Wɔwoo me wɔ ekuraba bi ase wɔ Galicia, na ɔwɔ Spain etsifi-anee afamu. Dɛm aber no, nna m’awofo wɔ haban ketseaba bi wɔ ekuraba no ase hɔ. Mbofra a m’awofo woo hɔn no yɛ baawɔtwe, na nna emi na me tsĩa anan. Nna fie yɛ enyika dɛ, ntsi nna m’ahom ka moho. Dɛm aber no, annyɛ yie koraa no, nna mbofra a wɔwɔ ebusua biara mu wɔ Spain no, hɔn mu kor kɔ asɔfodzi skuul. Hɛn ebusua no mu no, mbofra baasa na yetuu dɛm anamɔn yi.

Midzii mfe 13 no, mekɛkaa mo nuabaa ho wɔ asɔfodzi skuul mu wɔ Madrid. Nna obiara n’asɛm mmfa obiara ho wɔ hɔ. Afei nna hɔ yɛ mbra mbra dodow, dza wonyim ara nye dɛ yɛmbɔ mpaa. Anapaatu biara, ibohu ara nye dɛ wɔaka hɛn egu asɔrdan mu dɛ yɛnkɔdwendwen ndzɛmba ho. Ɔtɔfabi a nna munnhu dza mondwendwen ho. Nkyii so nna yɛtow ndwom bɔ Mass wɔ Latin kasa mu. Dza nna ɔrokɔ do wɔ hɔ no dze, nna munnhu do koraa. Nna metse nka dɛ Nyankopɔn mmbɛn me koraa. Aber a nna mowɔ skuul hɔ no, nna minnya obiara nnye no mmbɔ nkɔmbɔ. Mara mo nua no mpo, sɛ menye no hyia a nna dza yetum kã ara nye “Mbo Maria,” nna yeetwa mu. Sɛ Roman sistafo bɛma hɛn kwan kakra ma yɛabɔ nkɔmbɔ a, gyedɛ yeedzidzi ewie, na ɔno mpo no, ɔyɛ minitsi 30 pɛ na wɔdze ma hɛn. Sɛ medze mbrɛ nna ndzɛmba tse wɔ asɔfodzi skuul hɔ toto ndzepa a nna ɔkɔ do wɔ fie no ho a, o, nna ɔnnyɛ me dɛw koraa. Ntsi ɔyɛe ara nna metu sũ.

Ɔwɔ mu dɛ nna menntse nka dɛ mebɛn Nyankopɔn dze, naaso mebɛyɛɛ Roman sista aber a midzii mfe 17 no. Ahyɛse no dze, nna mereyɛ bi ara ahwɛ kɛkɛ, naaso annkyɛr na minyaa adwen dɛ mara menngye nndzi dɛ Nyankopɔn afrɛ me. Nna Roman sistafo no taa kã dɛ obi a obenya dɛm adwen yi bi no, ɔbɔkɔ abɔnsamgyamu! Naaso ne nyina ekyir no nna m’adwen mu nntsen me. Nna minyim dɛ aber a Jesus wɔ asaase do no, ɔanntsew no ho annkɛtsena beebi; na mbom ɔdze ne ber kɛsenara kyerɛkyerɛɛ afofor, na ɔboaa hɔn. (Matthew 4:​23-​25) Midzii mfe 20 no, nna munnhu siantsir a ɔsɛ dɛ mokɔ do yɛ Roman sista. Dza nna monnhwɛ kwan dɛ mebɛtse no, nna metsee. Panyin a ɔda sistafo no hɔn ano no kãa dɛ sɛ mohwɛ na sɛ m’adwen mu nntsen me a, ɔno mimfi skuul hɔ ntsɛmara. Ɔyɛ me dɛ nna osuro dɛ annyɛ a nna masɛɛ binom so hɔn adwen. Dɛm ntsi mifii skuul hɔ.

Aber a mudur fie no, m’awofo tsee me ase. Naaso osiandɛ nna edwuma nnyi hɛn ekuraba no ase hɔ ntsi, mokɔr mo nuabanyin kor nkyɛn wɔ Germany. Nna ɔdɔm Communist kuw bi. Ɔyɛ kuw bi a Spainfo a woetu akɛtsena Germany no na atsew. Nna dwuma a wodzi nye dɛ wɔbɔhwɛ dɛ obi rinnsisi odwumayɛnyi bi anaa mbaa. Ntsi mokɔdɔɔm Communist kuw no bi, na kuw yi mu so na minyaa mo kun. Nna emi na mekyekyɛ Communist nkrataa, na medze moho hyɛɛ ɔyɛtsia ahorow mu. Ntsi nna m’adwen yɛ me dɛ menya biribi papa bi reyɛ ara ma.

