Hɛn nyina rohwɛ kwan dɛ ndzɛmba bɔkɔ yie ama hɛn nye hɛn mbusua wɔ 2023 afe fofor a yɛahyɛ ase yi mu. Ebɛnadze ntsi na yebotum enya enyidado a ɔtse dɛm?

 Bible no wɔ asɛmpa bi ma hɛn. Ɔno nye dɛ ɔhaw ahorow a yerihyia no ndɛ no renntsena hɔ daa, mbom no ɔnnkɛkyɛr ne nyina befi hɔ. Nokwasɛm nye dɛ, wɔkyerɛɛw Bible no ‘maa hɛn nkyerɛkyerɛ, ama ɔnam kyerɛwnsɛm no n’awerɛkyekyer do yeenya enyidado.’​—Romefo 15:4.

•   Sɛ epɛ dɛ ihu bɔ ahorow a Bible no ahyɛ no ho nsɛm pii a, kenkan asɛm a wɔato dzin “A Real Hope for a Better Tomorrow.”

 Enyidado a Bible no ka ho asɛm no tse dɛ ‘sekyɛ ma hɛn nkwa.’ (Hebrewfo 6:19) Dɛm enyidado yi botum aboa hɛn wɔ hɛn asetsena mu. Obotum aboa hɛn ma yeegyina ɔhaw ahorow a yehyia no ndɛ no ano. Afei so, ɔremma ndzɛmba bɔn a ɔrokɔ do no ho asɛm nnhaw hɛn pii, mbom no ɔbɛma yeenya awerɛhyɛmu dɛ yebotum enya enyigye afebɔɔ. Dɛ nhwɛdo no:

•   Hwɛ video a wɔato dzin Nna M’abrabɔ Afon Me no. Na ibohu mbrɛ enyidado a Bible no ka ho asɛm no boaa kɔwensanyi bi ma ɔsesaa n’abrabɔ.

•   Afei so, sɛ ehwɛ video a wɔato dzin Awerɛkyekyesɛm Bi Ma Hɔn A Hɔn Dɔfo Ewu no a, ibohu mbrɛ enyidado a Bible no ka ho asɛm no botum aboa hɛn aber a hɛn dɔfo bi ewu no.

 Nyimpa pii wɔ hɔ a, wɔrohwɛ kwan dɛ wobenya adze pa bi wɔ hɔn asetsena mu, naaso wonnyi awerɛhyɛmu biara dɛ hɔn akwanhwɛ no bɛba mu. Naaso bɔhyɛ ahorow a ɔwɔ Bible mu no dze, yebotum enya mu awerɛhyɛmu. Ebɛnadze ntsi a? Osiandɛ Jehovah Nyankopɔn a nankasa na ɔahyɛ bɔ ahorow a ɔtsetse dɛm no. Na yenyim so dɛ ɔyɛ Nyankopɔn a “onndzi ator.” (Titus 1:2) Jehovah nkotsee na ɔwɔ tum a ɔdze bedzi no bɔhyɛ nyina do; obotum ayɛ adze a ɔpɛ biara.​—Ndwom 135:5, 6.

 Yɛpɛ dɛ woara so nya enyidado a Bible no dze ma no do mfaso. Sɛ egye ber ‘hwehwɛ Kyerɛwnsɛm no mu yie’ a, obotum aboa wo ma aahyɛ enyidado a ewɔ no mu dzen. (Asomafo Ndwuma 17:11) Sɛ epɛ dɛ ehwehwɛ Bible no mu yie a, ma Jehovah Adasefo nye wo nsua Bible no a irunntua hwee. Nya enyidado, na fa enyigye hyɛ 2023 ase!