Sika a aman ahorow asɛɛ no wɔ akodzi ho no dɔɔso paa.

•   “Afe a otwaa mu no, sika a aman ahorow no sɛɛ no wɔ asogyafo na akokoakoko a ɔkɔr do no ho no dodow kɔr sor kodur dɔla ɔpepepepem 2 na kakra ($2.2 trillion).”—The Washington Post, February 13, 2024.

 Naaso ɔka sika nkotsee mpo a, nkyɛ yɛfa ho guan. Amandzehu so a ɔakɛfa aba nnyɛ agor. Ɔwodze ma yɛmfa ɔko a ɔkɔr do wɔ Ukraine no dɛ mfatoho.

•   Asogyafo. Hɔn a wɔyɛ nhwehwɛmu kyerɛ dɛ, mfe ebien nye yi a ɔko no hyɛɛ ase no, asogyafo a woewuwu nye hɔn a woepirapira no dodow bɛyɛ 500,000.

•   Amamfo no. Amanaman Nkabɔmu Kuw no bɔɔ amandzɛɛ dɛ, nyimpa bɔbor 28,000 na woewuwu anaa woepirapira osian ɔko no ntsi. Naaso Amanaman Nkabɔmu Kuw no mu panyin kor kaa dɛ: “Mbrɛ ɔko yi ama amamfo no hɔn dodow do atsew no, yenntum mmfa hɛn adwen mmbu.” a

 Amandzehu a akokoakoko na akasakasa akɛfa aba no nnyɛ asɛm kakraba.

•   Nyimpa ɔpepem 114 . Dze besi September 2023 no, nna dɛm nyimpa dodow yi na ɔko na basabasayɛ ama woeguan efi hɔn efie mu wɔ wiadze nyina.

•   Nyimpa ɔpepem 783 . Dɛm nyimpa dodow yi na edziban ho ayɛ dzen ama hɔn paa. “Basabasayɛ nye adze tsitsir a ɔdze kɔm yi aba. Nyimpa a kɔm dze hɔn paa wɔ wiadze yi mu no, sɛ iyi hɔn mu 100 biara si nkyɛn a, hɔn mu 70 tse beebi a akodzi na basabasayɛ rokɔ do.”—World Food Programme.

 Ber bi bɛba a akodzi no tun botwa? Enyidado wɔ hɔ dɛ asomdwee bɛba? Ndzɛmba pa a yenya fi asaase no mu no, ber bi bɛba a yɛdze bedzi dwuma yie dze eyi ɔkɔm nye ahokyer pii yi nyina efi hɔ? Ebɛn asɛm na Bible no ka?

 Bible no ma yehu dɛ, akodzi bobu do wɔ wiadze nyina. Na ɔdze ɔko toto obi a ɔtsena pɔnkɔ do ho.

•   “Na ɔpɔnkɔ fofor memen bi puei, na wɔmaa nyia ɔtse no do no tum dɛ onkeyi asomdwee mfi asaase do, na wonkuku hɔnho, na wɔmaa no afona kɛse bi.”—Nyikyerɛ 6:4.

 Dɛm pɔnkɔ yi ekyir no, pɔnkɔ afofor ebien bi so puei dzii n’ekyir bae. Hɔn so gyina hɔ ma ɔkɔm na owu a yarba na ndzɛmba afofor akɛfa aba no. (Nyikyerɛ 6:5-8) Dɛm Bible mu nkɔnhyɛ yi, sɛ epɛ dɛ isua ho adze pii na ihu siantsir a yebotum aka dɛ ɔreba mu wɔ hɛn aber yi do a, kenkan asɛm a wɔato dzin “The Four Horsemen—Who Are They?”

 Ɔnnkɛkyɛr, ndzɛmba a ɔwɔ asaase do no, nyimpa remmfa nndzi ako bio. Naaso, ɔnnyɛ dza nyimpa bɛyɛ na ɔbɛma iyi ayɛ yie. Bible no ka dɛ:

•   Nyankopɔn ‘bɛma akodzi abɔ adze ekodu asaase ano.’—Ndwom 46:9.

•   Nyankopɔn beyi amandzehu a ɔko dze aba nyina efi hɔ. “Na ɔbɛpepa hɔn enyiwa mu nyinsuwa nyina; na owu nnyi hɔ bio; na awerɛhow, nye su, nye yaw bi nnyi hɔ bio: osiandɛ nkan no ndzɛmba no etwa mu.”—Nyikyerɛ 21:4.

•   Nyankopɔn bɔhwɛ ma obiara enya asomdwee. “Na me man bɛtsena asomdwee tsenabea, na efiefi a osi pi, na ahomgye mbea komm mu.”—Isaiah 32:18.

 Nkɔnhyɛ a ɔwɔ Bible mu no ma yehu dɛ akokoakoko na ndzɛmba afofor a yehu no ndɛ no da no edzi kofee dɛ, ɔrennkyɛr asomdwee a yɛreka ho asɛm yi bɛba.

 Ebɛn kwan na Nyankopɔn bɛfa do ama asomdwee aba daakye? Ɔnam n’Ahendzi anaa n’aban a ɔwɔ sor no do. (Matthew 6:10) Sɛ epɛ dɛ ihu adze kor a Ahendzi yi yɛ na mfaso a sɛ ɔba a ibenya a, ɔno hwɛ video tsiabaa a wɔato dzin Ebɛnadze Nye Nyankopɔn N’Ahendzi?