WƆ WIADZE yi mu beebiara no, nyimpa a wɔwɔ amambra nye ɔsom ahorow nyina mu no bɔ mpaa. Binom wɔ hɔ a sɛ ɔka hɔn nkotsee a na wɔbɔ mpaa, anaa wɔnye afofor hyia mu bɔ mpaa. Wɔbɔ mpaa wɔ asɔrdan, nhyiamudan, na abosom dan ahorow mu. Wotum dze ndzɛmba a odzidzi do yi dzi dwuma dze bɔ mpaa: mpa, rosary, ehonyi, mpaabɔ nwoma, anaa mpaabɔ a wɔakyerɛw egu ntaabo nkakraba do asensɛn hɔ.

Mpaabɔ ma nyimpa da nsew fi abɔdze a nkwa wɔ mu a wɔwɔ asaase yi do nyina ho. Nokwasɛm nye dɛ, yɛnye mbowa dzi nsɛ wɔ ndzɛmba pii mu. Yehia edziban, mframa, na nsu tse dɛ mbowa ara so. Wɔwo hɛn, yɛtsena nkwa mu na yewu tse dɛ mbowa ara so. (Ɔsɛnkafo 3:​19) Naaso nyimpa nkotsee na wotum bɔ mpaa. Ebɛnadze ntsi a?

Asɛmbisa yi ho mbuae tsiabaa nye dɛ, yehia mpaabɔ. Wɔkyerɛ mpaabɔ ase dɛ kwan a nyimpa fa do nye tum bi a wobu no dɛ ɔyɛ krɔnkrɔn na ɔwɔ hɔ aber biara dzi nkitaho. Bible kã dɛ wɔdze ndzɛmba a ɔtse dɛm ahyɛ hɛn akoma mu. (Ɔsɛnkafo 3:​11) Ber bi Jesus Christ kãa dɛ sɛ obi nyim dɛ ohia Nyankopɔn wɔ n’asetsena mu a, dɛm nyimpa no n’enyiwa bɛgye paa.—Matthew 5:3.

Ntsi, adasamba pii nyim dɛ ohia dɛ wɔsom Nyankopɔn. Ɔno ntsi na ɔsom pii wɔ hɔ na mbea a nkorɔfo kɔ hɔ kɔbɔ mpaa so adɔɔ sõ no. Nyimpa binom gye dzi dɛ hɔnankasa botum abɛn Nyankopɔn, na binom so dze, wosusu dɛ gyedɛ wɔma afofor boa hɔn. Naaso, ana nngye nnto mu dɛ nyimpa ankasa runntum mmfa mboa a ɔfata no mma hɔnho? Hɛn nyina tɔ sin, hɛn nkwa yɛ tsiabaa na yenntum nnhu dza obesi daakye. Ntsi obi a onyim nyansa kyɛn hɛn, ɔwɔ tum kyɛn hɛn, na ɔtsena hɔ afebɔɔ nkotsee na obotum ama hɛn dza yehia. Ntsi, ebɛnadze na yehia ma ɔno ntsi yɛbɔ mpaa no?

Susu ho hwɛ: Aso ahwehwɛ akwankyerɛ, nyansa anaa nsɛm bi a ɔbor nyimpa ne nyimdzee do ho mbuae pɛn? Aso atse nka pɛn dɛ ihia awerɛkyekyer aber a ahwer adze kɛse bi, aber a ihia akwankyerɛ dze esi gyinae kɛse bi , anaa bɔn bi a ayɛ ma etse nka dɛ ihia bɔnfakyɛ?

Dɛ mbrɛ Bible no kyerɛ no, sɛ yɛbɔ iyinom ho mpaa a ɔyɛ no kwan do. Ɔdze fa mpaabɔ ho no, Bible no nye nwoma a ɔsen biara a yebotum dze hɛn ho ato do, na mpaa a mbaa nye mbarimba anokwafo pii so bɔe no wɔ mu. Wɔbɔɔ mpaa dze hwehwɛɛ awerɛkyekyer, akwankyerɛ, bɔnfakyɛ, nye nsɛm a ne ntseasee yɛ dzen ho mbuae.​—Ndwom 23:3; 71:21; Daniel 9:​4, 5, 19; Habakkuk 1:3.

Ɔwɔ mu dɛ nsonsonee wɔ mpaabɔ ahorow yi mu biara mu dze, naaso adze kor bi da nsew wɔ ne nyinara mu. Nna hɔn mu biara nyim adze tsitsir a ɔsɛ dɛ ɔyɛ na ama woeetsie ne mpaabɔ. Naaso ɔnntse dɛm wɔ hɔn a wɔbɔ mpaa ndɛ no mu pii hɔn afamu. Afei so, nna wonyim nyia a ɔsɛ dɛ wɔbɔ no mpaa.