Aman ahorow a wɔwɔ Amanaman Nkabɔmu Kuw no mu no yɛɛ nhyiamu bi faa mbrɛ wobedzi wimu tsebea a ɔresɛɛ no ho dwuma. (COP27 United Nations Climate Change Conference.) Wowiee dɛm nhyiamu yi Kwesida, November 20, 2022. Aman ahorow pii wɔ hɔ a wonnyi sika na wimu tsebea a ɔresɛɛ no so rehaw hɔn paa. Ntsi nhyiamu no ase no aban mpanyimfo no sii gyinae dɛ, wɔbɛma aman a wɔtse dɛm no sika bi a ɔbɔboa hɔn ma woeegyina wimu tsebea a ɔresɛɛ no ano. Naaso asɛm a nyimpa pii reka nye dɛ, iyi remma wimu tsebea a ɔresɛɛ no nngyaa.

•   António Guterres a ɔyɛ Amanaman Nkabɔmu Kuw no kyerɛwfo panyin no dze too gua wɔ November 19, 2022 dɛ: “M’enyi agye paa dɛ woesi gyinae dɛ wobeyi sika dze aboa hɔn a wimu tsebea a ɔresɛɛ no ntsi hɔn ho aka no. Naaso yenyim dɛ sika nkotsee runntum nndzi wimu tsebea a ɔresɛɛ no ho dwuma osiandɛ hɛn asaase yi noara, gye ara na ɔregye nsamu.”

•   “Ɔnnkɛkyɛr wimu tsebea no botum asɛɛ koraa na ɔdze nsunsuando bɔn kɛse bɛba hɛn asaase yi do.”​—Mary Robinson, Ireland ɔmampanyin dadaw, ɔpanyin a nna ɔda Amanaman Nkabɔmu Kuw No N’asoɛe A Ɔhwɛ Nyimpa Ne Fahodzi Ho Nsɛm Do no ano, November 20, 2022.

 Dza obotum ato hɛn asaase yi ho asɛm haw mbabun paa. Amanaman no ahyɛ bɔ dɛ wɔbɛma wimu tsebea a ɔresɛɛ no ayɛ yie, aso wobotum edzi dɛm bɔhyɛ yi do? Ebɛn asɛm na Bible no ka fa iyi ho?

 Bible no ma yehu dɛ ɔmmfa ho mbɔdzen a nyimpa robɔ dɛ wɔbɛma wimu tsebea a ɔresɛɛ no ayɛ yie no, hɔn nsa besi famu. Ma yɛnhwɛ siantsir ebien bi ntsi a ɔtse dɛm:

•   “Dza akyea no, wonnkotum atsen no.”​—Ɔsɛnkafo 1:15.

   Dza asɛm yi kyerɛ: Aban ahorow a wɔwɔ hɔ no, ɔnnyɛ dza wɔpɛ dɛ wɔyɛ nyina na wotum yɛ osiandɛ wɔammbɔ nyimpa dɛ ondzi ne nyɛnko nyimpa do tum. (Jeremiah 10:23) Sɛ amanaman no ka hɔnho bɔ mu mpo a, wonnkotum eyi wiadze haw nyina efi hɔ ɔmmfa ho mbɔdzen biara a wɔbɔbɔ no.

•   ‘Na nyimpa bɛyɛ ahopɛfo, sikapɛfo, hɔn a wonntum nnye hɔn nnyɛ apam.’​—2 Timothy 3:2, 3.

   Dza asɛm yi kyerɛ: Bible no kaa mber a yɛtse mu yi ho asɛm dɛ nyimpa piinara bɛyɛ pɛsɛankonya, na worimmfi hɔn pɛ mu nnye afofor mbɔ mu nnyɛ ndzɛmba a ɔbɔboa nkorɔfo.

 Ɔnnyɛ bɔ a aban ahorow no hyɛ no na ɔbɛma ndzɛmba akɔ yie wɔ hɛn asaase yi do. Nyankopɔn eyi obi a ɔfata paa a obotum edzi wiadze yi do tum, ɔno nye Jesus Christ. Bible no ka noho asɛm dɛ:

•   “Ahendzi no bɛda ne batsir do: na wɔbɛfrɛ ne dzin Ɔpamfo Nwanwanyi, Onyame Katakyi, Ɔdomankoma Egya, Asomdwee Hen.”​—Isaiah 9:6.

 Jesus na ɔyɛ Nyankopɔn n’Ahendzi a ɔwɔ sor no do Hen. (Matthew 6:10) Ɔwɔ tum na nyansa a ɔdze besiesie hɛn asaase yi, na ɔpɛ paa so dɛ ɔyɛ dɛm dze boa nyimpa a wɔtse asaase no do no. (Ndwom 72:12, 16) Jesus nam dɛm ɔsor ahendzi yi do beyi hɔn a “wɔsɛɛ asaase no” efi hɔ, na woeesiesie ndzɛmba a wɔasɛɛ wɔ do nyina.​—Nyikyerɛ 11:18; Isaiah 35:1, 7.

 Sɛ epɛ dɛ ihu adze a ɔbɛma hɛn wimu tsebea a ɔresɛɛ no ayɛ yie korakora ho nsɛm pii a, kenkan asɛm a wɔato dzin “Climate Change and Our Future​—What the Bible Says.”