HOM NKƆ DO NWƆEN!
Ɔko A Amanyɛsɛm Dze Ba—Ebɛn Asɛm Na Bible No Ka Fa Ho?
Ɔko a amanyɛsɛm dze ba ndaansa yi no, ama nkorɔfo pii no ara abɔ hu.
Sɛ yɛhwɛ Mexico dɛm yi a, nyimpa a wogyina ma wɔtow hɔn do aba no, hɔn mu 39 na woekunkum hɔn. Iyi dɔɔso paa. Afei so ɔko a amanyɛsɛm dze ba no ama nkorɔfo pii no ara abɔ hu. Na osian iyi ntsi, abatow a ɔbɔkɔ do mfe 2023 kesi 2024 no wosuro dɛ wɔbɔkɔ akɔtow.
Ndaansa yi, ɔko a amanyɛsɛm dze ba ebu do wɔ Europe. May 15, 2024 no, binom bɔɔ mbɔdzen dɛ nkyɛ worukoku Slovakia ɔsoafo panyin no.
July 13, 2024 wɔ United States no, obi yɛɛ dɛ nkyɛ oruku ɔman panyin dadaw Donald Trump.
Ebɛn adze ntsi na ɔko a amanyɛsɛm dze ba no ebu do dɛm? Da bɛn na ɔbɛba ewiei? Ebɛnadze na Bible ka fa ho?
Amanyɛsɛm a wɔama nyimpa mu akyekyɛ no wɔkaa ho asɛm too hɔ
Bible no kaa too hɔ dɛ mber a yɛtse mu yi mu no, nyimpa hɔn suban bɛma etsirmɔdzensɛm na menntse moho ase ebu do. Ɔno na wɔfrɛ no “nda a odzi ekyir no.”
“Nda a odzi ekyir no mu awerɛhow ber bɛba. Na nyimpa bɛyɛ . . . bɔnyiayɛfo, hɔn a hɔn ho nntsew, . . . asɛnkadofo, . . . abɔyafo, . . . yimafo, etsiɔdzenfo, ahomemadofo.”—2 Timothy 3:1-4.
Bible san kaa dɛ ndzɛmba ahorow a ɔsɛɛ asomdwee tse dɛ etuatsew na basabasayɛ a amanyɛsɛm dze ba no bobu do wɔ hɛn ber yi mu. (Luke 21:9) Naaso, mpaapaamu na ɔko a amanyɛsɛm dze ba no renntsena hɔ daa. Ɔnyɛ dɛn ara a no tun botwa.
Ɔko a amanyɛsɛm dze ba no no tun botwa
Bible no ma yehu dɛ, Nyankopɔn dze n’aban a ɔwɔ sor no bɛba ebesi nyimpa aban nyina anan mu.
‘Ɔsor Nyankopɔn bɛma ahendzi bi a. . . obobubu ahendzi yinom pɔsɔpɔsɔ na ɔama ɔasa, na ɔnodze begyina daa.’—Daniel 2:44.
Nyankopɔn n’Ahendzi no bɛka nyimpa abɔ mu, na ɔama asomdwee ebu do wɔ wiadze nyinara.
Ahendzi no do Hen a wɔsan frɛ no “Asomdwee Hen,” no bɔhwɛ dɛ “n’asomdwee ne trɛ nnkodu ewiei.”—Isaiah 9:6, 7.
Sesei mpo hɔn a dɛm ahendzi yi dzi hɔn do tum no rusua mbrɛ wobesi ama asomdwee atsena hɔn ntamu. Iyi ntsi na Bible no ka dɛ: “wɔdze hɔn mfona abobɔ nsɔw, na wɔdze hɔn mpeaa abobɔ nsɔsɔw: ɔman bi remma afona do nntsia ɔman fofor, eso worunnsua akodzi bio.”—Isaiah 2:3, 4.
Sɛ epɛ iyi ho nsɛm pii a, kenkan asɛm a wɔato dzin “Ebɛnadze Na Nyankopɔn N’Ahendzi No Bɛyɛ?” na hwɛ video a wɔato dzin Ebɛnadze Nye Nyankopɔn N’Ahendzi?