Me papa tui fii Germany kɛtsenaa Australia wɔ afe 1949. Nna ɔyɛ edwuma wɔ ndwumakuw a wotu kootaa a ɔma enyinam ahoɔdzen mu. Ntsi, ɔkɛtsenaa ekuroba bi a wɔfrɛ no Victoria mu. Ɔwaar me maame wɔ kurow yi mu, na wɔwoo me wɔ afe 1953.

Mfe kakraabi ekyir no, me maame hyɛɛ ase nye Jehovah Adasefo sũaa Bible no. Ntsi, fi mo mbofrase pɛɛ na ɔhyɛɛ ase dze Bible no kyerɛkyerɛɛ me. Naaso, nna me papa n’enyi nngye ɔsom biara ho. Ɔbɛyɛɛ obi a nna ɔyɛ basabasa na ɔhyɛ nkorɔfo do. Ntsi, nna me maame suro no paa. Naaso, me maame wiawiaa noho kɔr do sũaa Bible no, na n’enyi bɛgyee dza nna orusũa no ho paa. Sɛ me papa nnyi fie a, nna ɔnye emi na m’akyerɛbaa no sũa Bible no. Ɔkaa asaase a daakye ɔbɛdan paradise ho asɛm kyerɛɛ hɛn. Afei so, ɔkyerɛɛ mu kyerɛɛ hɛn dɛ, sɛ yɛdze Bible mu nkyerɛkyerɛ bɔ hɛn bra a, hɛn enyi bɛgye daa.​—Ndwom 37:10, 29; Isaiah 48:17.

Basabasayɛ a nna me papa pɛ ntsi, midzii mfe 18 no, mutui fii fie. Ɔwɔ mu dɛ dza me maame dze kyerɛkyerɛɛ me fii Bible mu no, nna megye dzi, naaso mennhu mfaso a nna ɔwɔ do. Ntsi, mammfa ammbɔ me bra. Ekyir yi, minyaa edwuma wɔ kootaa edwumakuw no mu. Nna meyɛ enyinam mfir ho edwuma. Midzii mfe 20 no, mowaree. Mfe ebiasa ekyir no, yɛwoo hɛn babaa a odzi kan. Mesanee susuu m’asetsena ho yie. Nna minyim dɛ Bible no botum aboa hɛn ebusua no. Ntsi, mehyɛɛ ase nye Jehovah Adasefo no mu kor sũaa Bible no. Naaso, nna me yer mmpɛ hɔn enyim ahwɛ koraa. Da kor bi, mokɔr hɔn nhyiamu. Mebaa fie no, me yer kãa dɛ minyi ndzɛmba ebien yi mu kor: dɛ mibegyaa Bible no sũa anaa mibefi ebusua no mu. Nna ɔyɛ me dɛ minnyi hwee yɛ wɔ asɛm yi ho. Ntsi, menye Adasefo no ammbɔ bio. Ekyir yi, munuu moho dɛ minyim dza ɔtsen naaso mannyɛ.

Da kor bi, m’edwumamufo dze ponografi kyerɛɛ me. Nna ɔyɛ abofon, naaso m’enyi gyee ho. Mohwɛe wiei no, nna me tsibowa bu me fɔ paa. Dza mesũa efi Bible mu ntsi, nna megye dzi paa dɛ Nyankopɔn bɔtwe m’aso. Naaso, mokɔr do hwɛɛ ponografi ara ma m’enyi bɛgyee ho. Nkakrankakra no, no hwɛ bɛgyee ndwow wɔ mo mu. Ekyir yi, motɔɔ mu ntentan koraa.

Mfe 20 ekyir no, mo suban sesaa koraa ma sɛ ihu me a, nnkɛkã dɛ meyɛ obi a me maame akyerɛkyerɛ me adze papa bi da. Sɛ ehwɛ m’abrabɔ a, nna ibohu dza m’enyi gye ho ankasa. Nna mekã kasafĩ dze kã aserewsɛm a ndwamansɛm wɔ mu. Mibenyaa banyin na basia ntamu nda ho adwen a ɔmmfata. Nna menye me yer da ho ara wɔ hɔ dze, naaso nna menye mbaa afofor so hyehyɛ hɔ. Da kor bi, mohwɛɛ m’enyim dzinn wɔ ahwehwɛ mu na mekãa dɛ, ‘M’enyi nngye nyimpaban a meyɛ no ho.’ Enyimnyam a mowɔ no, nna ɔasa koraa.

M’awar gui, na m’abrabɔ yɛɛ basaa. Ntsi, mifii m’akoma nyina mu bɔɔ Jehovah mpaa. Ɔwɔ mu dɛ nna megyaa Bible no sũa bɛyɛ mfrenhyia 20 dze, naaso mesanee hyɛɛ ase. Dɛm aber no, nna me papa ewu, na woenuma me maame ma ɔabɛyɛ Jehovah Adasefo no mu kor.

