Awerɛhosɛm bi sii wɔ May 24, 2022 wɔ kurow ketseaba bi a wɔfrɛ no Uvalde a ɔwɔ Texas, U.S.A. Dawurbɔ kraataa bi a wɔfrɛ no The New York Times bɔɔ amandzɛɛ dɛ ‘aberantsɛ bi dze itur kunkum mbofra 19 nye hɔn akyerɛkyerɛfo beenu wɔ skuul bi a wɔfrɛ no Robb Elementary School.’

 Awerɛhosɛm nye dɛ, nsɛmbɔn ahorow a ɔtsetse dɛm ebu do wɔ hɛn wiadze yi mu. Dawurbɔ kraataa bi so a wɔfrɛ no USA Today kaa dɛ, “wɔ United States nkotsee no, mpɛn 249 na wɔdze itur kunkum nkorɔfo wɔ skuul wɔ afe a etwa mu no mu. Iyi dɔɔso sen dza wɔakɔ do wɔ afe biara mu ofitsi 1970.”

 Ebɛnadze ntsi na ewudzisɛm a ɔtsetse dɛm sisi? Yebesi dɛn egyina ano? Aso enyidado bi wɔ hɔ dɛ daakye bi basabasayɛ a ɔtsetse dɛm tun botwa? Bible no ma yenya dɛm nsɛmbisa yi ho mbuae?

•    Bible no frɛ mber a yɛtse mu yi dɛ “nda a odzi ekyir.” Ɔka dɛ mber a ɔtse dɛm mu no, nyimpa dodow no ara bɛyɛ ‘hɔn a wonnyi dɔ nye abɔyafo’ na wobedzi etsirmɔdzensɛm na ewudzisɛm. Afei so, hɔn a wɔda suban bɔn a ɔtse dɛm edzi no ‘bɔkɔ hɔn enyim wɔ bɔn mu.’ (2 Timothy 3:1-5, 13) Sɛ epɛ dɛ inya iyi ho nkyerɛkyerɛmu pii a, kenkan asɛm a wɔato dzin “Did the Bible Predict the Way People Think and Act Today?”

 Ɔyɛ a binom so bisa dɛ, ‘Ebɛnadze ntsi na Nyankopɔn hwɛ ma etsirmɔdzensɛm tse dɛ itur a wɔdze kunkum nkorɔfo wɔ skuul no sisi? Sɛ epɛ iyi ho mbuae a, kenkan asɛm a wɔato dzin “Bad Things Happen to Good People​—Why?”

•    ‘Biribiara a wɔkyerɛɛw no nkan no, wɔkyerɛwee maa hɛn nkyerɛkyerɛ, ama ɔnam kyerɛwnsɛm no n’awerɛkyekyer do yeenya enyidado.’​—Romefo 15:4.

 Afotusɛm a ɔwɔ Bible mu no botum aboa wo ma eegyina emumuyɛsɛm a ɔrokɔ do no ano. Sɛ epɛ iyi ho nsɛm pii a, kenkan Awake! a wɔato dzin “Will Violence Ever End?”

 Sɛ epɛ afotusɛm a ɔfa mbrɛ awofo botum aboa hɔn mba ma woeehu mbrɛ wobesi ayɛ hɔn adze aber a wɔatse nsɛm a ɔyɛ hu a, kenkan asɛm a wɔato dzin “Disturbing News Reports and Your Children.”

•    ‘Ma ɔngye hɔn mfi nhyɛdo na etsirmɔdzensɛm mu.’​—Ndwom 72:14.

•    “Wɔdze hɔn mfowa bɔbobɔ nsɔw, na wɔdze hɔn mpeaa abobɔ ndar: ɔman bi remma afowa do nntsia ɔman bi, eso worunnsua akodzi bio.”​—Micah 4:3.

 Nyankopɔn bɛyɛ dza nyimpa biara nnkotum ayɛ da. Nyankopɔn n’Ahendzi no bɛsɛɛ akodze nyina na ɔdze basabasayɛ aaba ewiei. Sɛ epɛ dɛ ihu dza Nyankopɔn n’Ahendzi no bɛyɛ a, kenkan asɛm a wɔato dzin “Under God’s Kingdom ‘Peace Will Abound.’”