Sɛ ekɔ wiadze yi mu beebiara a, nyimpa piinara na nsuyirii retseetsee hɔn na ɔresɛɛ hɔn ndzɛmba so. Ma yɛnhwɛ dza amandzɛɛbɔ bi ka:

•   ‘Bɛyɛ nda kakra a abɛsen kɔ yi, nsu kɛse bi tɔree wɔ China ahenkurow mu fi Memenda kesi Wukuda, na bɛyɛ mfe 140 a abɛsen kɔ yi, nsu a ɔtse dɛm nntɔree wɔ hɔ dɛm da. Nsu no tɔree ara ma sɛ nna igyina mu a, obodu wo sisi.’​—AP News, August 2, 2023.

•   ‘Ehum kɛse bi a wɔfrɛ no Typhoon Khanun tui, na iyi maa nsu kɛse bi tɔree wɔ Japan n’anaafo, na mframa bi so a n’ano yɛ dzen paa bɔe. Nsu nye mframa no hyɛɛ ase Wukuda kesii Yawda, na okunkum nyimpa bɛyɛ ebien. Ehum no ntsi, wɔka dɛ nsu a obotum atɔ wɔ Central Taiwan a mbepɔw bebree wɔ hɔ no, sɛ igyina mu a annhwɛ a, obodu w’aserɛ ho.’​—Deutsche Welle, August 3, 2023.

•   ‘Dapɛn yi n’ewiei mu no, nsu kɛse bi tɔree wɔ Canada ne fa a ɔwɔ mpoano, na iyi maa nsu no yirii faa Nova Scotia. Bɛyɛ mfe 50 nye yi, nsu nnyirii mmfaa hɔ dɛm da.’​—BBC News, July 24, 2023.

 Ebɛn asɛm na Bible no ka fa ndzɛmba a ɔtsetse dɛm ho?

 Bible no ma yehu dɛ yɛtse “nda a odzi ekyir” no mu. (2 Timothy 3:1) Jesus kaa too hɔ dɛ, yebohu ‘ndzɛmba a ɔyɛ hu’ anaa ndzɛmba a ɔma akomatu besisi. (Luke 21:11) Wimu tsebea a ɔresɛɛ no ka ho bi paa na ndaansa yi, wonntum nnkyerɛ mbrɛ wimu tsebea no bɛyɛ na ɔama wimu hyew ara na ɔreyɛ, nsu so tɔ ara na ɔrotɔ.

 Bible no ma yehu dɛ ndzɛmba bɔn a orisisi ndɛ no yɛ biribi a ɔma yenya enyidado. Ebɛnadze ntsi a? Jesus kaa dɛ: “Sɛ hom hu dɛ yinom yɛ hɔ a, hom nhu dɛ Nyankopɔn Ahendzi no abɛn.”​—Luke 21:31; Matthew 24:3.

 Ndzɛmba a orisisi ndɛ no ma yehu dɛ ɔrennkyɛr biara, Nyankopɔn n’Ahendzi no benya nsu a odzi kyinhyia nye abɔdze afofor a aka nyina do tum.​—Job 36:27, 28; Ndwom 107:29.

 Sɛ epɛ dɛ ihu pii fa mbrɛ Nyankopɔn n’Ahendzi no besi esiesie hɛn asaase yi ho nsɛm pii a, hwɛ asɛm a wɔato dzin “Who Will Save the Earth?”