BETHEL SOM EDWUMA Wɔ Fida ewiaber no, wɔbɛyɛ nhyiamu ama hɔn a wɔpɛ dɛ wɔkɔsom wɔ Bethel. Adawurbɔfo a wɔabɔ hɔn esu a wonndzii mmboor mfe 35 na hɔn enyi gye ho dɛ wɔbɔsom wɔ Bethel no nyɛ nhyehyɛɛ nkɔ bi. Wɔdze bea pɔtsee nye ber a wɔbɛyɛ nhyiamu yi ho nkaabɔ bɔto gua ekyir yi.

AHENDZI ASƐMPAKAFO SKUUL Wɔ Kwesida ewiaber no, wɔbɛyɛ nhyiamu ama hɔn a wɔpɛ dɛ wɔkɔ Ahendzi Asɛmpakafo Skuul no. Wɔto nsa frɛ akwampaaefo a woedzi mfe 23 kesi 65 a hɔn enyi gye ho dɛ wɔbɛtserɛw hɔn som edwuma no mu dɛ, wɔnkɔ bi. Wɔdze bea pɔtsee nye ber a wɔbɛyɛ nhyiamu yi ho nkaabɔ bɔto gua ekyir yi.  MMA MMPA ABAW! 2017 Jehovah Adasefo Ɔmantɔw Ehyiadzi Jehovah Adasefo Akwankyerɛ Kuw no na wɔyɛɛ ho nhyehyɛɛ

ATTENDANTFO Attendantfo no ayɛ krado dɛ wɔdze mboa a ihia no bɛma wo. Ntsi yɛserɛ dɛ bɔ mbɔdzen dzi akwankyerɛ biara a wɔdze bɛma wo afa dza odzidzi do yi ho no do: mbea ahorow a ɔwɔ dɛ wɔdze ahɛn sisi, beebi a ɔwɔ dɛ nyimpa fa, ngua a wogya to hɔ ma afofor nye dza ɔkekã ho.

ESUBƆ Wɔahyɛ da egya ngua a osisi enyim wɔ bea a ɔnye bamba no dzi nhwɛenyim no ama esubɔfo. Sɛ wɔyɛ nsesã a, wɔbɛkã akyerɛ hom. Ɔwɔ dɛ hɔn a wɔpɛ dɛ wɔbɔ hɔn esu no nyinara bɛtsena dɛm ngua no do ansaana esubɔ ho ɔkasa no ahyɛ ase Memenda anapa. Ɔwɔ dɛ obiara dze entuho (towur) nye ntar a ɔfata a ɔbɛhyɛ ma wɔdze abɔ no esu no ba.

NTOBOA AHOROW Wɔabɔ kaw kɛse na ama yeetum eenya ngua dodow a ɔfata, akasamu mfir, mfir a wɔdze yi video nye dza ɔkekã ho a ɔbɛma ehyiadzi dwumadzi no ayɛ ahomkã. Iyi nyinara bɔboa hɛn ma yaabɛn Jehovah. Sɛ ifi wo pɛ mu yi ntoboa a, ɔbɛma yeetum eetua kaw ahorow yi, na aaboa wiadze nyina som edwuma no. Yɛdze ntoboa ndaka a wɔakyerɛkyerɛw ho pefee esisi mbea ahorow wɔ ehyiadzi yi ase na ama ntoboayi aayɛ mberɛw. Hɛn enyi sɔ ntoboa ahorow a woyi no nyinara papanara. Akwankyerɛ Kuw no pɛ dɛ wɔda wo ase wɔ ayamuyie mu a ifi boa wiadze nyina som edwuma no.

EDUGYEBEA Yeserɛ, kaa dɛ bea yi wɔ hɔ ma MPOFIRMU YARBA NKOTSEE.

BEA A WƆHWEHWƐ NDZƐMBA A WƆAYEYEW Ɔwɔ dɛ wɔdze adze biara a ɔayew a wonnhu no wura no kɔ dɛm dwumadzibea yi. Sɛ w’adze biara yew a, ibotum aakɔ dɛm bea yi akɔhwehwɛ adzekor no wɔ hɔ. Ɔwɔ dɛ wɔdze mbofra a wɔayeyew na wonnhu hɔn awofo kɔ dɛm dwumadzibea yi. Naaso ɔnnsɛ dɛ yebu ha dɛ beebi a wɔhwɛ mbofra do. Awofo yɛserɛ, hom nhwɛ dɛ hom mba atsenatsena hom nkyɛn na hom nhwɛ hɔn do yie.

BEA A YƐBƐTSENA Yɛserɛ wo dɛ dwen afofor ho. Kaa dɛ hɔn a ibotum eegya ngua ama hɔn nye; w’ebusuafo, hɔn a enye hɔn faa hɛn kor, hɔn a enye hɔn tse fie kor mu, anaa igu do nye hɔn sũa Bible no. Yɛserɛ dɛ mma mmfa ndzɛmba nngugu ngua a irinngya mma obiara no do.

ETUHOAKYƐ EDWUMA Sɛ epɛ dɛ itu woho si hɔ yɛ edwuma wɔ ehyiadzi yi ase a, yɛserɛ wo dɛ kɔ dɛm dwumadzibea yi.