔ po do a yeesi “abradaa” wɔ po do hɛn no do. Iyi kyerɛ dɛ yɛayɛ krado dɛ yɛbɛma sunsum krɔnkrɔn akyerɛ hɛn kwan.

15. Ebɛn kwan do na sunsum krɔnkrɔn boa hɛn wɔ asɛnka edwuma no mu?

¹⁵ Otsĩa ebiasa, fa woho hyɛ asɛnka edwuma no mu. Sɛ yɛdze Bible dzi dwuma wɔ asɛmpaka nye ɔkyerɛkyerɛ edwuma no mu a, nna yɛrema sunsum krɔnkrɔn akyerɛ hɛn kwan wɔ hɛn asɛnka edwuma no mu. (Rom. 15:18, 19) Sɛ yebenya sunsum krɔnkrɔn no mboa kɛse a, ɔwɔ dɛ yɛkã asɛm no daa, na ho kwan biara a yebenya no yɛdze Bible no kyerɛkyerɛ. Sɛ yebotum nye nkorɔfo abɔ nkɔmbɔ a otu mpon wɔ asɛnka mu a, ɔkwan kor nye dɛ yɛdze mbrɛ yebotum abɔ nkɔmbɔ ho nhwɛdo a ɔwɔ Asɛnka Nye Asetsena Nhyiamu Dwumadzi Nwoma no mu no bedzi dwuma.

16. Ebɛn ɔkwan tsenn na yebotum afa do enya sunsum krɔnkrɔn?

¹⁶ Otsĩa anan, bɔ Jehovah mpaa daa. (Matt. 7:7-11; Luke 11:13) Ɔkwan tsenn a yebotum afa do enya sunsum krɔnkrɔn nye dɛ yɛbɛserɛ efi Jehovah hɔ wɔ mpaabɔ mu. Sɛ Jehovah pɛ dɛ otsie hɛn mpaabɔ a, biribiara runntum nnsiw hɛn mpaabɔ kwan dɛ obodu Jehovah nkyɛn. Dɛmara so na sɛ Jehovah kã dɛ ɔdze sunsum krɔnkrɔn bɔboa hɛn a, biribiara runntum nnsiw hɛn kwan dɛ yebenya sunsum krɔnkrɔn no mboa. Efiadze afasu akɛse anaa Satan mpo runntum nnsiw hɛn kwan. (Jas. 1:17) Ebɛn kwan do na ɔwɔ dɛ yɛbɔ mpaa ama yeenya sunsum krɔnkrɔn no mboa kɛse? Hom mma yɛnhwɛ mfatoho bi a ɔfa mpaabɔ ho a wɔayɛ ho kyerɛwtohɔ wɔ Luke  Asɛmpa no nkotsee mu. Iyi bɛma yenya asɛmbisa yi ho mbuae. *

17. Sɛ yɛhwɛ Jesus ne mfatoho a wɔayɛ ho kyerɛwtohɔ wɔ Luke 11:5-9, 13 no a, ebɛn mpaabɔ ho esuadze na yenya fi mu?

¹⁷ Kenkan Luke 11:5-9, 13. Jesus ne mfatoho no ma yehu mbrɛ yebesi abɔ mpaa aserɛ sunsum krɔnkrɔn. Ɔbarimba a wɔkãa noho asɛm wɔ mfatoho no mu no nyaa dza ɔrohwehwɛ, osian “n’anoɔdzen,” kyerɛ dɛ, kɔ a ɔkɔr do bisae ntsi. Nna ɔyɛ esuom dze, naaso ɔammpa abaw dɛ ɔbɔhwehwɛ mboa efi ne nyɛnko no hɔ. Ebɛn kwan do na Jesus dze mfatoho yi sii mpaabɔ do dua? Ɔkãa dɛ: “Hom [nkɔ do] mbisa na wɔbɛma hom; hom [nkɔ do] nhwehwɛ na hom bohu; hom [nkɔ do] mbɔ mu na wobobue ama hom.” Ntsi, ebɛn esuadze na ɔwɔ mu ma hɛn? Sɛ yebenya sunsum krɔnkrɔn no mboa a, ɔsɛ dɛ yɛkɔ do bɔ mpaa serɛ.

18. Dɛ mbrɛ Jesus ne mfatoho no kyerɛ no, ebɛnadze ntsi na yebotum enya ahotodo dɛ Jehovah dze no sunsum krɔnkrɔn bɛma hɛn?

¹⁸ Jesus ne mfatoho no so boa hɛn ma yehu siantsir a Jehovah bɛma hɛn sunsum krɔnkrɔn. Nna ɔbarimba a ɔwɔ Jesus ne mfatoho no mu no pɛ dɛ ɔhwɛ no hɔhoe no yie. Ntsi, nna ɔtse nka dɛ ɔwɔ dɛ ɔma no hɔhoe a ɔabɔsoɛ no esuom no biribi ma odzi. Naaso, nna onnyi hwee wɔ hɔ. Jesus kãe wɔ mfatoho no mu dɛ, osiandɛ ɔbarimba no kɔr do bisae ntsi, ne nyɛnko no dze paanoo no maa no. Nna Jesus pɛ dɛ ɔkyerɛ hɛn dɛn? Sɛ nyimpa a ɔtɔ sin mpo wɔ ɔpɛ dɛ ɔbɔboa ne nyɛnko a ɔkɔr do bisaa no hɔ adze no a, mpɛn dodow ahen na hɛn sor Egya a ne yamu ye no remmfa sunsum krɔnkrɔn mma hɔn a wɔkɔ do serɛ no no! Dɛm ntsi, yebotum enya ahotodo dɛ sɛ yɛkɔ do serɛ Jehovah hɔ sunsum krɔnkrɔn a, ɔdze bɛma hɛn.​—Ndw. 10:17; 66:19.

19. Ebɛnadze ntsi na yebotum enya ahotodo dɛ yebedzi konyim?

¹⁹ Yebotum enya ahotodo dɛ yebedzi konyim ɔmmfa ho mbɔdzen a Satan robɔ dɛ ɔdze hɛn ekyir bɛka famu no. Ebɛnadze ntsi a? Osiandɛ sunsum krɔnkrɔn boa hɛn wɔ akwan ebien do. Odzi kan, ɔma hɛn ahoɔdzen a yehia ama yeetum egyina ɔhaw ano. Otsĩa ebien, ɔyɛ tum a ɔboa hɛn ma yɛkɔ do som Jehovah kesi dɛ yebodu Nyankopɔn no wiadze fofor no mu. Hom mma yensi hɛn bo dɛ yɛbɛyɛ dza yebotum nyina ama yeenya sunsum krɔnkrɔn no mboa kɛse!