Ndɛ Nyimpa Nnya Edziban Nndzi, Ebɛn Asɛm Na Bible No Ka Fa Ho?
Ɔhaw ahorow a ɔretseetsee nyimpa no mu kor nye ɔkɔm. Dɛm ntsi etumfo a wɔwɔ hɔ no pɛ paa dɛ wotu ɔkɔm ase koraa mbrɛ ɔbɛyɛ a obiara benya edziban edzi. a Naaso ehwɛ a, mber bi bɛba a ɔkɔm befi hɔ anaa? Ebɛn asɛm na Bible no ka fa ho?
Bible no hyɛɛ nkɔm dɛ edziban kɔm bɛba
Bible no kaa too hɔ dɛ edziban kɔm bɛba wɔ ber a yɛtse mu yi mu. Ɔfrɛ dɛm mber yi “nda a odzi ekyir.” (2 Timothy 3:1) Ɔwɔ mu dɛ, nnyɛ Nyankopɔn na ɔama edziban kɔm aba dze, naaso ɔama yeehu dɛ edziban kɔm bɛba. (James 1:13) Ɔwodze, ma yensusu Bible mu nkɔnhyɛ ebien yi ho nhwɛ.
“Ɔkɔm . . . bɛba mbeambea.” (Matthew 24:7) Dɛm Bible nkɔnhyɛ yi ma yehu dɛ edziban kɔm bɛba aman pii do. Na dɛmara na yehu dɛ ɔrokɔ do. Ndaansa yi ara, nkorɔfo bi a wɔhwɛ edziban ho nsɛm do dze amandzɛɛbɔ bi too gua dɛ: “Mbɔdzen a wiadze no robɔ dɛ wɔbɛma nyimpa enya edziban pa edzi amee na woeyi ɔkɔm efi hɔ no, onnkesi hwee, mbom no ndzɛmba mu dzen ara na ɔreyɛ.” b Aman pii mu no, nyimpa ɔpepem pii na wonnya edziban nndzi. Dza ɔma ɔyɛ awerɛhow mpo nye dɛ, iyi ma hɔn mu piinara wuwu.
“Hwɛ, ɔpɔnkɔ tuntum, na nyia a ɔtse no do no kura nsɛn wɔ ne nsamu.” (Nyikyerɛ 6:5) Dɛm nkɔnhyɛ no mu no, pɔnkɔ no nye nyia a ɔtse do no gyina hɔ ma ɔkɔm a ɔbɛba wɔ nda a odzi ekyir no mu. c Nyia a ɔtse pɔnkɔ no do no, nsɛn a okitsa no no kyerɛ susu a wobosusu edziban nketsenketse osian ɔkɔm a ɔbɛba no ntsi. Ber a nyia ɔtse pɔnkɔ no do no rokɔ n’enyim no, ndze bi kaa dɛ edziban no bo bɛyɛ dzen na ɔbɔɔ hɔn kɔkɔ dɛ mma wɔnnsɛe edziban. (Nyikyerɛ 6:6) Na dɛmara na ɔrokɔ do ndɛ, nyimpa mpempem pii na wonnya edziban pa nndzi, na binom mpo dze, wonnyi sika mpo na wɔdze atɔ edziban pa edzi.
Dza Nyankopɔn bɛyɛ dze eyi ɔkɔm efi hɔ
Abemfo binom ka dɛ edziban a ɔwɔ hɛn asaase yi do no botum ahwɛ nyimpa a wɔwɔ do nyina ma abor do koraa. Sɛ dɛm na ɔtse dze a, ebɛnadze paa ntsi na nyimpa nnya edziban nndzi? Dza hɛn Bɔfo Jehovah d bɛyɛ dze eyi dɛm haw yi efi hɔ no, ebɛnadze na Bible no ka fa ho?
Ɔhaw: Nyimpa aban runntum nnyi ohia nye atsɛnkyew a ama ɔkɔm ruku adasamba no mmfi hɔ da.
Dza Nyankopɔn bɛyɛ: Nyankopɔn beyi nyimpa aban a wɔwɔ hɔ ndɛ no efi hɔ na ɔdze n’Ahendzi no ebesi ananmu. (Daniel 2:44; Matthew 6:10) Ndɛ, ɔyɛ dzen ma nyimpa pii noara dɛ wobenya sika atɔ edziban, naaso wɔ Nyankopɔn n’Ahendzi no mu no ndzɛmba bɛsesa. Bible no ka Jesus Christ a ɔyɛ Nyankopɔn n’Ahendzi no do hen no ho asɛm dɛ: ‘Ɔbɛgye ohianyi a osu frɛ no; Nye mbɔbɔrnyi a onnyi boafo so. . . . Eburow piigyan mbra mbepɔw etsifi asaase no do.’—Ndwom 72:12, 16.
Ɔhaw: Akodzi sɛɛ ndzɛmba pa pii, na ɔma ɔman ne sikasɛm yɛ basaa. Osian iyi ntsi, ɔyɛ dzen ma nyimpa pii noara dɛ wobenya edziban edzi.
