Mbea pii wɔ wiadze yi mu a, yɛwɔ nyimpa pii a wɔmmpɛ dɛ wɔbɔwe nam.

•   “Hɔn a wɔnnwe nam no, ɔyɛ gyinae a woesi dɛ wɔbɔbɔ hɔnho mbɔdzen dɛ nkyɛ ɔbɛyɛ yie a, wɔbɔtwe hɔnho efi mbowa a wɔyɛ hɔn ayakayakadze, wokum hɔn dze yɛ edziban, atar anaa biribi fofor biara ho no.”​—The Vegan Society.

 Sɛ yɛdze mbowa a wɔwɔ ayamuhyehye ma hɔn no to nkyɛn a, binom so si gyinae dɛ wɔronnwe mbowa osian beebi a wɔtse anaa wɔtsenae, hɔn apɔwmudzen anaa asɔr a wɔkɔ ntsi.

•   “Hɔn a woesi gyinae dɛ wɔronnwe nam no, wɔnntse dɛ nyimpa binom a woekyir hɔnho edziban ahorow bi no. Mbom no mpɛn pii no ɔda edzi dɛ wohu hɔn dze no dɛ ɔyɛ hɔn gyedzi, abrabɔ pa, nye ankorankor adzeyɛ bi a obotum ama ndzɛmba akɔ yie wɔ wiadze yi mu.”​—Britannica Academic.

 Gyinae a obi besi dɛ ɔronnwe nam no bɛma ɔhaw a nyimpa hyia no tun etwa anaa? Ebɛnadze na Bible no ka fa ho?

 Bible no ma yehu dɛ, hɛn bɔfo Jehovah Nyankopɔn a bu nyimpa dɛ yɛ krɔn kyɛn mbowa na wɔama hɛn tum dɛ yendzi hɔn do. (Genesis 1:27, 28) Mber rokɔ do no, ɔmaa nyimpa kwan dɛ wobotum eku mbowa dze ayɛ edziban. (Genesis 9:3) Naaso, n’enyiwa nngye mbowa a wɔyɛ hɔn ayakayakadze no ho.​—Mbɛbusɛm 12:10.

 Dɛ mbrɛ Bible no ka no, sɛ yɛbɔwe nam o, sɛ yɛronnwe o, ɔyɛ hɛn ankasa hɛn gyinaesi. b Sɛ yesi gyinae dɛ yɛbɔwe anaa yɛronnwe a, ɔno mma Nyankopɔn nngye hɛn ntomu nkyɛn obi a osii gyinae a ɔyɛ soronko fi hɛn dze no ho no. (1 Corinthians 8:8) Sɛ obi si gyinae dɛ ɔbɔwe nam anaa ɔronnwe a, ɔnnsɛ dɛ obiara kasa tsia no.​—Romefo 14:3.

 Bible no ma yehu dɛ, ɔnnyɛ mbrɛ yɛbɔ hɛn bra no na obeyi ɔhaw a yerihyia wɔ wiadze yi mu no efi hɔ. Haw a ɔwɔ wiadze no mu no, dodow no ara fi nhyehyɛɛ ahorow a aban no nye ekuwekuw ahorow a ɔwɔ ɔman no mu yɛ no. Na obiara so runntum nsiesie. Bible no ma yehu dɛ:

•   “Dza akyea no, wonnkotum atsen no.”​—Ɔsɛnkafo 1:15.

 Hɛn bɔfo no bedzi ɔhaw a yerihyia no ndɛ no ho dwuma. Bible no ka mbrɛ Nyankopɔn besi ayɛ dɛm no ho asɛm wɔ asɛnkyerɛdze kwan do.

•   “Na muhun sor fofor nye asaase fofor: na kan sor no, nye kan asaase no etwa mu kɔ; na po nnyi hɔ bio.”​—Nyikyerɛ 21:1.

 Nyankopɔn beyi nyimpa aban anaa “kan sor” no efi hɔ na ɔdze “sor fofor” kyerɛ dɛ, nankasa n’Ahendzi no ebesi ananmu. N’Ahendzi no beyi “kan asaase” a ogyina hɔ ma ndzebɔnyɛfo no efi hɔ. Na obedzi “asaase fofor” no do, kyerɛ dɛ, hɔn a wɔbrɛ hɔnho adze no do.

 Nyankopɔn n’Ahendzi ase nkotsee na nyimpa bosua mbrɛ wobotum nye mbowa atsena asomdwee mu.​—Isaiah 11:6-9.