Amandzɛɛbɔ a aba ndaansa yi kyerɛ dɛ, a sɛ woyi wiadze yi mu nyimpa anan biara si hɔ a, hɔn mu kor tse nka dɛ ɔayɛ ankonam.

•   “Ɔmmfa ho mfe a obi edzi anaa beebi a ɔtse no, nyimpa biara botum atse nka dɛ wɔayɛ ankonam.”​—Chido Mpemba na ɔkaa asɛm yi. Ɔka World Health Organization kuw a ɔhwɛ Social Connection do no ho.

 Nyimpa pii tse nka dɛ, hɔn a hɔn mfe akɔ enyim paa na wɔtaa yɛ ankonam. Naaso ɔnntse dɛm. Mberantsɛ na nkataasia, hɔn a wɔtse apɔw, hɔn a woeenya sika, nye awarfo nyina botum atse nka dɛ wɔayɛ ankonam. Sɛ obi tsew noho fi afofor ho anaa ɔtse nka dɛ wɔayɛ ankonam a, obotum ama ɔayar na adwendwen so bɛhyɛ no do.

•   “Dɔkta panyin bi a ɔwɔ United States a wɔfrɛ no Dr. Vivek Murthy kaa dɛ, “ankonamyɛ nnyɛ atsenka bɔn a obi nya kɛkɛ, mbom ɔkɔ ekyir kyɛn dɛm.” Ɔdze kaa ho dɛ: “Dɛ mbrɛ obi nom sigarɛt nkorkor 15 da kor a obotum ewu no, dɛmara na ankonamyɛ so botum edzi obi ewu.”

 Hɛn Bɔfo no mmpɛ dɛ yɛyɛ ankonam. Nyankopɔn no botae a ɔwɔ ma nyimpa fi tsetseetse nyina nye dɛ, wɔnye hɔnho bɔbɔ na hɔn enyi agye.

•   Bible mu afotusɛm: “Nyankopɔn kaa dɛ: ‘Onnye dɛ nyimpa no nko tsena hɔ.’”​—Genesis 2:18.

 Nyankopɔn pɛ dɛ yɛnye no nya ebusuabɔ. Ɔahyɛ hɛn bɔ dɛ sɛ yɛbɛn no a ɔbɛbɛn hɛn.​—James 4:8.

•   Bible mu afotusɛm: “Nhyira aka sunsum mu ehiafo, na hɔn na ɔsor ahenman no yɛ hɔn dze.”​—Matthew 5:3.

 Nyankopɔn pɛ dɛ yɛnye afofor bom som no. Sɛ yɛyɛ dɛm a ɔma hɛn akoma tɔ hɛm yamu.

•   Bible mu afotusɛm: “na hom mma yɛndwendwen hɛnho do, nnunu hɛnho nkɔ dɔ nye ndwuma pa mu, hɛn werɛ mmfir hɛnho ehyiadzi, . . . na yentutu hɛnho fo.”​—Hebrewfo 10:24, 25.

 Sɛ epɛ dɛ ihu mfaso a ibenya ber a ako etsia ankonamyɛ a, kenkan asɛm a wɔato dzin “Loneliness in a World of Mass Connection.”