Naaso ɔyɛɛ kakra no, m’abaw mu buu bio. Mubohun dɛ Communist kuw no mufo no mmfa dza wɔkã no nnyɛ edwuma. Dza osii wɔ afe 1971 mu no mpo sɛɛ asɛm no koraa. Hɛn kuw no mu mberantsɛ bi kɛhyeew Spain ananmusinyi a ɔwɔ Frankfurt no n’asoɛe. Siantsir a wɔyɛɛ dɛm nye dɛ nna hɔn enyi nngye atsɛnkyew a nna ɔrokɔ do no ho. Naaso muhun dɛ sɛ hɔn enyi nngye ho mpo a, ɔnnyɛ ɔkwan a nna ɔwɔ dɛ wɔfa do no nye no.

Aber a mowoo m’abakan no, mekãa kyerɛɛ mo kun dɛ moronnkɔ Communist kuw no nhyiamu ahorow no bi bio. Nna mayɛ ankonam osiandɛ m’anyɛnkofo a nna menye hɔn bɔ dɛm aber no, hɔn mu biara ammbɔhwɛ emi na me ba no. Ɔyɛ a nna modwen siantsir a nyimpa wɔ wiadze no ho. Nna mibisa moho dɛ, ‘Sɛ obi berɛ noho dɛ ɔbɛyɛ wiadze yi yie a, aso obenya mfaso bi efi mu?’

Afe 1976 mu no, Jehovah Adasefo beenu bi bɔbɔɔ hɛn abow mu, nna wɔyɛ Spainfo. Wɔmaa me nwoma bi a wogyinaa Bible no do kyerɛwee dɛ menkenkan. Wɔsanee bae no, medze nsɛmbisa pii hyehyɛɛ hɔn do papa. Nna nsɛmbisa no fa siantsir a amandzehu nye atsɛnkyew ebu dɛm no ho. Na wɔdze Bible no yii asɛmbisa biara ano ma ɔyɛɛ me nwanwa! Afei mepeen do dɛ wɔnye me nsũa Bible no.

Ahyɛse no dze, nna adzesua no yɛ me dɛ kɛkɛ. Naaso ndzɛmba sesae aber a menye mo kun hyɛɛ ase kɔr Jehovah Adasefo nhyiamu ahorow wɔ Ahendzi Asa do no. Dɛm aber yi dze nna yɛawo mba beenu. Nna Adasefo no bɛfa hɛn kɔ asafo nhyiamu, na sɛ yedu Ahendzi Asa do so a, nna wosuo mbofra no mu ma hɛn. Iyi maa mebɛpɛɛ Adasefo no hɔn asɛm paa.

Naaso iyi nyina ekyir no, nna m’adwen mu da ho ara nntsen me wɔ nyamesom ho. Ntsi mokɔr Spain kɛseraa m’ebusuafo. Me papa no nua a ɔyɛ ɔsɔfo kekãa nsɛm bi dze buu m’abaw mu wɔ Bible a nna murusũa no ho. Naaso Adasefo a wɔwɔ mpotamu hɔ no boaa me paa. Wɔdze Bible no yii me nsɛmbisa nyina ano tse dɛ dza Adasefo a wɔwɔ Germany no yɛe no ara. Misii mo bo dɛ sɛ mesan kɔ Germany a, mobɔkɔ akɔtoa Bible adzesua no do. Ɔwɔ mu dɛ mo kun sii gyinae dɛ ɔronntoa Bible adzesua no do dze, naaso emidze menngyaa. Wɔ 1978 mu no, wonumaa me ma mebɛyɛɛ Jehovah Adasefo no mu kor.

Bible mu nokwar nyimdzee a menya ntsi, mobɔ me bra yie. Dɛ nhwɛdo no, 1 Peter 3:​1-4 tu yernom fo dɛ ‘wɔmbrɛ hɔnho adze mma hɔn kunnom’ na wombu hɔn, na “wɔnda sunsum a ɔdwe” edzi. Na “eyi na ɔsom bo kɛse wɔ Nyankopɔn enyim.” Dɛm afotusɛm yi boa me ma mutum yɛ m’edwuma yie dɛ yer nye baatan.

Mebɛyɛɛ Ɔdasefo no, mfe 35 nye yi. Ɔyɛ me dɛw paa dɛ mabɛka nyimpa a wɔdze nokwardzi rosom Nyankopɔn dɛ ebusua kor wɔ wiadze nyina no ho. Me mba beenum no mu baanan na menye hɔn rosom. Na iyi ama m’akoma atɔ me yamu.