Abɔdzenyansahufo dze too gua wɔ January 24, 2023 dɛ, aka kakrabaa na Doomsday Clock a (watch a abɔdzenyansahufo hɔn adwen yɛ hɔn dɛ ɔkyerɛ ber a wiadze yi bɛsɛɛ) no abɔ esuom 12. Na sɛ onya ara bɔ esuom 12 a, dza ɔkyerɛ nye dɛ, wiadze yi bɛsɛɛ.

•   “Ndzɛmba pii na orisisi wɔ wiadze yi mu, bi tse dɛ ɔko a ɔrokɔ do wɔ Ukraine no, nuclear topaa ho nsɛnsɛm, nye wimu tsebea a ɔresɛɛ no. Abɔdzenyansahufo atsena hɔ esusu dɛm nsɛm yi nyina ho, na Benada no wɔdze too gua dɛ, ɔrennkyɛr koraa nyimpa bɛsɛɛ asaase no. Ntsi wɔkyerɛ dɛ ‘Doomsday Clock’ no akɔ n’enyim paa, na wɔaka kakraabi ma wɔabɔ esuom 12.”​—AFP International Text Wire.

•   “Benada no, abɔdzenyansahufo kaa dɛ, aka minitsi kor na fa na ‘Doomsday Clock’ no abɔ esuom 12​—dɛ mbrɛ adasamba abɛn har-magedon dze, bi nnsii da.”​—ABC News.

•   “Abɔdzenyansahufo a wofi aman ahorow pii do abɔ kɔkɔ dɛ, mbrɛ ndzɛmba rotow kɔ no dze, ɔrennkyɛr koraa adasamba hɔn ase bɛhyew efi asaase yi do, na dɛ mbrɛ yɛabɛn wiadze yi ne sɛɛ dze, bi nnsii da.”​—The Guardian.

 Aso ɔyɛ nokwar dɛ, ɔrennkyɛr koraa hɛn asaase yi bɛsɛɛ ma adasamba hɔn ase ahyew pasaa? Aso ɔsɛ dɛ yesuro dza obesi daakye? Ebɛn asɛm na Bible no ka fa iyi ho?

 Bible no ma yehu dɛ, ‘asaase no tsim hɔ daa’ na nyimpa ‘bɛtsena do daa.’ (Ɔsɛnkafo 1:4; Ndwom 37:29) Dɛm ntsi, nyimpa runntum nnsɛɛ hɛn asaase yi korakora, na dɛmara so na ɔremmba da dɛ, osian nyimpa hɔn ndzeyɛɛ ahorow bi ntsi, obiara runntum ntsena asaase yi do.

 Naaso, Bible no ka ewiei bi a ɔbɛba ho asɛm. Dɛ nhwɛdo no, ɔka dɛ “wiadze rutwa mu.”​—1 John 2:17.

•   Sɛ Bible no ka wiadze n’ewiei a, ɔkyerɛ dɛn? Sɛ epɛ dɛ ihu dza ɔkyerɛ a, kenkan asɛm a wɔato dzin “Is the World Coming to an End? What Is the Apocalypse?”

•   Ebɛn aber na wiadze yi ewiei bɛba, na ebɛn nsɛm na obesisi aber a wiadze yi reba n’ewiei no? Sɛ epɛ dɛ ihu dza Bible no ka fa ho a, kenkan asɛm a wɔato dzin “When Will the World End?”

 Ɔwɔ mu dɛ ɔhaw ahorow pii ahyɛ wiadze yi mu ma, naaso Bible no botum aboa hɛn amma yɛammpa abaw. Ebɛn kwan do?

•   Bible no ma hɛn afotu a ɔboa hɛn wɔ hɛn da biara da asetsena mu. (2 Timothy 3:16, 17) Dɛ nhwɛdo no, kenkan asɛm a wɔato dzin “How to Control Worry,” na ibohu dɛ ɔmmfa ho ɔhaw ahorow a irihyia no, Bible no botum aboa wo ma eegyina ano, na iyi remma w’abaw mu mmbu.

•   Bible no ma yenya awerɛhyɛmu dɛ ndzɛmba bɛyɛ yie daakye. (Romefo 15:4) Afei so, ɔma yehu ndzɛmba a obesisi wɔ mber a yɛtse mu yi mu, nye dza obesisi daakye so. Na iyi remma dza orisisi ndɛ nye dza obesisi daakye no mmbɔ hɛn hu koraa.

 Sɛ epɛ dɛ isua pii fi wo Bible mu a, yɛserɛ wo dɛ ma Jehovah Adasefo nye wo nsua Bible no a irunntua hwee.