Ofitsi mo mbofrase nyina nna m’enyi gye abɔdze ho. Nna kwaa a ɔyɛ nwanwa nye nsutaae a ɔyɛ fɛw etwa hɛn kurow Jyväskylä a ɔwɔ Central Finland ho ehyia. Nna m’ebusuafo taa kɔ dɛm mbea ahorow yi kɛgye hɔn enyi. M’enyi gye mbowa so ho papaapa. Aber a nna meyɛ abofra no, dza nna mepɛ nye dɛ mebɛyɛ egyinambowa na bɔdɔm biara a mibehyia no no etuu! Aber a nna mirinyin no, nna sɛ muhu dɛ obi reyɛ mbowa ayakayakadze a, nna ɔyɛ me yaw papaapa. Odur mber bi no, medze moho kɔbɔɔ kuw bi a nna wɔhwehwɛ mbowa hɔn eyiedzi, na mehyiaa nkorɔfo a nna hɔn so pɛ mbowa asɛm dɛ mara.

Yɛbɔɔ mbowa eyiedzi ho dawur. Yetsintsiim nsɛm guu nkrataa do kyekyɛɛ maa nkorɔfo, na yɛyɛɛ ɔyɛkyerɛ ahorow dze kasaa tsiaa hɔn a wɔtɔn mbowa nhwi, nye hɔn a wɔdze mbowa yɛ hɔn nhwehwɛmu ahorow no. Yɛtseew kuw fofor bi so a nna ne tsirmpɔw nye dɛ ɔbɔbɔ mbowa eyiedzi ho ban. Yɛfaa kwan a nna otsia mbra do bɔɔ mbɔdzen dɛ yɛbɛma afofor atse hɛn nka, ntsi dabaa nna aporisifo rohwehwɛ hɛn akyer hɛn. Wɔkyeer me dze me kɔr asɛndziibea mpɛn pii.

Sɛ edze mbowa a nna mepɛ hɔn asɛm no to nkyɛn a, nna ɔhaw ahorow a ɔkɔ do wɔ wiadze ne mfɛndzanan no so haw me. Ewiei koraa no, medze moho kɔbɔɔ ekuw ahorow bi tse dɛ Amnesty International nye Greenpeace. Medze m’ahoɔdzen nyina taa dɛm ekuw ahorow yi ekyir. Nna mekasa ma ehiafo, hɔn a ɔkɔm dze hɔn, nye hɔn a wonnyi bi wɔ asetsena mu.

Nkakrankakra mubohun dɛ, saana murunntum nsesa wiadze nsɛm tsebea. Ɔwɔ mu dɛ ekuw ahorow a medze moho kɔbɔɔ hɔn no tumii maa ɔhaw ahorow no bi kɔree dze, naaso ɔhaw akɛse no dze, nna kɛse araa na ɔreyɛ. Nna ɔtse dɛ dza ndzɛmba resɛɛ wɔ wiadze yi mu na hwee so mmfa obiara ho bio. Metsee nka dɛ murunntum nnyɛ ho hwee.

Aber a muhun dɛ murunntum nnyɛ tsebea no ho hwee no, mo werɛ howee, na wɔ dɛm aber no so mu ara na mehyɛɛ ase dɛ morodwendwen Nyankopɔn nye Bible no ho. Nna menye Jehovah Adasefo esũa Bible no pɛn. Ɔwɔ mu dɛ Adasefo no daa ayamuyie edzi na wɔkyerɛɛ moho enyigye dze, naaso nna mennyɛɛ krado dɛ mebɛyɛ nsakyer wɔ m’abrabɔ mu. Naaso dɛm aber yi dze, nna ndzɛmba asesa.

Mefaa me Bible no na mehyɛɛ ase kenkanee. Ɔboaa me papaapa, na ɔmaa m’akoma tɔɔ me yamu. Mubohun dɛ Bible no kyerɛkyerɛ hɛn dɛ, ɔnnsɛ dɛ yɛyɛ mbowa ayakayakadze. Dɛ nhwɛdo no, Mbɛbusɛm 12:10 kã dɛ “nyimpa tsenenee bu n’abowa no nkwa bi.” Afei so mubohun dɛ, ɔnnyɛ Nyankopɔn na ɔdze ɔhaw ahorow a ɔwɔ wiadze mu no ba. Mbom no, hɛn haw ahorow no adɔɔ sõ osiandɛ nkorɔfo pii nndzi Nyankopɔn n’akwankyerɛ do. Aber a musũaa Jehovah no dɔ nye n’abotar ho adze no, ɔkaa m’akoma papaapa.​—Ndwom 103:8-14.

