Ndaansa yi, aban mpanyimfo, abɔdzenyansahufo nye hɔn a wɔaben wɔ abaɛfor dwumadzi mu no gye dzi dɛ, sɛ yɛfa abaɛfor kwan do ma efir bi tum yɛ n’adze dɛ nyimpa a ɔbɔboa hɛn paa. Borɔfo kasa mu no, wɔfrɛ dɛm abaɛfor dwumadzi yi artificial intelligence (AI). Ɔwɔ mu, wɔgye to mu dɛ mfaso pii wɔ do dze, naaso wɔsan suro ɔhaw ahorow a obotum efi mu aba no so.

•   “Ndɛ abaɛfor dwumadzi a obotum aboa nyimpa paa no, no mu kor nye AI . . . Ber kor noara so, AI botum ama obi ne bambɔ ho aba asɛm, ne fahodzi anaa ne kukua mu nsɛm epue anaa wɔahwer ahotodo na gyedzi a ɔwɔ wɔ ka-bi-ma-menka-bi amambu bi mu.”​—Kamala Harris, United States ɔmampanyin abadziekyir, May 4, 2023.

•   Dr Frederik Federspiel a ɔda adɔktafo nye apɔwmudzen ho enyimdzefo kuw bi ano kaa wɔ asɛm bi a wɔato dzin BMJ Global Health a ɔbae wɔ May 9, 2023 mu dɛ: “Ɔwɔ mu, artificial intelligence (AI) aboa ma kwan a wɔfa do sa yarba pii noara enya nkɔenyim dze, naaso ɔdze ɔhaw pii nso abrɛ adasamba.” a

•    “Nkorɔfo botum dze AI atserɛw atorsɛm mu. Na ɔrennkyɛr nyimpa pii hɔn edwuma befi hɔn nsa. Abaɛfor dwumadzi a orinya nkɔenyim no ama nyimpa binom suro dɛ mber rokɔ do no, AI botum dze nyimpa nkwa mpo ato esian mu.”​—The New York Times, May 1, 2023.

 Sɛ AI bɔboa hɛn o, sɛ obepira hɛn o mber na ɔbɛkyerɛ. Naaso ebɛn asɛm na Bible no ka fa ho?

 Bible no ma yehu siantsir a yerunntum mmfa hɛn werɛ nnhyɛ abaɛfor dwumadzi ahorow mu dɛ ɔno na ɔbɔboa hɛn.

1.  1. Ɔmfa ho adwen pa a obi dze reyɛ biribi no, nnyɛ aber nyina na obohu ɔhaw ahorow a obotum efi dza ɔreyɛ no mu aba.

   •   “Ɔkwan bi wɔ hɔ a ɔyɛ dɛ ɔtsen ma nyimpa, na n’ewiei yɛ owu akwan.”​—Mbɛbusɛm 14:12.

2.  2. Obi runntum nnkyerɛ dɛ afofor dze dwumadzi bi a ɔayɛ bedzi dwuma wɔ kwan pa anaa kwan bɔn do.

   •   ‘Otwar dɛ medan m’edwuma gya nyimpa a obedzi m’ekyir aba no. Na woana nyim dɛ sɛ ɔbɛyɛ onyansafo o, anaa ɔkwasea o? Naaso obedzi me berɛ nyinara a maberɛ na makyerɛ mu nyansa wɔ wi ase no no do.’​—Ɔsɛnkafo 2:18, 19.

 Dza yeesusu ho yi ama yeehu dɛ yerunntum mmfa hɛnho nyina nnto abaɛfor dwumadzi ahorow do, mbom yehia akwankyerɛ fi hɛn bɔfo no hɔ.

  Hɛn Bɔfo no ahyɛ bɔ dɛ ɔremma kwan ma abaɛfor dwumadzi ahorow nnsɛe asaase na nyimpa

•   ‘Asaase betsim hɔ daa.’​—Ɔsɛnkafo 1:4.

•   “Atseneneefo benya asaase no edzi, na wɔaatsena mu daa.”​—Ndwom 37:29.

 Hɛn Bɔfo no nam Bible no do ma hɛn akwankyerɛ a ɔbɛma yeenya asomdwee na ahotɔ mapa daakye. Sɛ epɛ dɛ ihu pii fa dza Bible no ka fa asɛm yi ho a, kenkan nsɛm a odzidzi do yi“ Is There a Reliable Guide to a Secure Future?” nye “A Real Hope for a Better Tomorrow.”