Wɔwoo me wɔ Rome ekuroba bi ase. Nna ehiafo dɔɔ sõ wɔ hɔ na hɔ so ara na minyinii. Nna abrabɔ mu yɛ dzen papaapa. Me maame a ɔwoo me dze mennhu no da, na me papa so nna menye no ntamu ebusuabɔ nnyɛ papa biara. Beebi a metsenae no na ɔmaa m’enyi yɛɛ dzen.

Menndzi mfe du mpo na mehyɛɛ ase dɛ muruwia adze. Aber a odzi kan a muguanee fii fie no nna medzi mfe 12. Mpɛn pii no, nna me papa bɛfa me fi poris steehyɛn kɔ fie. Nna metaa nye nkorɔfo ham, nna m’enyi gye basabasayɛ ho, na nna ɔtse dɛ dza menye wiadze no nyina enya asɛm. Midzii mfe 14 no mifii fie koraa. Mehyɛɛ ase noom ndubɔn, nna abɔntsen ara na mobɔ me bra. Nna minnya beebi so nnda, ntsi sɛ adze sã na sɛ minya kaar bi a nna mebu n’abow no akɛda mu. Nna meda mu ara ma adze kye. Sɛ mosoɛr a nna makɔhwehwɛ nsu bi ahohor moho.

Nna maben wɔ adzewia mu papaapa; nna muhwim nkorɔfo hɔn baag fi hɔn nsamu, na muwia adze anafua wɔ nkorɔfo hɔn efie mu. Mehyɛɛ ase gyee dzin bɔn na annkyɛr na akobɔfo kuw bi kãa kyerɛɛ me dɛ membɛka hɔnho ma yɛnyɛ edwuma. Iyi maa minyaa “ho kwan” sũaa mbrɛ wowia sika wɔ sikakorabea. Osiandɛ nna m’enyi yɛ dzen ntsi annkyɛr na mo kuw no mufo no enyi bɛgyee mo ho. Menngya me itur wɔ fie da; nokwasɛm nye yi, sɛ mereda mpo a nna ɔhyɛ mo sundze ase. Basabasayɛ, ndubɔn, adzewia, kasafĩ, na ndwamanbra dze nna mefa no kwa. Dabaa nna aporisifo rohwehwɛ me. Nna wɔtaa kyer me, ntsi efiadze dze morokɔ hɔ ba ara nye yi.

Ber bi a woyii me fii efiadze no, mekɛseraa me maame kakraba bi. Saana ɔnye ne mba beenu abɛyɛ Jehovah Adasefo a minnyim. Wɔtoo nsa frɛɛ me dɛ menye hɔn nkɔ Adasefo no hɔn nhyiamu bi ase. Nna mepɛ dɛ muhu dza ɔkɔ do wɔ hɔ, ntsi menye hɔn kɔree. Yedur Ahendzi Asa no do no, mehyɛɛ da ara tsenaa abow no ano mbrɛ ɔbɛyɛ a mubohu hɔn a woridzi akɔnaaba no nyina. Wɔ hɔ ara so mpo nna me itur no hyɛ mo ho.

Dɛm nhyiamu no sesaa m’abrabɔ. Dza muhunii wɔ hɔ no, ɔyɛɛ me tse dɛ adaaso bi. Obiara dze enyigye kyiaa me. Mbrɛ Adasefo no sii tseew hɔn enyim no mpo maa muhun dɛ wɔyɛ nyimpa a hɔn yamu ye na wodzi nokwar. Sɛ medze fɛkuwbɔ a minyaa no dɛm da no toto nyimpa a nna menye hɔn bɔ no ho a, nna muhu dɛ Adasefo no da mu fua!

Adasefo no nye me hyɛɛ Bible adzesua ase. Musũaa adze kɔr ekyir no, mubohun dɛ ɔsɛ dɛ meyɛ nsesa koraa wɔ m’abrabɔ mu. Kyerɛwsɛm a ɔwɔ Mbɛbusɛm 13:20 no kaa m’akoma papaapa. Hɔ kã dɛ: “Enye enyansafo nnantsew, na ibohu nyansa: na nkwasea adamfo dze, no ho bɛhyehye no.” Mubohun dɛ ɔsɛ dɛ motwe moho fi kuw a wɔyɛ basabasa yi ho. Nna ɔnnda famu mma me, naaso Jehovah boaa me ma mutumii twee moho.

Nkyii so mobɔɔ mbɔdzen dɛ mebɛma moho atsew wɔ honam afamu. Osian dɛm mbɔdzembɔ no ntsi, migyaa sigyarɛtse nye ndubɔn nom. Mutwitwaa me tsinhwi atsentsen no, migyaa asowamuadze hyɛ na mannkã kasafĩ bio. Iyi nye ber a odzi kan a muhun dɛ m’abrabɔ ahyɛ ase reyɛ papa.

Nna memmpɛ akenkan na adzesua papa, ntsi nna ɔyɛ dzen ma me dɛ sɛ murusũa Bible no a medze m’adwen besi do. Naaso mobɔɔ moho mbɔdzen, na nkakrankakra mobɔdɔɔ Jehovah. Nkyii so mubohun adze fofor bi a ɔwɔ dɛ meyɛ ho edwuma. Nna ɔyɛ a me tsibowa bu me fɔ. Ɔtɔfabi a nna metse nka dɛ mennsɛ hwee osiandɛ nna medzi bɔn pii. Ntsi nna metse nka dɛ Jehovah remmfa mo bɔn nnkyɛ me da. Sɛ minya adwen a ɔtse dɛm a, mekenkan bɔn a no mu yɛ dur a Ɔhen David yɛe no ho asɛm. Na sɛ muhu mbrɛ Jehovah dze kyɛɛ no no a, nna m’akoma atɔ me yamu.​—2 Samuel 11:​1–12:​13.

Adze kor so a nna ɔyɛ dzen ma me nye dɛ mebɛkã asɛmpa no wɔ efiefi. (Matthew 28:19, 20) Nna mobɔ hũ dɛ annhwɛ a mekehyia obi a medzi no bɔn pɛn. Naaso, nkakrankakra mutumii dzii dɛm hũ no do. Afei dze, ɔyɛ me dɛw dɛ merekã hɛn sor Egya a ɔwɔ ɔdɔ no ho asɛm, na merema nkorɔfo ehu dɛ ɔdze bɔn kyɛ ma ɔbor do.

Jehovah noho adze a mesũa no agye mo nkwa! Mo kuw no mufo pii ewuwu, na binom so da efiadze. Naaso emidze, m’enyi gye, na minyim dɛ asetsena papabi da hɔ rotweɔn me. Mesũa dɛ mebɛbrɛ moho adze na maayɛ setsie, ntsi seseiara dze m’akoko nnhaw me bio. Iyi ama menye nyimpa a woetwa moho ehyia no tsena kama. Merekasa yi, m’awar ɔbaa bi a noho yɛ fɛw, wɔfrɛ no Carmen. Hɛn beenu nyina boa nkorɔfo ma wosũa Bible no, na iyi ma hɛn enyi gye papaapa.

Seseiara dze, edwuma a meyɛ no, obiara runntum nnkã ho asɛm bɔn. Ɔtɔ da a, mekɛyɛ edwuma wɔ sikakorabea, naaso ɔnnyɛ dɛ murukowia adze wɔ hɔ; na mbom mikesiesie hɔ.