Aman ahorow do mpanyimfo yɛɛ nhyiamu faa hɛn wimu tsebea a ɔresɛɛ no ho, ɔno ekyir no, Amanaman Nkabɔmu Kuw no kyerɛwfo panyin a wɔfrɛ no António Guterres dze bɔtoo gua wɔ April 4, 2022 dɛ: “Mbrɛ ndzɛmba rokɔ no, ɔnnkɛkyɛr hɛn wimu tsebea no bɛsɛɛ koraa. Nsu beyir afa nkurow akɛse pii. Wimu bɛyɛ hyew paa. Ehum akɛse a otum sɛɛ adze pii botu. Nsu ho bɛyɛ na wɔ mbeambea pii. Ndua na mbowa mpempem pii hɔn ase botu. Iyi nnyɛ anansesɛm bi anaa biribi a yaabɔ hɛn tsirmu reka. Abɔdzenyansahufo aka dɛ, sɛ aban ahorow no annsesa kwan a wɔfa do dze mfir dzi dwuma no a, dɛmara na obesi.”

 “Abɔdzenyansahufo robɔ kɔkɔ dɛ, osian wimu tsebea a ɔresɛɛ ntsi, wimu a ayɛ hyew no bɛsɛɛ national park ahorow bɛyɛ 423 a [ɔwɔ United States] no. Ɔhaw ahorow a yɛreka ho asɛm yi tse dɛ dza Bible no ka ho asɛm dɛ obesisi no. Bi nye ogyahyehyew na nsuyirii, esukwankyɛba a ɔrenan, po a orubu fa do nye mframa a no mu ayɛ hyew.”​—“Flooding Chaos in Yellowstone, a Sign of Crises to Come,” The New York Times, June 15, 2022.

 Mbrɛ ndzɛmba resɛɛ wɔ hɛn asaase yi do no, aso no tun botwa? Sɛ dɛm dze a, woana na ɔbɛyɛ no yie? Hwɛ dza Bible no ka ankasa.

 Bible no ka dɛ Nyankopɔn ‘bɛsɛɛ hɔn a wɔsɛɛ asaase’ no. (Nyikyerɛ 11:18.) Dɛm kyerɛwsɛm yi ma yehu ndzɛmba etsitsir ebiasa bi:

1.  1. Nyimpa ne ndzeyɛɛ bɛsɛɛ asaase yi.

2.  2. Dza nyimpa reyɛ dze resɛɛ asaase no bɛba ewiei.

3.  3. Nyankopɔn nkotsee na obotum ayɛ hɛn asaase a ɔresɛɛ no yie na nnyɛ nyimpa.

 Bible no ka dɛ “asaase tsim hɔ daa.” (Ɔsɛnkafo 1:4) Nyimpa bɛtsena do daa.

•   “Atseneneefo benya asaase no edzi, na wɔaatsena mu daa.”​—Ndwom 37:29.

 Nyankopɔn besiesie dza asɛɛ wɔ asaase yi do no nyina.

•   “Sar do na asaase kɛsɛɛ do bɛyɛ enyigye; na sar pradada edzi ehurusi, na ɔahan dɛ nhyiren huanhuam.”​—Isaiah 35:1, Baebor.