Wɔwoo me wɔ ekuraase bi a ɔwɔ Saxony wɔ ɔman a nkan no nna wɔfrɛ no German Democratic Republic (GDR) mu. Nna m’awofo dɔ me papaapa na wɔkyerɛkyerɛɛ me abrabɔ gyinapɛn a ɔyɛ papa. Nna Communist aban na wodzi tum wɔ hɛn man GDR mu, ntsi nna nkorɔfo pii a wɔwɔ Saxony no enyi nngye nyamesom ho. Emidze, nna menngye nndzi dɛ Nyankopɔn bi mpo wɔ hɔ. Ofitsi mo mbofrase kesi dɛ midzii mfe 18 nyina no, nna menngye Nyankopɔn nndzi; nna metaa Communist aban no ekyir.

Nna ebɛnadze ntsi na m’enyi gye Communist aban no ho dɛm? Osiandɛ, nna mowɔ gyedzi dɛ nyimpa nyinaa yɛ kor, obi nkyɛn obi. Afei so, nna megye to mu dɛ ɔwɔ dɛ wɔkyɛ biribiara mu pɛpɛɛpɛr. Nna mususu dɛ iyi beyi ohia dobodobo efi hɔ na ɔremma afofor so nnya sika beberee. Ntsi medze m’ahoɔdzen taa Communist mberantsɛ na nkataasia kuw bi ekyir. Aber a midzii mfe 14 no, nna medze mber pii sesa nkrataa a asɛɛ dze yɛ ndzɛmba afofor. Nna Aue kurow no enyi sɔ dza nna mereyɛ no, ntsi etumfo a wɔwɔ hɔ no bɔɔ m’abaw do. Ɔmmfa ho dɛ nna musuar no, mubohun GDR amanyɛfo a nna wɔagye dzin no hɔn mu piinara. Nna metse nka dɛ mereper edu botae apapa ho, na megyee dzii so dɛ me daakye bɛyɛ papa.

Annkyɛr na ndzɛmba sɛɛe. Wɔ afe 1989 mu no, wobubuu Berlin ɔfasu no na Communist aban ahorow a nna ɔwɔ Eastern Europe no so gui. Nna ɔyɛ me nwanwa papaapa dɛ ndzɛmba ahorow a ɔtsetse dɛm risisi. Annkyɛr na mubohun dɛ nna atsɛnkyew ebu do wɔ me man GDR mu. Dɛ nhwɛdo no, nna wobu hɔn a wɔnntaa Communist aban no ekyir no dɛ wɔnnyɛ amamba pa. Nna ebɛnadze ntsi na wobu hɔn dɛm? Aso nna ɔnnyɛ hɛn Communistfo yi ara na yɛgye dzi dɛ nyimpa nyina yɛ kor no? Aso nna Communist gyedzi ahorow no yɛ ndaada bi kɛkɛ? Afei dze nna meda a, mennda.

Ntsi, migyaa hɔn ekyir dzi, na medze m’adwen sii ndwontow nye mfonyin a wɔdorɔw do. Nna mubotum ekosũa adze wɔ skuul a wɔkyerɛ ndwontow, na ekyir yi mpo makɔ skuulpɔn. Dɛm ntsi, medze sii m’enyiwa do dɛ mebɛyɛ ɔdwontofo a ɔdorɔdorɔw mfonyin so. Afei so, mammfa abrabɔ gyinapɛn a ɔyɛ papa a m’awofo dze tsetsee me no annyɛ hwee. Adze a nna ohia me papaapa nye dɛ mebɛgye m’enyiwa. Ntsi, mehyɛɛ ase nye mbaa pii twetwee mpena wɔ ber kor mu. Naaso ndwontow, mfonyin a modorɔw, nye ehuhubra amma m’adwendwen no do anntsew. Nna mfonyin mpo a modorɔw no da no edzi dɛ minnyi daakye ho osuro pa. Ebɛn nsɛm mpo na obesisi daakye? Na ebɛnadze ntsi na yɛwɔ wiadze?

Aber a minyaa me nsɛmbisa no ho mbuae no, moho boow me. Da kor ewimbir bi, aber a nna mowɔ skuul a wɔkyerɛ mbrɛ wosi tow ndwom no, menye skuulfo binom susuu daakye ho. Nna Mandy * kɔ me skuul no bi na ɔsan so yɛ Jehovah Adasefo no mu kor. Dɛm ewimbir no, ɔmaa muhun kwan pa a ɔwɔ dɛ mefa do. Ɔkãa dɛ: “Andreas, sɛ epɛ dɛ inya nsɛmbisa ahorow a ɔfa asetsena nye daakye ho mbuae a, gye ber sũa Bible no.”

