HOM NKƆ DO NWEƆN!
Nsɛm A Osisii Wɔ Afe 2022 Mu No, Nna N’ano Yɛ Hyew Paa—Ebɛn Asɛm Na Bible No Ka Fa Ho?
Afe 2022 mu no, akodzi, atoyerɛnkyɛm nye sikasɛm mu ahokyer ho amandzɛɛbɔ na yɛtsee paa. Bible no nkotsee na ɔma yehu siantsir a nsɛm ahorow a ɔtse dɛm no sisi.
Dza nsɛm a osisii wɔ 2022 mu no ma yehu
Nsɛm ahorow a osisii wɔ afe 2022 mu no ma yehu dɛ yɛtse mber a Bible no frɛ no “nda a odzi ekyir no mu.” (2 Timothy 3:1) Nda a odzi ekyir no hyɛɛ ase fii 1914. Hwɛ mbrɛ nsɛm ahorow a osisi ndaansa yi foa dza Bible no kaa too hɔ no do.
Akodzi.—Matthew 24:6.
“2022 Yɛ Afe A Ɔko A Ɔyɛ Hu Paa Sanee Yii Ne Tsir Wɔ Europe.” a
Kenkan asɛm a wɔato dzin “Russia Ato Ahyɛ Ukraine Do.”
“Ɔkɔm.”—Matthew 24:7.
“2022: Afe A Edzibansɛm Ho Yɛɛ Dzen Paa.” b
Kenkan asɛm a wɔato dzin “Ɔko A Ɔrokɔ Do Wɔ Ukraine No Ama Edzibansɛm Ho Ayɛ Dzen.”
Yarba ahorow a ɔyɛ hu.—Luke 21:11.
“Polio sanee yii ne tsir, monkeypox gyee nsamu na COVID-19 da ho ara rehaw adwen. Dɛm yarba ahorow yi ama yeehu dɛ ampa, yarba botum abɔ obiara aber a ɔnnhwɛ kwan, na wɔasan so ama yeehu mbrɛ nsanyarba yɛ hu fa.” c
Kenkan asɛm a wɔato dzin “COVID-19 Yarba No Ekunkum Nyimpa Ɔpepem 6.”
Nsɛm a ɔyɛ hu.—Luke 21:11.
“Afe 2022 ne finimfin hɔ beebi no, wimu yɛɛ hyew paa, gya totɔɔ mbeambea pii na ɔpɛ a n’ano yɛ dzen so sii. Afei so nsu yirii faa mbea ahorow pii. Dɛm atoyerɛnkyɛm ahorow a osisii yi sɛɛ ndzɛmba pii, na ɔmaa nyimpa mpempem pii wuwui, nyimpa beberee so hɔn efie sɛɛe. Hɛn werɛ rimmfir dɛm nsɛm a osisii yi da.” d
Kenkan asɛm a wɔato dzin “Wimu Ayɛ Hyehyeehyew Wɔ Wiadze Yi Mu Beebiara.”
“Basabasayɛ.”—Luke 21:9.
“Afe 2022 mu no, ɔmamfo dze ebufuw yɛɛ ɔyɛkyerɛ a no mu yɛ dzen osian sikasɛm mu ahokyer nye ndzɛmba a no bo yɛɛ dzen no ntsi.” e
Kenkan asɛm a wɔato dzin “Ndzɛmba No Bo Rokɔ Sor Paa Wɔ Wiadze Yi Mu Beebiara.”
Ebɛnadze na obesi wɔ afe a odzi hɔ no mu?
Obiara nnyim dza obesi wɔ 2023. Dza yenyim nye dɛ, ɔrennkyɛr biara Nyankopɔn n’Ahendzi anaa ɔsor aban no bɛyɛ ndzɛmba yie wɔ hɛn asaase yi do. (Daniel 2:44) Dɛm aban yi beyi ndzɛmba a ɔdze amandzehu ba nyinara efi hɔ na ɔbɛma Nyankopɔn n’apɛdze ayɛ hɔ wɔ asaase yi do.—Matthew 6:9, 10.
Yɛhyɛ wo nkuran dɛ tsie Jesus Christ n’afotu na ‘kɔ do weɔn’ mbrɛ ɔbɛyɛ a ibohu Bible nkɔnhyɛ a ɔreba mu no. (Mark 13:37) Sɛ epɛ dɛ ihu mbrɛ Bible no botum aboa wo ndɛ nye mbrɛ obotum aboa ɔwo na w’ebusua ma hom enya daakye ho enyidado papa a, enye hɛn ndzi nkitaho.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.
Bi A W'enyi Bɛgye Iyi So Ho
BIBLE MU NSƐMBISA A WOEBUA
Ebɛn Ndzɛmba Na Sɛ Osisi A Ɔbɛkyerɛ Dɛ Yɛwɔ “Ewiei Ber” Anaa “Nda A Odzi Ekyir” No Mu?
Ndzɛmba pii na Bible no kae too hɔ dɛ sɛ ɔbɔ mu sisi a ɔbɛkyerɛ dɛ yɛwɔ nda a odzi ekyir no mu.
ESSENTIAL BIBLE TEACHINGS
Nyankopɔn N’ahendzi No, Ɔyɛ Ebɛnadze?
Jesus baa asaase do no, ɔkãa Nyankopɔn n’Ahendzi ho asɛm kyɛɛn asɛm fofor biara. Mfe ɔhaha pii nye yi, Jesus n’ekyirdzifo abɔ mpaa dɛ dɛm Ahendzi no mbra.
BIBLE NKYERƐKYERƐ ETSITSIR
Nyankopɔn N’Ahendzi Hyɛɛ Ase Dzii Tum Wɔ 1914
Bɔbor mfe 2,500 nye yi no, Nyankopɔn maa ɔhempɔn bi soo daa bi. Dɛm adaaso no rinya ne mbamu ndɛ.
HƐNHO NSƐM
Ma Obi Nye Wo Nsua Bible
Ma wɔnye wo mbɔ Bible mu asɛmbisa bi a ɔkyer w’adwen no ho nkɔmbɔ, anaa sua Jehovah Adasefo ho nsɛm pii.
