Nyimpa pii na wɔdze itur kunkum hɔn wɔ July 2022, na iyi yɛɛ nyimpa pii nwanwa wɔ wiadze nyina:

•   “Woeku obi a ɔagye dzin paa wɔ amanyɛsɛm mu wɔ Japan [Shinzo Abe, nna ɔyɛ Prime Minister ber bi a abɛsen kɔ] na iyi ayɛ nyimpa pii nwanwa wɔ wiadze nyina, osiandɛ basabasayɛ nntaa nnsi wɔ Japan. Afei so wɔahyehyɛ itur ho mbra a no mu yɛ dzen wɔ hɔ.”​—July 10, 2022, The Japan Times.

•   “Aberantsɛ bi dze itur ekunkum nyimpa baasa wɔ shopping mall bi a ɔwɔ Copenhagen wɔ Denmark, na iyi ama nkorɔfo pii ho edwuruw hɔn.”​—July 4, 2022, Reuters.

•   “South Africa: Nkorɔfo bi bɔɔ wuraa bar bi mu wɔ Soweto na wɔdze itur kunkum nyimpa 15 wɔ hɔ.”​—July 10, 2022, The Guardian.

•   “Aber a July 4 afahyɛ no rokɔ do wɔ U.S. no, wɔdze itur kunkum nyimpa bɔbor 220.”​—July 5, 2022, CBS News.

 Aso enyidado bi wɔ hɔ dɛ daakye bi basabasayɛ a ɔtse dɛm bɛba ewiei? Ebɛnadze na Bible no ka fa ho?

 Bible no frɛ mber a yɛtse mu yi dɛ “nda a odzi ekyir.” Na ɔma yehu dɛ nyimpa pii bɛyɛ etsirmɔdzenfo na hɔn enyi bɛgye basabasayɛ ho. (2 Timothy 3:1, 3) Su ahorow a ɔtsetse dɛm no bɔ nyimpa pii hu. (Luke 21:11) Bible no hyɛ bɔ dɛ ber bi bɛba a nyimpa “bɛtsena asomdwee tsenabea, na efiefi a osi pi, na ahomgye mbea komm mu.” (Isaiah 32:18) Basabasayɛ besi dɛn efi hɔ?

 Nyankopɔn bɛsɛɛ ndzebɔnyɛfo nye akodze nyina.

•   “Na emumuyɛfo dze, wobotwa hɔn efi asaase no do.”​—Mbɛbusɛm 2:22.

•   ‘Nyankopɔn ma akodzi bɔ adze kodu asaase ano; obubu egyen, na otwitwa mpeaa mu esinesin; ɔhyew ntseaseanam wɔ ogya mu.’​—Ndwom 46:9.

 Nyankopɔn bɛkyerɛkyerɛ nyimpa ma wɔaatsena asomdwee mu na iyi bɛma basabasayɛ aba ewiei.

•   “Wɔnnkɛyɛ bɔn eso wɔnnkɛsɛɛ wɔ me bepɔw krɔnkrɔn nyina do: na [Jehovah] ho nyimdzee bɛhyɛ asaase ma, dɛ mbrɛ esu kata po do.”​—Isaiah 11:9.

•   Seseiara mpo, Nyankopɔn rekyerɛkyerɛ nyimpa a wɔwɔ wiadze yi mu beebiara dɛ wongyaa basabasa yɛ, na wɔmfa ‘hɔn mfowa mbobɔ nsɔw, na hɔn mpeaa mbobɔ ndar.’​—Micah 4:3.

 Sɛ epɛ dɛ isua pii fa Bible no bɔhyɛ a ɔfa wiadze a basabasayɛ nnyi mu ho a, kenkan asɛm a wɔato dzin “Freedom From Fear​—Is It Possible?”

 Sɛ epɛ dɛ isua pii fa mbrɛ basabasayɛ besi efi hɔ korakora no ho a, kenkan asɛm a wɔato dzin “Peace on Earth at Last!”