Afe 2022 mu no, sika a wiadze no sɛɛ no wɔ akodze ho no dodow si U.S. dɔla ɔpepepepem 2.24. Sika a wiadze no sɛɛ no dɛm afe no kyɛn afe biara. Adze tsitsir a ɔmaa ɔbaa no dɛm nye dɛ, Russia towee hyɛɛ Ukraine do wɔ dɛm afe no mu. April 2023 mu no, Stockholm International Peace Research Institute (SIPRI) dze amandzɛɛbɔ bi too gua, wɔkaa dɛ afe 2022 mu no:

•   Sika a aman a wɔwɔ Europe no sɛɛ no wɔ akodze ho no, “obuu bɔɔ ho ɔha mu nkyekyɛmu 13 wɔ dɛm afe no mu. Ofi ber a United States nye Soviet Union ko no baa ewiei no, sika a Europe aman sɛɛ no wɔ akodze ho no, ɔnnkɔr sor dɛm da.”

•   “Sika a Russia…sɛɛ no wɔ akodze ho no, ɔkɔr n’enyim ɔha mu nkyekyɛmu 9 nye kakra. Aman a wɔsɛɛ sika paa wɔ akodze ho no, nkan no, nna Russia tɔ do 5. Naaso iyi ntsi, seseiara wɔtɔ do 3.”

•   Sɛ wɔka aman a wɔsɛɛ sika wɔ akodze ho paa a, fi tsetse besi ndɛ nyina United States na wodzi kan. “Sika a wɔsɛɛ no wɔ wiadze nyina akodze ho no, sɛ wɔkyekyɛmu ɔha a, United States sɛɛ no mu 39.”

 Ɔbemfo bi a wɔfrɛ no Nan Tian a ɔka ho bi ma wɔkyerɛɛw amandzɛɛbɔ a SIPRI dze too gua no kaa dɛ: “Sika dodow a aman ahorow no resɛɛ no wɔ akodze ho no ma yehu dɛ yɛtse wiadze a ahobambɔ biara nnyi mu mu.

 Bible no kaa too hɔ dɛ akasakasa bɛba aman ahorow a wɔwɔ tum no ntamu wɔ hɛn aber yi do. Na ɔsan ma yehu adze kor pɛ a obotum ama yeenya asomdwee.

•   Bible no frɛ mber a yɛtse mu yi dɛ “ewiei ber.”​—Daniel 8:19.

•   Daniel nwoma no hyɛɛ nkɔm dɛ wɔ ewiei ber mu no, aman ahorow a wɔwɔ wiadze yi mu no bɛper tumdzi ho. Dɛm aman ahorow yi nye hɔnho “befimfen,” kyerɛ dɛ wɔbɛko aper tumdzi. Dɛm ntsi nna iyi bɔhwehwɛ dɛ wɔsɛɛ hɔn “akoradze” pii anaa sika pii wɔ akodze ho.​—Daniel 11:40, 42, 43.

 Sɛ epɛ dɛm Bible nkɔnhyɛ yi ho nsɛm pii a, hwɛ video a wɔato dzin Nkɔnhyɛ A Wɔaba Mu​—Daniel Tsir 11.

•   Bible no ka dɛ Nyankopɔn dze n’Ahendzi besi nyimpa dze no ananmu. Ɔka dɛ Nyankopɔn ‘bɛma ahendzi a wɔrennsɛɛ no da, eso wɔrenndan n’ahendzi nngya ɔman fofor bi do; na obobubu ahendzi no pɔsɔpɔsɔ na ɔama ɔasa, na ɔnodze ɔbegyina daa.’​—Daniel 2:44.

•   Ɔrennkyɛr koraa Jehovah a Nyankopɔn bɛyɛ biribi a nyimpa biara nntumii nnyɛɛ da​—ɔno nye dɛ ɔbɛma yeenya asomdwee mapa. Ɔbɛyɛ no dɛn? Ɔnam n’Ahendzi no do beyi basabasayɛ nye akodze nyina efi hɔ.​—Ndwom 46:8, 9.

 Sɛ epɛ dɛ ihu pii fa dza Nyankopɔn n’Ahendzi no bɛyɛ ho a, kenkan asɛm a wɔato dzin “Under God’s Kingdom ‘Peace Will Abound.’”