Obiara hia nsu pa ama oeetum atsena nkwa mu. Naaso, António Guterres a ɔyɛ Amanaman nkabomu kuw no kyerɛwfo no kaa dɛ, “osiandɛ nyimpa rodɔɔso ntsi, nsu ho bɔkɔ do ayɛ dzen.” Seseiara, nyimpa ɔpepepem pii na wonnya nsu pa nnom.

 Ehwɛ a, yebenya nsu pa pii a ɔbɔso hɛn anaa? Anaa nsu ho bɔkɔ do ayɛ dzen? Ebɛn asɛm na Bible no ka fa ho?

Bible no ma yehu bɔhyɛ bi a ɔfa nsu ho

 Bible no ma yehu dɛ, nsu ho rennyɛ dzen bio. Nokwasɛm nye dɛ, nsu pa bobu do.

 ‘Na nsu botuetue wɔ sar do, na nwora wɔ sar pradada do. Na anhwea hyehyeehyew no bɛdan nsutaae, na asaase kwawee no adan mbansu.’​—Isaiah 35:6, 7.

 Ebɛnadze ntsi na ɔsɛ dɛ yɛgye Bible mu bɔhyɛ yi dzi? Ɔwodze, ma yɛnhwɛ adze kor a Bible no ka fa mbrɛ wosii bɔɔ hɛn asaase yi ho.

Dza Bible no ka fa hɛn asaase yi nye mbrɛ nsu dzi kyinhyia wɔ do ho

 ‘Nyankopɔn ammbɔ asaase no pan, mbom ɔhyehyɛɛ dɛ wɔntsena do.’​—Isaiah 45:18.

 ‘Nyankopɔn twe nsu a ɔsosɔw kɔ sor; ma ɔdan bɔw, na ɔdan bɛyɛ nsu a ɔtɔ; afei mununkum hue nsu no gu famu; na ɔtɔ gu nyimpa do.’​—Job 36:27, 28.

 ‘Mebɛma nsu atotɔ wɔ n’aber mu, na asaase no ama no ndɔbaa, na haban mu ndua asow n’aba.’​—Leviticus 26:4.

 Nyankopɔn hyɛɛ Israelfo a nna wɔyɛ haban no bɔ dɛ, ɔbɛma nsu atɔ ama hɔn wɔ ne ber mu, mbrɛ ɔbɛyɛ a nna wobenya edziban pii. Nyankopɔn nyim dɛ, sɛ hɛn haban bɛyɛ yie ma yeenya edziban edzi a, ohia dɛ nsu tɔ wɔ ne ber mu.

 Dza Nyankopɔn yɛe maa Israelfo no, ɔnnkɛkyɛr, ɔbɛyɛ bi wɔ asaase nyinara do. (Isaiah 30:23) Asɛm no nye dɛ, mbea pii wɔ hɔ a nsu ho yɛ dzen ma hɔn, adze yi ara nsu nntɔ. Ebɛn asɛm na Bible no san ka a ɔma yehu dɛ nsu ho nsɛm a wɔayɛ dzen ndɛ no, no tun botwa?

Dza ɔbɛma nsu ebu do

 Bible no ma yehu dɛ, Nyankopɔn nam n’Ahendzi no do besiesie ɔhaw biara a ɔwɔ hɛn amansan yi mu no. Na nsu a ho ayɛ dzen no so ka ho. (Matthew 6:9, 10) Nyankopɔn n’Ahendzi no yɛ aban a ɔwɔ sor na obedzi asaase do tum. (Daniel 2:44; Nyikyerɛ 11:15) Afei, Nyankopɔn n’Ahendzi no bɛyɛ biribi a nyimpa aban runntum nnyɛ da. Ɔno nye dɛ, obeyi nsu ho nsɛm a ɔayɛ dzen no efi hɔ.

 Haw a yehyia: Wimu tsebea a ɔresɛɛ no ama mbrɛ nsu dzi kyinhyia noho aba asɛm na ɔno dze ɔhaw pii aba. Ɔhaw no bi nye ɔpɛ a n’ano yɛ dzen, nye nsuyirii. Na dza ɔdze nsuyirii ba nye nsu a ɔtɔ dzendzedzen nye po a oyir fa do no.

 Dza obotum aboa: Nyankopɔn n’Ahendzi no bɔhwɛ esiesie biribiara a ɔasɛɛ wɔ hɛn amansan yi mu no. Nyankopɔn ahyɛ bɔ dɛ: “Hwɛ, mereyɛ adze nyina fofor.” (Nyikyerɛ 21:5) Iyi ma yehu dɛ, nsu pa bobu do wɔ asaase kesee do, na beebi a ndɛ efifidze mpo nntum nnyin wɔ hɔ no, hɔ nyinara bɛyɛ fɛɛfɛɛfɛw. (Isaiah 41:17-20) Jesus Christ a ɔyɛ Nyankopɔn n’Ahendzi no do hen no, bɔhwɛ ma biribiara akɔ do pɛpɛɛpɛ.

 Haw a yehyia: Nyimpa a wɔnndwen ɔkyena ho nye ndwumakuw ahorow a wɔyɛ pɛsɛankonya resɛɛ esutsen, nsutae nye nsu a ɔwɔ asaase no mu no, na iyi ama nsu pa a obi benya ho ayɛ dzen.

 Dza obotum aboa: Nyankopɔn besiesie asaase no ma wɔayɛ kamakama, na esutsen, nsutae, po, nye dɛtse no so obesiesie. Ɔbɛma asaase no adan paradise. Bible no ka dɛ: “Sar do na asaase kesɛɛ do bɛyɛ enyigye; na sar pradada edzi ehurusi, na ɔahan dɛ nhyiren huanhuam.”​—Isaiah 35:1.

 Haw a yehyia: Beebi a yenya nsu pa fi no, nyimpa binom gu do ara resɛɛ no, ntsi nsu pa a hɛn nsa ka no nnso hɛn.

 Dza obotum aboa: Nyankopɔn n’Ahendzi no, remma nyimpa pɛsɛakonyafo nnyɛ dza wɔpɛ daa. Mbom, Nyankopɔn ‘n’apɛdze bɛyɛ hɔ wɔ asaase do.’ (Matthew 6:9, 10) Nyankopɔn N’Ahendzi no bɛma ne manfo no ntsetsee a odzi mu. Isaiah 11:9 ka dɛ, ‘Jehovah a ho nyimdzee bɛhyɛ asaase ma.’ Sɛ yenya nyimdzee yi, na yenya ɔdɔ kɛse ma Jehovah nye ndzɛmba a wɔabɔ no a, ɔbɛma yɛahwɛ hɛn asaase fɛɛfɛw yi nye ndzɛmba a ɔwɔ do no yie.

•    Sɛ epɛ dɛ ihu dza Nyankopɔn n’Ahendzi no bɛyɛ daakye no ho nsɛm pii a, kenkan asɛm a wɔato dzin “Ebɛnadze na Nyankopɔn n’Ahendzi no bɛyɛ?”

•    Sɛ epɛ dɛ ihu mbrɛ asaase yi bɛdan paradise a, kenkan Isaiah tsir 35 no na ɔbɔboa wo ma ehu.

•    Sɛ epɛ dɛ ihu dza Nyankopɔn bɛyɛ ama adasamba daakye a, hwɛ video a wɔato dzin Ebɛnadze Ntsi Na Nyankopɔn Bɔɔ Asaase?