Wɔwoo me wɔ Santo Domingo a ɔwɔ Dominican Republic. Yɛyɛ mbofra baanan, na emi na meyɛ kaaekyir. Nna m’awofo akɔ skuul akɔ ekyir ntsi nna wɔpɛ dɛ wɔtsetse hɛn yie. Aka mfe anan ma wɔaawo me no, m’awofo hyiaa Mormonfo. Mberantsɛ no hɔn ahosiesie nye hɔn ndzeyɛɛ yɛɛ m’awofo fɛw ntsi wosii gyinae dɛ yɛbɔkɔ Mormon Asɔr no bi (The Church of Jesus Christ of Latter-day Saints). Yɛyɛ ebusua a odzi kan wɔ supɔw no do a yɛkɔr dɛm asɔr yi bi.

Mirinyin no m’enyi bɛgyee dza nna asɔr no yɛ ma yɛdze gyegye hɛn enyi no ho. Nkyii so dza nna wɔkyerɛkyerɛ fa ebusua asetsena nye suban pa a ɔsɛ dɛ yenya no, nna m’enyi gye ho. Nna ɔyɛ me dɛw dɛ meyɛ Mormonnyi, na medze yɛɛ mo botae dɛ mobɔkɔ ɔman fofor do akɛka Mormonsom ho asɛm.

Midzii mfe 18 no, m’ebusua no tui kɔr United States ama meetum akɔtoa mo skuul do wɔ hɔ. Bɛyɛ afe kor ekyir no, me maame no nua kakraba nye no kun a wɔyɛ Jehovah Adasefo bɛseraa hɛn wɔ Florida. Wɔtoo nsa frɛɛ hɛn dɛ yɛnye hɔn nkɔ ehyiadzi. Wɔ ehyiadzi no ase no, muhun dɛ sɛ wɔbɔ kyerɛwsɛm bi a, obiara bue wɔ ne Bible mu, na ɔkyerɛw biribi so to hɔ. M’enyi gyee iyi ho paa. Ntsi emi so megyee pɛn na krataa, na mekyerɛɛw bi.

Aber a yɛpoon ehyiadzi no, me maame no nua kakraba nye no kun no kaa dɛ sɛ mepɛ dɛ mebɛyɛ asɛmpatserɛwnyi dze a, wɔbɔboa me ma meesua Bible no. Megyee dza wɔkae no too mu, osiandɛ dɛm aber no nna minyim Mormon Nwoma no mu kyɛn Bible.

Nna metaa nye me maame no nua kakraba no na no kun no sua Bible no wɔ tɛlefon do. Nna ɔyɛ a wɔtaa ka kyerɛ me dɛ memfa dza m’asɔr no kyerɛkyerɛ no ntoto dza Bible no kyerɛkyerɛ no ho. Nna wɔpɛ dɛ mankasa meyɛ nokwar no mu nhwehwɛmu.

Megyee Mormonfo nkyerɛkyerɛ pii too mu naaso nna minnyim sɛ ɔnye Bible no hyia o. Me maame no nua kakraba no maa me Jehovah Adasefo hɔn magazine bi a wɔfrɛ no Awake! a ɔbae wɔ November 8, 1995 no bi. Nna ɔka Mormonfo hɔn nkyerɛkyerɛ ho asɛm. Ɔyɛɛ me nwanwa o, osiandɛ nna Mormonfo hɔn nkyerɛkyerɛ pii wɔ hɔ a minnyim. Iyi maa mokɔr Mormonfo hɔn wɛbsaet kɔhwehwɛɛ dɛ dza Awake! no reka no yɛ nokwar anaa. Nna ɔyɛ nokwar. Ekyir yi, mokɔr beebi a Mormonfo kora hɔn tsetse ndzɛmba do wɔ Utah na muhun dɛ dza Awake! no reka no yɛ nokwar.

