Aber a nna musuar koraa no, nna menye m’ebusua tse beebi a ɔbɛn Leipzig, East Germany. Nna dɛm bea yi bɛn Czech Republic na Poland he no. Osian me papa n’edwuma ntsi aber a midzii mfe esia no, yetutuu akwan kɔr aman afofor do​—yedzii kan kɔr Brazil, na yefi hɔ so kɔr Ecuador.

Aber a midzii mfe 14 no, wɔdze me kɔtoo boarding skuul bi mu wɔ Germany. Osiandɛ nna m’awofo wɔ ekyirkyir wɔ South America ntsi, nna ɔwɔ dɛ mara mohwɛ moho. Dɛm ntsi nna mara na midzi m’amansin. Nna monndwen mbrɛ me ndzeyɛɛ ka afofor no ho.

Aber a midzii mfe 17 no, m’awofo sanee baa Germany. Ahyɛse no dze nna menye hɔn tse. Naaso osiandɛ dza nna mepɛ na meyɛ ntsi no, nna ɔyɛ dzen ma me dɛ menye m’awofo bɛtsena. Ntsi midzii mfe 18 no, mifii fie.

Nna mereyɛ dza mubotum biara dɛ mibenya biribi a medze m’asetsena bɛyɛ. Medze m’enyi too famu hwɛɛ mbrɛ nkorɔfo ahorow na ekuw bi yɛ hɔn adze, na mubohunii dɛ adze papa a mubotum dze m’asetsena ayɛ nye dɛ mibekyinkyin hɛn asaase fɛɛfɛw yi do ansaana adasamba asɛɛ no koraa.

Mutui fii Germany, na medze motorbike bi sii mu dɛ morokɔ Africa. Naaso annkyɛr biara na mesanee baa Europe dɛ merebɛyɛ mo motorbike no yie. Aber a mukodur hɔ no, da kor bi mokɔr mpoano bi a ɔwɔ Portugal. Meyɛɛ m’adwen dɛ mibegya mo motorbike no wɔ hɔ na maafa hɛmba mbom dze etutu akwan.

Mihyiaa mbabun bi a nna wɔreyɛ ahoboa dze rubotu kwan ekotwa Atlantic Po no, na mekɛkaa hɔnho. Nna hɔn mu kor nye Laurie, na ɔno na ekyir yi ɔbɛyɛɛ me yer. Yedzii kan kɔr Caribbean supɔw no do. Wɔ hɔ no, yedzii nda kakra wɔ Puerto Rico na yɛsanee baa Europe. Menye me yer Laurie dze sii hɛn enyi do dɛ yɛbɔhwehwɛ hɛmba bi na yaayɛ nsiesie wɔ ho ma wɔayɛ hɛmba bi a yebotum atsena mu dɛ hɛn fie. Naaso aber a yɛhyɛɛ ase dɛ yɛreyɛ iyi ho ntotoe no, abosoom ebiasa pɛ ekyir na biribi fofor so bɔbɔɔ mu. Wɔkãa dɛ menkɛyɛ sordaanyi wɔ Germany.

Medze abosoom 15 yɛɛ edwuma dɛ po do sordaanyi wɔ Germany. Dɛm aber no mu na yɛwaree, na nna yegu do ara so reyɛ ahoboa dɛ yɛbɔtoa akwan a nna yetutu no do. Naaso ansaana merebɛyɛ sordaanyi no, yɛtɔɔ hɛmba bi. Ntsi aber a nna meyɛ sordaanyi no nyina no, nna yɛreyɛ hɛmba no ho edwuma nkakrankakra ma ɔaayɛ boat bi a yebotum dze etutu akwan. Yɛyɛɛ hɛn adwen dɛ ɔno mu na yɛbɛtsena dɛ hɛn fie na yeekyinkyin asaase fɛɛfɛw yi do. Muwiee sordaafo edwuma no na yegu do ara reyɛ boat no ho edwuma no na Jehovah Adasefo baa hɛn nkyɛn ma wɔnye hɛn hyɛɛ Bible adzesua ase.

Ahyɛse no nna munnhu nsesa biara a nna ɔwɔ dɛ meyɛ wɔ m’asetsena mu. Ɔbaa a menye no tse no, nna mawar no, na nna megyaa sigyarɛtsenom so dada. (Ephesusfo 5:5) Ɔdze fa nhyehyɛɛ a nna yɛayɛ dɛ yebotutu akwan akɔ mbeambea no ho no dze, nna munnhu bɔn biara a ɔwɔ ho osiandɛ nna yɛdze hɛn asetsena esi hɔ dɛ yɛdze bɔhwɛ Nyankopɔn n’abɔdze ahorow a ɔyɛ nwanwa no.

