Ndɛ, nyimpa bɛyɛ ɔpepem 70 na hɔn asowa esisiw wɔ wiadze nyina. Na wɔdze mmum kasa bɔbor 200 na wɔdze dzi nkitaho. Awerɛhosɛm nye dɛ, nyimpa binom nye hɔn a hɔn asowa esiw no nndzi no yie. Dza wɔdze yɛ hɔn no bi nye yi:

•   “Wiadze yi mu beebiara no, hokwan a hɔn a hɔn asowa esiw koraa nye hɔn a wɔnntse asɛm papa wɔ no, wɔmmfa mma hɔn.”—National Association of the Deaf (U.S.).

•   “Ekɔ aman ahorow bi do a, hɔn a hɔn asowa esiw no dzi hia paa. Osian iyi ntsi ɔyɛ dzen ma hɔn dɛ wɔbɔkɔ skuul, wobenya edwuma papa ayɛ na dɛmara so na ɔyɛ dzen ma hɔn dɛ wɔbɛtse nsɛm a ɔrokɔ do wɔ ɔman no mu no.”—World Federation of the Deaf.

 Hɔn a hɔn asowa esiw no, Nyankopɔn tse nka dɛn wɔ hɔn ho? Ebɛnadze na Bible no ka fa hɔn a hɔn asowa esiw no ho? Na ebɛn adze na Jehovah Adasefo yɛ dze boa hɔn ndɛ?

Mbrɛ Nyankopɔn Hu Hɔn A Hɔn Asowa Esiw No

 Bible no ma yehu dɛ, Jehovah a Nyankopɔn dwen hɔn a hɔn asowa esiw no ho. Ɔpɛ dɛ yɛnye hɔn dzi no yie na wosua no ho adze na wonya dza worusua no do mfaso.

 Kyerɛwsɛm: “Mma nndom otsitsifo.”—Leviticus 19:14.

 Kyerɛwsɛm: “Nyankopɔn nnhwɛ nyimpa enyim.”—Asomafo Ndwuma 10:34.

 Kyerɛwsɛm: ‘Na Jesus kekyinii,. . . , na ɔkaa Ahenman no ne nsɛmpa no ho asɛm.’—Matthew 9:35.

 Kyerɛwsɛm: Jesus maa “etsitsifo tsee asɛm na ɔmaa mmum kasae.”—Mark 7:37.

 Kyerɛwsɛm: “Etsitsifo asowa mu ebuebue.”—Isaiah 35:5.

 Dza Ɔkyerɛ: Jehovah aka ato hɔ dɛ hɔn a hɔn asowa esiw no bɛtse asɛm.—Isaiah 29:18.

Dza Jehovah Adasefo Yɛ Dze Boa Hɔn A Hɔn Asowa Esiw No

 Jehovah Adasefo ka enyidado a Nyankopɔn dze ama hɔn no ho asɛm kyerɛ hɔn a hɔn asowa esiw no wɔ wiadze nyina. Ebɛn kwan na yɛfa do yɛ dɛm? Yɛakyerɛ Bible no na video ahorow a ɔka Bible a yɛnye nkorɔfo sua no ho asɛm ase kɔ mmum kasa bɔbor 100 mu. Afei so, yɛyɛ Bible adzesua na Christianfo nhyiamu wɔ mmum kasa mu. Yɛyɛ iyi nyina dze boa hɔn a wɔhwehwɛ Nyankopɔn hɔ mboa no. Na yɛnngye hɔn hwee so. Ebɛnadze ntsi a? Osiandɛ, Jesus hyɛɛ hɛn dɛ: “Hom enya no kwa: hom mfa mma kwa.”—Matthew 10:8.

 Wo nsa botum aka dza yɛabobɔ do yi bi wɔ intanɛt do anaa ibotum atwe bi egu wo fon do wɔ:

 JW.ORG. Ɔmmfa ho beebiara a ewɔ wɔ wɛbsaet no do no, sɛ epɛ nsɛm bi wɔ mmum kasa pɔtsee bi mu a, klek kasa ahyɛnsewdze a ɔwɔ sor hɔ no do, na bɔ mmum kasa a epɛ no do.

 JW Library Sign Language app. Sɛ edze app yi a wɔnntɔn yi gu wo fon anaa wo elɛktrɔnek efir do a, ibotum atwe video ahorow wɔ mmum kasa mu egu do, anaa ahwɛ no wɔ hɔ.

Ebɛnadze Na Yɛyɛ Dze Boa Hɔn A Hɔn Asowa Esiw No Ama Woeesua Bible No?

