ASO mpaabɔ botum ayɛ biribi papa bi ama hɛn a? Bible no ma yehu dɛ Nyankopɔn n’asomfo anokwafo hɔn mpaabɔ boaa hɔn. (Luke 22:40; James 5:​13) Nokwasɛm nye dɛ, mpaabɔ botum aboa hɛn wɔ yɛnye Nyankopɔn ntamu anyɛnkofa mu, nkatse afamu, nye honam afamu. Ebɛn kwan do?

Ɔwodze ma yɛmfa no dɛ, obi akyɛ wo ba bi adze. Aso ebɛkã akyerɛ no dɛ ɔnkyerɛ ho enyisɔ wɔ n’akoma mu ara kɛkɛ? Anaa ebɛkã akyerɛ no dɛ ɔnkɛda nyimpa no ase mfa nkyerɛ dɛ n’enyi sɔ akyɛdze no? Sɛ yɛkã mbrɛ yesi tse nka wɔ biribi ho a, ɔma afofor hu na ber kor no ara so ɔhyɛ hɔn dzen. Aso dɛmara na ɔtse aber a yɛrekasa akyerɛ Nyankopɔn no? Nyew ɔtse dɛm! Ma yɛnhwɛ nhwɛdo ahorow bi.

Aseda mpaabɔ. Sɛ yɛda hɛn Egya no ase wɔ ndzɛmba pa a yenya no ho a, ɔma yɛdze hɛn adwen si nhyira ahorow a yenya no do. Ɔno ma yɛkyerɛ enyisɔ kɛse, ɔma hɛn enyiwa gye na yenya ndzɛmba ho adwen pa.​—Philippifo 4:6.

Dɛ mfatoho no: Jesus daa enyisɔ edzi wɔ kwan a n’Egya faa do tsiee ne mpaabɔ na ɔyɛɛ n’ebisadze maa no no ho.​—John 11:41.

Mpaabɔ a yɛdze hwehwɛ bɔnfakyɛ Sɛ yɛserɛ Nyankopɔn dɛ ɔmfa hɛn bɔn nkyɛ hɛn a, ɔma hɛn tsibowa yɛ edwuma yie, yɛkyerɛ nnuho kɛse, na ɔma yehu enyibersɛm a ɔwɔ bɔn no mu. Ɔno ma yeyi bɔn ho afɔbu a wɔayɛ dɛ adzesoa no fi hɛn do.

Dɛ mfatoho no: David bɔɔ mpaa dze kyerɛɛ dɛ oenu noho, na odzi yaw wɔ dza ɔayɛ no ho.​—Ndwom 51.

Mpaabɔ a yɛdze hwehwɛ akwankyerɛ na nyansa. Sɛ yɛserɛ Jehovah dɛ ɔmma hɛn akwankyerɛ anaa nyansa a yebotum dze esisi gyinae pa a, obotum aboa hɛn ma yeefi hɛn akoma mu abrɛ hɛnho adze. Ɔbɛma yaakaa dɛ yenndzi mũ na ɔbɔboa hɛn ma yeenya hɛn sor Egya no mu ahotodo.​—Mbɛbusɛm 3:​5, 6.

Dɛ mfatoho no: Solomon fii ahobrɛadze mu bisaa akwankyerɛ na nyansa a ɔdze bobu Israel man no.​—1 Ahemfo 3:​5-​12.

Mpaa a yɛbɔ aber a yɛabotow. Sɛ yɛkã dza ɔwɔ hɛn akoma mu ho asɛm kyerɛ Nyankopɔn aber a yɛabotow a, yebenya akomatɔyamu na yɛdze hɛnho bɔto Jehovah do sen dɛ yɛbɔtwer hɛnankasa hɛn ntseasee.​—Ndwom 62:8.

Dɛ mfatoho no: Ɔhen Asa bɔɔ mpaa aber a ohyiaa atamfo a hɔnho yɛ hũ no.​—2 Mbermunsɛm 14:11.

Mpaa a yɛbɔ ma afofor. Mpaabɔ a ɔtse dɛm no boa hɛn ma yekwetsir pɛsɛankonya na yenya ayamuhyehye na tsema mbom.

Dɛ mfatoho no: Jesus bɔɔ mpaa maa n’ekyirdzifo no.​—John 17:​9-​17.

Ayɛyi mpaabɔ. Sɛ yeyi Jehovah ayɛw wɔ n’anwanwa ndwuma nye no su ahorow no ho a, ɔbɛma obu nye enyisɔ a yɛwɔ ma no no ayɛ kɛse. Mpaabɔ a ɔtse dɛm no so botum aboa hɛn ma yaatwe abɛn hɛn Nyankopɔn nye hɛn Egya no.

Dɛ mfatoho no: David fii n’akoma mu kamfoo Nyankopɔn wɔ ndzɛmba a ɔabɔ no ho.​—Ndwom 8.

Nhyira fofor a ɔnye mpaabɔ wɔ ebusuabɔ nye “Nyankopɔn asomdwee a ɔtra ntseasee nyina” no. (Philippifo 4:7) Ɔyɛ dzen paa dɛ yebenya asomdwee a ɔtse dɛm wɔ wiadze a ɔhaw ahyɛ mu mã yi mu. Dɛm asomdwee yi boa hɛn wɔ honam afamu mpo. (Mbɛbusɛm 14:30) Naaso ana ɔnam hɛn mbɔdzembɔ nkotsee do na ɔba? Anaadɛ biribi a no ho hia paa so ka ho bi?