Nna memmpɛ dɛ medze n’afotu no yɛ edwuma, naaso ber kor no ara so mu no, nna mepɛ dɛ muhu dɛ ana dza ɔkãe no yɛ nokwar a. Afei misii gyinae dɛ mebɛkenkan Bible no. Mandy kãa dɛ menkenkan Daniel tsir 2, na dza mekenkanee wɔ hɔ no maa moho boow me. Nkɔnhyɛ a ɔwɔ hɔ no kã wiadze tumdzi nye aban ahorow a nna wobenya tum kɛse wɔ nkorɔfo do fi tsetse besi hɛn aber yi do no ho asɛm. Mandy maa muhun Bible nkɔnhyɛ afofor a ɔkã hɛn daakye ho nsɛm. Afei dze, nna mirinya me nsɛmbisa ahorow no ho mbuae! Naaso, woana na ɔkyerɛɛw dɛm nkɔnhyɛ ahorow yi, na woana na otum kãa dza obesi daakye no ho asɛm too hɔ pɛpɛɛpɛr dɛm? Ana obotum aba dɛ Nyankopɔn bi wɔ hɔ?

Mandy kãa moho asɛm kyerɛɛ awarfo bi a wɔfrɛ hɔn Horst nye Angelika. Nna wɔyɛ Adasefo, na wɔboaa me maa metsee Nyankopɔn n’Asɛm no ase yie. Annkyɛr na mubohun dɛ Jehovah Adasefo nkotsee nye ɔsom a wɔtaa dze Nyankopɔn ne dzin ankasa Jehovah no dzi dwuma na wɔtwe adwen so si do. (Ndwom 83:18; Matthew 6:9) Musũaa dɛ Jehovah Nyankopɔn abɔ ne tsirmu dɛ ɔbɛma nyimpa atsena ase daa wɔ Paradise asaase do. Ndwom 37:9 kã dɛ: “Na hɔn a wɔtweɔn [Jehovah] dze, wobenya asaase no edzi.” M’enyi gyee aber a mubohun dɛ obiara a ɔdze Nyankopɔn n’abrabɔ gyinapɛn bɔbɔ ne bra no botum atsena ase daa.

Naaso, nna ɔnnda famu mma me dɛ mebɛyɛ nsakyer a no ho hia na ama meetum dze akwankyerɛ ahorow a ɔwɔ Bible mu no ayɛ edwuma. Nna midzi yie wɔ ndwontow nye mfonyin a modorɔw no mu, na iyi maa mebɛyɛɛ ahantan. Ntsi nna ɔwɔ dɛ midzi kan sũa ahobrɛadze. Afei so, nna ɔnnda famu mma me dɛ mebegyaa ehuhubra a nna mobɔ no. Jehovah wɔ hɔn a wɔpɛ dɛ wɔyɛ dza wobotum biara dze dza Bible no kyerɛkyerɛ yɛ edwuma no ho abotar, na ɔda mbɔbɔrhu edzi kyerɛ hɔn. Iyi ka m’akoma papaapa!

Ofitsi mo mbofrase kesi me mfe 18 mu no nyina nna menngye Nyankopɔn nndzi, na metaa Communist aban no ekyir. Naaso midzii mfe 18 ekyir no, Bible no asesa m’abrabɔ dze ebesi ndɛ. Dza musũae no boaa me ma minyaa daakye ho enyidado papa na ɔmaa minyaa asetsena a tsirmpɔw wɔ mu. Wɔ afe 1993 mu no, wonumaa me dɛ Jehovah adasefo no mu kor, na wɔ afe 2000 mu no, mowaar ɔbaa bi a menye no wɔ gyedzi kor mu a wɔfrɛ no Tabitha. Ɔbɔ noho mbɔdzen wɔ Jehovah no som mu. Yɛdze hɛn mber pii boa nkorɔfo ma wohu Bible mu nokwasɛm ahorow. Nkan no nna menngye Nyankopɔn nndzi, na metaa Communist aban no ekyir. Yɛtaa hyia nkorɔfo so a wɔtse dɛm. Sɛ moboa hɔn ma wohu Jehovah a, m’akoma tɔ me yamu!

Aber a mehyɛɛ ase nye Jehovah Adasefo bɔe no, nna m’awofo enyi nngye ho koraa. Naaso ofitsi dɛ menye hɔn bɔe no, woehu mbrɛ Jehovah Adasefo a menye hɔn bɔ no enya nkantando pa wɔ m’asetsena mu. Ɔyɛ me enyigye papaapa dɛ seseiara wɔkenkan Bible no na wɔkɔ Christianfo nhyiamu a Jehovah Adasefo yɛ no bi.

Emi na Tabitha nyina enya awar mu enyigye, osiandɛ yɛbɔ mbɔdzen dɛ yɛdze afotu a Bible no dze ma awarfo no bɛyɛ edwuma. Dɛ nhwɛdo no, Bible akwankyerɛ a ɔnye dɛ ɔsɛ dɛ awarfo dzi hɔnho nokwar no a yɛdze yɛ edwuma no aboa hɛn ma hɛn awar asɔ.​—Hebrewfo 13:4.

Seseiara dze, munnsuro dza obesi daakye na asetsena mu dadwen so nnhyɛ mo do. Metse nka dɛ meka wiadze nyina ebusua bi a hɔn mufo nye me wɔ gyedzi kor no ho. Koryɛ wɔ dɛm ebusua yi mu na wɔwɔ asomdwee so. Wɔ dɛm ebusua yi so mu no, yehu hɛnho dɛ yɛyɛ kor na obiara mmbu noho dɛ ɔkyɛn obi. Iyi nye dza nna megye dzi, na mepɛ dɛ minya wɔ m’asetsena mu no.