Nna m’abrabɔ nye dza Bible no kã no nnyi hwee yɛ. Naaso dɛm aber yi dze, nna m’enyi aber dɛ mibenya asomdwee a Bible no kã ho asɛm no bi. Ntsi, meyɛɛ dɛ merennkã kasafĩ bio, na meremma mo bo mmfuw ntsɛntsɛm. Afei so, misii mo bo dɛ mibegyaa ndwamanbra, kyakyatow, nsanom beberebe, na murunnwia adze wɔ edwuma mu bio.

Nna m’edwumamufo nntse siantsir a mepɛ dɛ meyɛ nsesa kɛse dɛm no ase. Mfe ebiasa ntamu dze, wɔtseetsee me papaapa. Siantsir nye dɛ nna wɔmmpɛ nsakyer a mereyɛ no. Sɛ ɔba dɛ mo bo fuw anaa mekã kasafĩ a, nna wɔabɔ agye do dɛ: “Oyiwa! Joe asan akɔ ne dadaw mu.” Sɛ wɔkã dɛm a, nna ɔyɛ me yaw paa. Mpɛn pii no, nna metse nka dɛ me nsa esi famu.

Nna ponografi ebu do wɔ m’edwuma mu, bi wɔ elɛktrɔnek mfir nye nwoma mu. Nna m’edwumamufo dze ndwamansɛm ho mfonyin fa kɔmpiwta do dze mona hɔnho. Mber bi a etwa mu no, nna dɛm na meyɛ. Nna mereyɛ dza mubotum biara dɛ mibegyaa ponografi hwɛ, naaso nna m’edwumamufo enyi aber dɛ wɔbɛma mahwe ase. Mekãa ho asɛm kyerɛɛ nyia ɔnye me sũa adze no dɛ ɔmboa me. Onyaa abotar tsiee me. Ɔdze kyerɛwnsɛm pɔtsee bi kyerɛkyerɛɛ me mbrɛ mibesi edzi suban bɔn yi do. Afei so, ɔhyɛɛ me nkuran dɛ mombɔ mpaa daa nhwehwɛ mboa mfi Jehovah hɔ.​—Ndwom 119:37.

Da kor, mefrɛɛ m’edwumamufo no dɛ wɔmma yenhyia. Yehyiae no, mekãa kyerɛɛ hɔn dɛ wɔnkɛfa beer mbrɛ mbarimba beenu bi a nna wɔwe nsã paa. Hɔn nyina tseatseaa mu dɛ: “Irunntum nnkã dɛ yɛnyɛ dɛm! Inyim dɛ dɛm mbarimba yi yɛ nsahweam na wɔrobɔ mbɔdzen dɛ wobegyaa nsã nom.” Mo so mekãa dɛ: “Dɛmara na mo so morobɔ mbɔdzen dɛ mibegyaa ponografi hwɛ.” Ofi dɛm aber no rokɔ no, wɔammfa ponografi ho asɛm annhaw m’adwen bio, osiandɛ wohun dɛ mara so morokõ etsia ponografi hwɛ.

Ber rokɔ do no, Jehovah boaa me ma mutumii gyaa ponografi hwɛ. Wonumaa me wɔ afe 1999 ma mebɛyɛɛ Jehovah Adasefo no mu kor. Ɔyɛ me enyigye paa dɛ menya hokwan resan abɔ bra pa.

Afei, mehu siantsir a Jehovah kyir ndzɛmba a nna m’enyi gye ho paa no. Jehovah yɛ Egya a ɔwɔ ɔdɔ, na ɔpɛ dɛ ɔbɔ hɛnho ban fi esian a ponografi dze ba no ho. Asɛm a ɔwɔ Mbɛbusɛm 3:​5, 6 no yɛ nokwar turododo! Ɔkã dɛ: “Fa wo werɛ nyina hyɛ [Jehovah] mu, na mma nntwer wankasa wo ntseasee. W’akwan nyinara mu ka no to mu, na ɔno na ɔbɛkyerɛ wo w’akwan.” Afotusɛm a ɔwɔ Bible mu no, bɔ hɛnho ban. Ɔno da nkyɛn a, ɔma hɛn asetsena si hɛn yie.​—Ndwom 1:​1-3.

Nkan no, nna metse nka dɛ mfaso biara nnyi mo do. Naaso sesei dze, menya obu ama moho, na mowɔ asomdwee. Mobɔ bra pa na metse nka dɛ Jehovah dze mo bɔn akyɛ me. Afe 2000 mu no, mowaree Karolin. Ɔyɛ Christiannyi baa bi a noho yɛ fɛw paa, na ɔdɔ Jehovah dɛ mbrɛ emi so modɔ Jehovah no ara. Yɛwɔ asomdwee mapa wɔ hɛn fie. Yehu dɛ ɔyɛ ho kwan kɛse dɛ yɛabɛka wiadze nyina Christianfo ebusua a hɔnho tsew na wɔdɔ hɔnho no ho.