Nna minyim dɛ Mormon Nwoma no mu nsɛm nye Bible no mu nsɛm hyia. Naaso aber a mekenkaan Bible no kɔr ekyir no, mubohun dɛ saana Mormonfo hɔn nkyerɛkyerɛ nye Bible no nnhyia koraa. Dɛ nhwɛdo no, Bible no ka wɔ Ezekiel 18:4 dɛ ɔkra wu, naaso, wɔaka wɔ Alma 42:9 wɔ Mormon Nwoma no mu dɛ: “Ɔkra no nnkotum ewu da.”

Sɛ Mormonfo hɔn nkyerɛkyerɛ a ɔnye Bible no nnhyia no da nkyɛn a, dza nna ɔhaw me kɛse nye ɔman ho dɔ a Mormonfo no wɔ no. Dɛ nhwɛdo no, Mormonfo gye dzi dɛ nna Eden ture no wɔ Jackson County, Missouri, U.S.A. Nna nkɔnhyɛfo a wɔwɔ asɔr no mu no ka dɛ, sɛ “Nyankopɔn n’Ahendzi no ba a United States frankaa no nkotsee na wɔbɛma do.”

Nna ɔyɛ a mibisa moho dɛ sɛ asɛm yi ba mu a, ebɛn gyinabew na ɔman a mifi mu nye aman a wɔaka no benya. Da kor ewimbir bi, nna menye aberantsɛ bi a ɔregye ntsetsee abɛyɛ Mormon asɛmpatserɛwnyi robɔ nkɔmbɔ wɔ tɛlefon do na mibisaa no dɛm asɛm yi. Mibisaa no dɛ sɛ ne man nye ɔman fofor roko a, aso obokunkum Mormonfo a wɔwɔ dɛm ɔman no mu no a? Aber a obuaa dɛ nyew no, moho dwuruuw me dɛ! Mohwehwɛɛ m’asɔr no nkyerɛkyerɛ mu kɔr ekyir na mukohun asɔr no mu mpanyimfo so. Wɔkaa kyerɛ me dɛ me nsɛmbisa no ho mbuae no yɛ esumasɛm, na sɛ da kor kan no ba a, mibenya ho mbuae.

Nkyerɛkyerɛmu a wɔdze maa me no maa meyɛɛ basaa, ntsi mehyɛɛ ase susuu siantsir a nna mepɛ dɛ meyɛ Mormon asɛmpatserɛwnyi no ho. Mubohun dɛ siantsir a nna mepɛ dɛ meyɛ asɛmpatserɛwnyi ara nye dɛ mobɔboa nkorɔfo. Siantsir kor so nye dɛ nna ɔbɛma afofor ebu me. Nyankopɔn ankasa dze, nna minnyim noho nsɛm pii. Ɔwɔ mu dɛ mber bi a abɛsen kɔ no, nna metaa dze m’enyi fa Bible no mu kakra dze, naaso nna no mo nsɛm no nnhyɛ da ara nnhia me dɛm. Nna minnyim siantsir mpo a Nyankopɔn bɔɔ asaase no nye siantsir a ɔbɔɔ nyimpa baa wiadze.

Menye Jehovah Adasefo rusua Bible no, muhun ndzɛmba pii tse dɛ Nyankopɔn ne dzin, tsebea a ewufo wɔ mu, nye dza Jesus bɛyɛ wɔ Nyankopɔn n’Ahendzi mu. Ekyir yi, m’enyi bɛgyee Bible no ho, na nna m’enyi gye ho so dɛ mebɛka nokwar a murusua no ho adze akyerɛ afofor. Minyim dɛ Nyankopɔn wɔ hɔ naaso sesei mubotum nye no abɔ nkɔmbɔ wɔ mpaabɔ mu dɛ me nyɛnko. Mobɔɔ esu dɛ Jehovah Dasefo no mu kor wɔ July 12, 2004, na abosoom esia ekyir no mehyɛɛ ber nyina som edwuma no ase.

Medze mfe enum yɛɛ edwuma wɔ Jehovah Adasefo edwumayɛbea tsir wɔ Brooklyn, New York. M’enyi gyee paa dɛ moboae ma wotsintsiim Bible nye Bible ho nwoma a ɔroboa nyimpa mpempem pii wɔ wiadze. Na nnyɛ iyi nko, mugu do ara roboa nkorɔfo ama woeesua Nyankopɔn ho asɛm.