 Bible no wɔ mmum kasa mu. New World Translation of the Holy Scriptures a ɔwɔ America mmum kasa mu no, ɔno nye Bible a odzi kan a wowiee ne nyina wɔ mmum kasa mu wɔ wiadze nyina. Seseiara, wɔayɛ New World Translation no nyina anaa ne fa bi wɔ mmum kasa pii mu. Na afe biara wɔkyerɛ ase kɔ mmum kasa afofor mu. (Sɛ epɛ dɛ ihu mmum kasa ahorow a wɔakyerɛ Bible no ase akɔ mu anaa epɛ dɛ ehwɛ wɔ intanɛt no do a, hwɛ adakaba a wɔato dzin “ New World Translation Bible A Ɔwɔ Mmum Kasa Mu.”)

•   Hwɛ video a wɔato dzin The Complete New World Translation Is Available in ASL. Video yi bɔboa wo ma eehu edwuma a yɛyɛ ansaana yeetum akyerɛ Bible no ase akɔ mmum kasa mu.

•   Sɛ epɛ dɛ wo Bible akenkan yɛ wo dɛw a, twe JW Library Mmum kasa dze no bi gu wo fon anaa wo tablɛt do. App yi botum aboa wo ma aahwɛ kyerɛwnsɛm pɔtsee a epɛ wɔ Bible a ɔwɔ mmum kasa mu no.

•   Dmytro na ne yer Vita nntse asɛm, naaso hɔn mba no dze wɔtse asɛm. Hwɛ kwan a Bible a nna wɔhwɛ no wɔ mmum kasa mu da biara no sii boaa hɔn ebusua no.

 Video ahorow a ɔkyerɛkyerɛ Bible no mu. Jehovah Adasefo ayɛ video ahorow wɔ mmum kasa mu a ɔboa nkorɔfo ma wɔtse Bible no ase. Afei ɔma wonya afotu a ɔfa . . .

•   Awar na mbusua ho

•   Mbaabun ho

•   Mbofra ho

 Yɛnye nkorɔfo sua Bible no. Obi botum aboa wo ma eesua Bible mu nsɛm wɔ mmum kasa mu wɔ ber na bea a oye ma wo. Ma obi nye wo nsua Bible no a irunntua hwee.

 Jeson Senajonon tse Philippines. Hwɛ mbrɛ Bible adzesua boaa no ma ɔnye Nyankopɔn faa nyɛnko a no mu yɛ dzen.

 Nna Mario Antúnez yɛ ɔsɔfo wɔ asɔr bi mu wɔ Honduras. Hwɛ mbrɛ onyaa ne nsɛmbisa a nna ɔkyer n’adwen no ho mbuae, aber a nna ɔreka n’asetsena mu nsɛm. N’asɛm no asɛntsir nye, “I Had More Questions Than Answers.”

 Hɛn nhyiamu ahorow. Sɛ ekɔ wiadze yi mu beebiara a, hɔn a hɔn asowa esiw no hyia mu wɔ nsafo na kuw ahorow mu dapɛn biara na wɔdze mmum kasa yɛ adzesua. Afei so, afe biara yɛyɛ nhyiamu akɛse wɔ mmum kasa mu, na yesua Bible no wɔ nhyiamu yi ase. Wɔ dɛm nhyiamu akɛse na nkakraba yi ase no, yɛyɛ nhyehyɛɛ ma hɔn a hɔn enyi nnhu adze na hɔn asowa so esiw no ama wɔaatse dza worusua no ase. Wɔma obi suo hɔn nsa mu, na ɔdze hɔnankasa hɔn nsa yɛ dza wɔreka ho asɛm no ho asɛnkyerɛdze. Bio so, yɛwɔ nwoma ahorow wɔ braille mu a yɛnntɔn.

•   Hwehwɛ asafo nhyiamu a ɔbɛn wo.

•   Kenkan ɔmantɔw na ɔmansin ehyiadzi ahorow a yɛyɛ no wɔ afe no mu no ho adze pii.

•   Kɔ Jesus no wu ho Nkaadzi no bi. Ɔyɛ dwumadzi a no ho hia hɛn paa wɔ afe no mu.

 José Luis Ayala tse Mexico. Wɔwoo no no, nna n’asowa esiw na ekyir yi n’enyiwa so furae. Hwɛ kwan a wɔfaa do boaa no ma ɔbɛyɛɛ obi a otum dze Bible no kyerɛkyerɛ yie.