Ndɛ ɔyɛ dzen ma nyimpa pii a wɔwɔ wiadze yi mu dɛ hɔn nsa bɔkɔ hɔn ano, na adze rekye na adze resa nyina nna ndzɛmba mu dzen ara na ɔreyɛ.

•   Amandzɛɛbɔ bi a ɔbaa ndaansa yi  a maa ɔbɛdaa edzi dɛ, ndɛ sɛ ekɔ wiadze yi mu beebiara a, “akatua a nkorɔfo gye no do atsew.” Wɔsan so kaa dɛ, sɛ wɔannyɛ asɛm yi ho hwee a, “esikafo bɔkɔ do ara ayɛ esikafo na ehiafo so bɔkɔ do ara edzi hia kɛse.” Iyi bɛma “asetsena mu ayɛ dzen ama hɔn a wɔyɛ edwuma nye hɔn mbusua aber nyina.”

 Ehwɛ a, aban ahorow a wɔwɔ hɔ ndɛ no botum edzi ɔhaw yi ho dwuma anaa mpo dɛ woeyi efi hɔ?

 Bible no ma yehu dɛ, aban bi wɔ hɔ a obotum eyi sikasɛm mu ahokyer efi hɔ mbrɛ ɔbɛyɛ a esikafo na ehiafo nyina bɛyɛ pɛ. Ɔka dɛ “Nyankopɔn bɛma ahendzi bi do.” Ɔbɛyɛ aban kor pɛ a obedzi wiadze nyina do. (Daniel 2:44) Dɛm aban no tumdzi ase no, obiara ho bɔtɔ no. (Ndwom 9:18) Nyankopɔn Ahendzi no bɔhwɛ ma obiara ne nsa aka dza ohia biara mbrɛ ɔbɛyɛ a hɔn enyi bɛgye na obiara benya n’edwuma pa do akatua.​—Isaiah 65:21, 22.