Naaso nokwasɛm nye dɛ, nna ɔwɔ dɛ meyɛ nsesa ahorow bi​—ne tsitsir no wɔ me suban mu. Nna meyɛ ahomemado na dza nna mara mepɛ na meyɛ. Ndzɛmba ahorow a nna mutum yɛ nkotsee na nna modwen ho. Nna manko moho na modwen.

Da kor bi, mekenkaan Jesus ne Bepɔw Do Asɛnka a nyimpa pii nyim no ho asɛm. (Matthew, tsir 5-7) Ahyɛse no, nna menntse ndzɛmba a Jesus rekã dɛ ɔdze enyigye ba no ase. Dɛ mfatoho no, ɔkãa dɛ enyigye nye hɔn a ɔkɔm nye sukɔm dze hɔn. (Matthew 5:6) Nna munnhu mbrɛ obi a oehia no no enyi botum agye. Aber a mugu do rusũa adze no, mubohunii dɛ saana hɛn nyinara wɔ sunsum afamu ehiadze bi, naaso ɔwɔ dɛ yɛbrɛ hɛnho adze ana yeetum edzi dɛm ehiadze no ho dwuma. Tse dɛ mbrɛ Jesus kãa dɛ: “Nhyira akã sunsum mu ehiafo.”​—Matthew 5:3.

Aber a menye Laurie hyɛɛ hɛn Bible adzesua no ase wɔ Germany ekyir no, yetui kɔr France, na ekyir yi yɛkɔr Italy. Beebiara a yɛbɔkɔ biara nna yehyia Jehovah Adasefo wɔ hɔ. Ɔdɔ a nna wɔdodɔ hɔnho nye koryɛ a nna ɔwɔ hɔn ntamu no maa m’enyi gyee hɔnho papaapa. Mobohun dɛ koryɛ wɔ Jehovah Adasefo a wɔwɔ wiadze nyina no mu. (John 13:34, 35) Ekyir yi, wonumaa emi na Laurie nyina dɛ Jehovah Adasefo.

Wonumaa me ekyir no, mokɔr do yɛɛ nsesa wɔ me suban mu. Menye Laurie yɛɛ hɛn adwen dɛ yɛdze hɛn boat hɛn no besian akɛfa Africa mpoano dze ekotwa Atlantic Po no na yaakɔ United States. Aber a hɛn beenu yi dze hɛn boat no nam po kɛse no ne mfinimfin no na nsu beberee etwa hɛnho ehyia no na mobohunii dɛ, sɛ medze moho toto hɛn Bɔfo kɛse noho a, mennsɛ hwee. Osiandɛ nna edwuma nngu modo aber a nna yɛnam po no do no ntsi, minyaa adagyer pii dze kenkaan Bible no. Kyerɛwtohɔ a ɔfa Jesus n’asaase do asetsena ho no kaa m’akoma papaapa. Nna Jesus yɛ nyimpa a odzi mũ, na nna otum yɛ ndzɛmba ahorow a ɔyɛ nwanwa so dze, naaso ɔannyɛ ahomemado. Nna ɔnnyɛ nanko noho na ɔdwen mbom nna no sor Egya no n’apɛdze na ohia no tsitsir wɔ n’asetsena mu.

Aber a modwendween Jesus n’asetsena ho no, mobohun dɛ ohia dɛ medze Nyankopɔn n’Ahendzi no dzi kan wɔ m’asetsena mu sen dɛ mebɛyɛ ndzɛmba a mara mepɛ. (Matthew 6:33) Ekyir yi a menye Laurie kodur United States no, yesii gyinae dɛ yɛbɛtsena hɔ na yɛdze hɛn adwen esi hɛn som no do.

Nkan no, osiandɛ nna meyɛ pɛsɛankonya na monndwen obiara ho ntsi no, mpɛn pii no nna ɔma m’adwen tu fora. Naaso seseiara dze, nyansa a ofi sor no na ɔkyerɛ me kwan. (Isaiah 48:17, 18) Afei so, menya tsirmpɔw bi wɔ m’asetsena mu​—ɔnye dɛ mobɔsom Nyankopɔn na maboa afofor ma woesũa noho adze.

Bible mu ngyinadonsɛm a yɛdze yɛ edwuma no aboa hɛn ma hɛn awar no asɔ papaaapa, na yenya ba basia bi a ɔno so dɔ Jehovah.

Ɔnnyɛ aber nyina na ndzɛmba kɔ yie wɔ hɛn asetsena mu. Naaso osiandɛ Jehovah boa hɛn ntsi, yeesi hɛn bo dɛ yɛbɔkɔ do dze hɛnho ato no do na yɛremmpa abaw da.​—Mbɛbusɛm 3:5, 6.