HOM NKƆ DO NWEƆN!

Ɔko A Ɔrokɔ Do Wɔ Ukraine No Ama Edzibansɛm Ho Ayɛ Dzen

BƆ

Aban mpanyimfo bɔbor 75 dze amandzɛɛbɔ bi too Amanaman Nkabɔmu Kuw no ne Bambɔ Ho Egyinatukuw no enyim wɔ May 19, 2022. Wɔkaa dɛ, “COVID-19 yarba no na wimu nsakyer a ɔyɛ hu ama edzibansɛm ho ayɛ dzen wɔ wiadze yi mu beebiara na ɔko a ɔrokɔ do wɔ Ukraine no so botum dze ɔkɔm aba.” Ɔno ekyir no, dawurbɔ krataa bi a wɔfrɛ no The Economist so kaa dɛ, “annhwɛ a ɔko a ɔrokɔ do wɔ Ukraine no bɛma ɔkɔm aba.” Bible no hyɛɛ nkɔm dɛ, edziban kɔm bɛba wɔ hɛn aber yi do. Afei so, ɔma yehu dza yebotum ayɛ dze egyina dɛm ɔhaw yi ano.

Bible no kae too hɔ dɛ edziban kɔm bɛba

Jesus hyɛɛ nkɔm dɛ: “Ɔman bɔsoɛr ɔman do, na ahenman bɔsoɛr ahenman do; na ɔkɔm nye asaasewosow bɛba mbeambea.”—Matthew 24:7.
Nyikyerɛ nwoma no ka nkorɔfo baanan bi a wɔtsetse mpɔnkɔ do ho asɛm wɔ asɛnkyerɛdze kwan do. Nna hɔn mu kor gyina hɔ ma akokoeko. Na dza odzi n’ekyir no so gyina hɔ ma ɔkɔm, kyerɛ dɛ mber bi bɛba a edziban ho bɛyɛ na, na no bo so bɛyɛ dzen. ‘Na mohwɛe, na hwɛ, ɔpɔnkɔ tuntum, na nyia ɔtse no do no kura nsɛn wɔ ne nsamu. Na metsee ndze bi dɛ ɔse, ewifua esusudze denare, na atoko esusudze ebiasa denare, na wenyin nye ngo no dze, mma nnka.’—Nyikyerɛ 6:5, 6.

Nkɔm a Bible no hyɛe faa edziban kɔm ho no reba mu wɔ hɛn aber yi a Bible no frɛ no “nda a odzi ekyir no mu.” (2 Timothy 3:1) Sɛ epɛ “nda a odzi ekyir no” nye nkorɔfo baanan a wɔtsetse mpɔnkɔ do no ho nsɛm pii a, hwɛ video a wɔato dzin Ofi 1914 Reba No, Wiadze No Asesa. Ibotum so akenkan asɛm a wɔato dzin The Four Horsemen—Who Are They?

Mbrɛ Bible No Botum Aboa Wo

Afotusɛm pii wɔ Bible no mu a obotum aboa hɛn ma yeegyina tsebea a no mu yɛ dzen tse dɛ edziban a no bo reyɛ dzen nye edziban kɔm ano. Ibenya iyi ho asɛm wɔ asɛm a wɔato dzin “Mbrɛ Ibesi Dze Wo Sika Kakraba A Inya No Edzi Dwuma Yie”.
Bible no san ma hɛn awerɛhyɛmu dɛ, ɔnnkɛkyɛr ndzɛmba bɛyɛ yie. Bible no hyɛ bɔ dɛ daakye ‘eburow piigyan bɛba mbepɔw etsifi asaase no do’ na obiara benya edziban edzi amee. (Ndwom 72:16) Sɛ epɛ daakye ho enyidado a Bible no ka ho asɛm nye siantsir a ibotum agye edzi no ho nsɛm pii a, kenkan asɛm a wɔato dzin “A Real Hope for a Better Tomorrow.”