Amanaman Nkabɔmu Kuw no bɔ amandzɛɛ dɛ:

•   Ofitsi October 7 kesi October 23, 2023 no, nna Gaza na Israel ntokwaa no ekunkum nyimpa bɔbor 6,400, na nyimpa bɛyɛ 15,200 so na woepirapira. Nna dɛm nyimpa yi mu dodow no ara nnyɛ nsordaafo. Nna wɔyɛ amamfo no mu biara kɛkɛ. Iyi da nkyɛn a, nyimpa bɛyɛ mpempem pii so eguan efi hɔn efie mu osian ɔko no ntsi.

•   Dze besi September 24, 2023, nna ɔko a ɔrokɔ do wɔ Russia na Ukraine ntamu no ekunkum amamfo a wɔnnyɛ nsordaafo no mu 9,701 na nyimpa 17,748 so epirapira wɔ Ukraine.

 Nyimpa a akodzi ama woruhu amandze no, ebɛn enyidado na Bible no dze ma hɔn?

 Bible aka ato hɔ dɛ ‘Nyankopɔn bɛma akodzi egyaa wɔ asaase nyina do.’ (Ndwom 46:9) Ɔdze aban anaa ahendzi bi a ɔwɔ sor bɛba ebesi aban ahorow a ɔwɔ asaase yi do beebiara no ananmu. (Daniel 2:44) Afei, Nyankopɔn n’Ahendzi no bɛma adasamba nyina ho atɔ hɔn.

 Jesus Christ nye Nyankopɔn n’Ahendzi no do Hen, na ndzɛmba a ɔbɛyɛ no bi na odzidzi do yi:

•   ‘Sɛ ohianyi su a, ɔbɛgye no; nye bɔbɔnyi a onnyi boafo so. Obohu ɔbrɛfo na ohianyi mbɔbɔr, na ɔbɛgye ehiafo akra nkwa. Ɔbɛgye hɔn akra efi nhyɛdo na etsirmɔdzensɛm mu; na hɔn bɔgyaa bɔ som bo wɔ n’enyi do.’​—Ndwom 72:12-14.

 Ɔhaw na atseetsee a akodzi na ewudzisɛm akɛfa aba no, Nyankopɔn nam n’Ahendzi no do beyi ne nyinara efi hɔ korakora.

•   “Ɔbɛpepa hɔn enyiwa mu nyinsuwa nyina, na owu nnyi hɔ bio, na awerɛhow nye su nye yaw so nnyi hɔ bio. Nkan no ndzɛmba no etwa mu.”​—Nyikyerɛ 21:4.

 Ɔnnkɛkyɛr koraa, Nyankopɔn n’Ahendzi no bɛba abɛyɛ ndzɛmba yie wɔ asaase do. “Ɔko, nye ɔko ho nsɛm” a ndɛ yɛtse no, Bible no aka ato hɔ dada dɛ obesisi. (Matthew 24:6) Dɛm nsɛm no nye nsɛm afofor a orisisi no nyina ma yehu dɛ yɛtse “nda a odzi ekyir” wɔ nyimpa tumdzi mu.​—2 Timothy 3:1.