Nyimpa bɛyɛ ɔpepepem enum na wɔbɔhwɛ World Cup a wɔhyɛɛ ase November 20 na wobowie December 18, 2022 no bi. Sɛ akansi a ɔtse dɛm rokɔ do a, nyimpa pii susu dɛ sɛ wɔbɔ mu hwɛ a ɔka hɔn bɔ mu, naaso binom so tse nka dɛ mfaso a wonya no wɔ mu no kyɛn nkabɔmu kɛkɛ.

•   “Agokansi botum asesa wiadze. Obotum ama nyimpa enyi agye. Na obotum so aka nkorɔfo abɔ mu wɔ kwan bi do a biribi fofor biara nnkotum ayɛ.”​—Nelson Mandela, South Africa ɔmampanyin dadaw.

•   “Bɔɔlbɔ ka nkorɔfo bɔ mu, osiandɛ ɔma wɔdze hɔn enyi si adze kor do, hɔn enyi gye, na wɔdze kyerɛ dɛ wɔdodɔ hɔnho na ɔmmfa ho beebi a hɔn mu biara fi no, wɔyɛ nyimpa kor.”​—Gianni Infantino, ɔpanyin a ɔda FIFA a ano.

 Ehwɛ a, World Cup no anaa agokansi fofor biara botum aka nyimpa abɔ mu ma aayɛ yie? Aso asomdwee na koryɛ botum aba wiadze yi mu?

 Ɔwɔ mu dɛ World Cup no yɛ agokansi dze, naaso afe yi dze no akɛfa nsɛnsɛm pii aba. Nsɛnsɛm a wɔakɛfa aba no mu bi fa nyimpa fahodzi, nyimpa mu nyiyimu, nye mbrɛ binom dzi hia na binom so dzi yie no ho.

 Naaso iyi nyina ekyir no, nyimpa pii susu dɛ World Cup no yɛ agokansi bi a ɔdze enyigye ba. Nyimpa pii yamu a nkyɛ, agokansi dze asomdwee a ɔtsena hɔ daa ba, naaso nokwasɛm nye dɛ ɔrennyɛ yie da. Osiandɛ mpɛn pii no mpaapaamu mbom na ɔdze ba, na dɛm suban yi ara so na Bible ka dɛ nyimpa bɛda no edzi wɔ “nda a odzi ekyir no mu.”​—2 Timothy 3:1-5.

 Bible no ma yehu dza obotum ama nyimpa a wɔwɔ wiadze nyina aka abɔ mu. Ɔhyɛ hɛn bɔ dɛ, ber bi bɛba a nyimpa a wɔwɔ asaase do nyina bɛyɛ kor wɔ sor aban bi a wɔfrɛ no ‘Nyankopɔn n’Ahendzi’ no ase.​—Luke 4:43; Matthew 6:10.

 Jesus Christ a ɔyɛ dɛm Ahendzi no do Hen no bɛma asomdwee aba asaase yi nyina do. Bible no ka dɛ:

•   ‘Atseneneefo bɛyɛ prɔmprɔm; na asomdwee pii bɛba.’​—Ndwom 72:7.

•   “Ɔbɛgye ohianyi a osu frɛ no no . . . Ɔbɛgye hɔn efi nhyɛdo na etsirmɔdzensɛm mu.”​—Ndwom 72:12, 14, NWT.

 Yɛreka yi ara, ndɛ Jesus ne nkyerɛkyerɛ no aka nyimpa mpempem pii abɔ mu wɔ nsaase 239 do. Dɛm nkorɔfo yi eyi nyimpa ho tan efi hɔn mu. Sɛ epɛ dɛm asɛm yi ho nsɛm pii a, kenkan Ɔweɔn-Aban a wɔato dzin “Breaking the Cycle of Hatred.”