Dɛm aber no ara mu no, muhun dɛ mubotum akyerɛw akɔ dɛ mepɛ buukuu a wɔato dzin What Does the Bible Really Teach? Ntsi mekyerɛwee kɔree. Annkyɛr na awarfo bi a wɔyɛ Adasefo bɔbɔɔ m’abow mu na wɔkãa dɛ wɔpɛ dɛ wɔnye me yɛ Bible adzesua. Megyee too mu dɛ wɔnye me nsũa Bible no. Afei so mehyɛɛ ase kɔr Christianfo nhyiamu a wɔyɛ wɔ Ahendzi Asa do no bi, ne dɛm ntsi, nokwar no hyɛɛ ase gyee ndwow wɔ m’akoma mu.

Bible no boaa me maa meyɛɛ nsakyer ahorow wɔ m’abrabɔ mu. Megyaa asabow na sigyarɛtsenom. Mesesaa mbrɛ nna misi siesie moho na mannkã kasafĩ bio. Medze obu a ɔfata maa wiadze etumfo. (Romefo 13:1) Bio so, nkan no nna mubu ɔbrakyew dɛ ɔnnyɛ hwee, ntsi nna medze moho hyɛ mu. Naaso, migyaa ne nyinara yɛ.

Nna nsesa a ɔyɛ dzen ma me papaapa dɛ mebɛyɛ nye dɛ mibenya ekuw ahorow a wɔhwehwɛ nyimpa na mbowa hɔn eyiedzi no ho adwempa. Nna ɔnnyɛ da kor asɛm o. Ahyɛse no, nna metse nka dɛ sɛ motwe moho fi dɛm ekuw ahorow yi ho a, ɔbɛyɛ dɛ miriyi hɔn ama. Naaso, mubohun dɛ, Nyankopɔn n’Ahendzi nkotsee na obotum eyi wiadze haw nyinara efi hɔ, na ɔno so nye wiadze yi enyidado mapa. Ntsi misii gyinae dɛ medze m’ahoɔdzen nyina bɔboa dɛm Ahendzi no na maaboa afofor ma woeesũa ho adze.​—Matthew 6:33.

Nkan no, nna mekyekyɛ nyimpa mu. Nna mowɔ nkorɔfo a mubu hɔn dɛ wɔyɛ nyimpa pa, nna hɔn a mubu hɔn dɛ wɔyɛ nyimpa bɔn. Hɔn a nna mubu hɔn dɛ wɔyɛ nyimpa bɔn no, nna meyɛ dza mubotum biara kõ tsia hɔn. Naaso, Bible no aboa me papaapa ma seseiara dze, minnyi nkorɔfo ho tan bio. Mbom no, mobɔ mbɔdzen dɛ mebɛda Christianfo dɔ edzi akyerɛ nyimpa nyina. (Matthew 5:44) Mefa akwan ahorow do da dɛm dɔ yi edzi kyerɛ afofor. Dɛm kwan yi bi nye Nyankopɔn n’Ahendzi ho asɛmpa a mekã kyerɛ nkorɔfo no. Sɛ muhu mbrɛ asɛmpa a mekã no ma nkorɔfo nya asomdwee, enyigye na enyidado mapa a, ɔma m’enyi gye dɛ.

Megyaa wiadze nsɛm tsebea ama Jehovah. Iyi ama menya asomdwee. Megye dzi papaapa dɛ, Ɔbɔadze no remma wɔnnyɛ mbowa na nyimpa ayakayakadze daa na ɔremma nkorɔfo nsɛɛ hɛn asaase fɛfɛɛfɛw yi. Dza ɔnye iyi bɔ ebira no, Nyankopɔn nam n’Ahendzi no do bɛsan ama asaase yi ayɛ kama bio, na dza asɛɛ wɔ do nyina obesiesie. (Isaiah 11:1-9) Mowɔ enyigye kɛse, osiandɛ minyim dɛm nokwasɛm ahorow yi. Sɛ moboa afofor so ma wonya gyedzi wɔ dɛm nokwasɛm ahorow yi mu a, ɔma m’enyi gye kɛse. Menntse nka bio dɛ ɔsɛ dɛ meyɛ biribi dze sesa wiadze nsɛm tsebea.