Dza Nyankopɔn bɛyɛ: “[Jehovah] ma akodzi bɔ adze kodu asaase ano; Obubu egyan, na otwitwa mpeaa mu esinesin; Ɔhyew ntseaseanam wɔ asaase do.” (Ndwom 46:9) Nyankopɔn bɛsɛɛ hɔn a wɔma akodzi kɔ do nye hɔn akodze nyina. Dɛm ntsi, ɔrennyɛ dzen dɛ obiara benya edziban edzi amee. Bible no hyɛ hɛn bɔ dɛ: ‘Atseneneefo bɛyɛ prɔmprɔm; Na asomdwee pii bɛba.’—Ndwom 72:7.
Ɔhaw: Atoyerɛnkyɛm nye wimu tsebea a ɔyɛ hu sɛɛ nduadzewa, na okunkum nyɛmbowa so.
Dza Nyankopɔn bɛyɛ: Nyankopɔn wɔ abɔdze do tum na ɔremma wɔnsɛɛ adze bio, na ɔbɛma hɛn wimu tsebea papa a ɔbɛma nduadzewa ayɛ yie. Bible ka dɛ: ‘Jehovah ma ehum no taa dzinn, Na asorɛkye no yɛ komm . . . Ɔdan sar ma ɔyɛ nsutaae, Na asaase kwawee ma ɔyɛ nsunyiwa. Na hɔ na ɔma hɔn a ɔkɔm dze hɔn no kɛtsena . . . Na woeeduadua kwa, na wɔaatsetsɛw wenyin nture, Na woeenya ndɔbaa pii.’—Ndwom 107:29, 35-37.
Ɔhaw: Nyimpa a hɔn enyi ber adze na wɔnnka nokwar mma nkorɔfo nsa nnka edziban a apɔwmudzen wɔ mu, anaa wɔmma nkorɔfo nnya edziban nndzi.
Dza Nyankopɔn bɛyɛ: Nyankopɔn n’Ahendzi no beyi nyimpa a wɔnnka nokwar nye hɔn a hɔn enyi ber adze no nyina efi hɔ. (Ndwom 37:10, 11; Isaiah 61:8) Bible no ka Jehovah ho asɛm dɛ ‘Ɔno na obua atsɛn ma hɔn a nkorɔfo sisi hɔn; Ɔno a ɔdze edziban ma hɔn a ɔkɔm dze hɔn.’—Ndwom 146:7.
Ɔhaw: Sɛ yɛkyɛ edziban a hɛn nsa ka wɔ wiadze yi mu ebiasa a, no mu kor na ɔsɛɛ.
Dza Nyankopɔn bɛyɛ: Nyankopɔn n’Ahendzi mu no, hɛn nsa bɛka edziban a yehia nyina. Ber a Jesus wɔ asaase do no, ɔhwɛɛ dɛ ɔremma edziban nnsɛɛ kwa. Ɔwodze hwɛ o, da kor bi, ɔnam anwanwa kwan do maa nyimpa bɔbor 5,000 edziban. Ɔno ekyir no, ɔkaa kyerɛɛ n’esuafo no dɛ: ‘Hom mboaboa edziban a ɔaka no ano, na biribiara annyɛ gyan.’—John 6:5-13.
Nyimpa nyina benya edziban a apɔwmudzen wɔ mu eedzi amee, osiandɛ Nyankopɔn n’Ahendzi beyi ndzɛmba a ɔdze kɔm ba nyina efi hɔ. (Isaiah 25:6) Sɛ epɛ dɛ ihu dza Nyankopɔn n’Ahendzi bɛyɛ dze eyi ɔhaw ahorow nyina efi hɔ a, hwɛ asɛm a wɔato dzin “When Will God’s Kingdom Rule the Earth?”
a The 2030 Agenda for Sustainable Development, adopted by all United Nations Member States in 2015.
b A joint report by the Food and Agriculture Organization of the United Nations, the International Fund for Agricultural Development, the United Nations Children’s Fund, the United Nations World Food Programme, and the World Health Organization.
c Sɛ epɛ dɛ ihu pii fa mpɔnkɔ anan a Nyikyerɛ nwoma no ka ho asɛm no a, hwɛ asɛm a wɔato dzin “The Four Horsemen—Who Are They?”
d Jehovah yɛ Nyankopɔn ne dzin ankasa. (Ndwom 83:18) Hwɛ asɛm a wɔato dzin “Woana Nye Jehovah?”
Bi A W'enyi Bɛgye Iyi So Ho
BIBLE MU NSƐMBISA A WOEBUA
Ebɛn Ndzɛmba Na Sɛ Osisi A Ɔbɛkyerɛ Dɛ Yɛwɔ “Ewiei Ber” Anaa “Nda A Odzi Ekyir” No Mu?
Ndzɛmba pii na Bible no kae too hɔ dɛ sɛ ɔbɔ mu sisi a ɔbɛkyerɛ dɛ yɛwɔ nda a odzi ekyir no mu.
ESSENTIAL BIBLE TEACHINGS
Nyankopɔn N’ahendzi No, Ɔyɛ Ebɛnadze?
Jesus baa asaase do no, ɔkãa Nyankopɔn n’Ahendzi ho asɛm kyɛɛn asɛm fofor biara. Mfe ɔhaha pii nye yi, Jesus n’ekyirdzifo abɔ mpaa dɛ dɛm Ahendzi no mbra.
