ATTENDANTFO Attendantfo no ayɛ krado dɛ wɔdze mboa a ihia no bɛma wo. Ntsi yɛserɛ dɛ akwankyerɛ biara a wɔdze bɛma wo afa dza odzidzi do yi ho no, bɔ mbɔdzen dɛ ibedzi do: mbea ahorow a ɔwɔ dɛ wɔdze ahɛn sisi, beebi a ɔwɔ dɛ nyimpa fa, ngua a wogya to hɔ ma afofor nye dza ɔkeka ho.

BEA A WƆHWEHWƐ NDZƐMBA A WƆAYEYEW Ɔwɔ dɛ wɔdze adze biara a ɔayew a wonnhu no wura no kɔ dwumadzibea a wɔato dzin Lost and Found Department. Sɛ w’adze biara yew a, ibotum akɔ dɛm bea yi akɔhwehwɛ adzekor no wɔ hɔ. Ɔwɔ dɛ wɔdze mbofra a wɔayeyew na wonnhu hɔn awofo kɔ dɛm dwumadzibea yi. Naaso, mbrɛ ɔbɛyɛ a yɛremmfa ɔhaw biara nnto afofor do ntsi, yɛserɛ awofo dɛ, hom nhwɛ dɛ hom mba atsenatsena hom nkyɛn na hom nhwɛ hɔn do yie.

BEA A YƐBƐTSENA Yɛserɛ wo dɛ dwen afofor ho. Kaa dɛ hɔn a ibotum egya ngua ama hɔn nye w’ebusuafo, hɔn a enye hɔn faa hɛn kor, hɔn a enye hɔn tse fie kor mu, anaa igu do nye hɔn sũa Bible no. Yɛserɛ dɛ mma mmfa ndzɛmba nngugu ngua a irinngya mma obiara no do.

EDUGYEBEA Yɛserɛ, kaa dɛ bea yi wɔ hɔ ma mpofirmu yarba nkotsee.

ENUMA Wɔahyɛ da ara egya ngua a osisi enyim wɔ bea a ɔnye bamba no dzi nhwɛenyim no ama hɔn a wobonuma hɔn no. Sɛ wɔyɛ nsesa a, wɔbɛkã akyerɛ hom. Ɔwɔ dɛ hɔn a wɔpɛ dɛ wonuma hɔn no nyinara bɛtsena dɛm ngua no do ansaana enuma ho ɔkasa no ahyɛ ase Memenda anapa. Ɔwɔ dɛ obiara dze entuho (towur) nye ntar a ɔfata a ɔbɛhyɛ ma wɔdze enuma no no ba.

ETUHOAKYƐ EDWUMA Sɛ epɛ dɛ itu woho si hɔ yɛ edwuma wɔ ehyiadzi yi ase a, yɛserɛ wo dɛ kɔ dwumadzibea a wɔato dzin Information and Volunteer Service Department.

NTOBOA AHOROW Wɔabɔ kaw kɛse ama yeetum enya ngua dodow a ɔfata, akasamu mfir, mfir a wɔdze yi video nye dza ɔkeka ho a ɔbɛma ehyiadzi dwumadzi no ayɛ ahomka. Iyi nyinara bɔboa hɛn ma yaabɛn Jehovah. Sɛ ifi wo pɛ mu yi ntoboa a, ɔbɛma yeetum etua kaw ahorow yi, na aaboa wiadze nyina som edwuma no. Yɛdze ntoboa ndaka a wɔakyerɛkyerɛw ho pefee esisi mbea ahorow wɔ ehyiadzi yi ase ama ntoboayi aayɛ mberɛw. Ibotum so akɔ donate.pr418.com na eeyi wo ntoboa no wɔ intanɛt do. Ntoboa ahorow a hom yi no, hɛn enyi sɔ papaapa. Akwankyerɛ Kuw no pɛ dɛ wɔda hom ase wɔ ayamuyie mu a hom fi boa wiadze nyina som edwuma no.

Ahendzi Asɛmpakafo Skuul Wɔ Kwesida ewiaber no, wɔbɛyɛ nhyiamu ama hɔn a wɔpɛ dɛ wɔkɔ Ahendzi Asɛmpakafo Skuul no. Wɔto nsa frɛ akwampaaefo a woedzi mfe 23 kesi 65 a hɔn enyi gye ho dɛ wɔbɛtserɛw hɔn som edwuma no mu dɛ, wɔnkɔ bi. Wɔdze ber nye bea pɔtsee a wɔbɛyɛ nhyiamu yi ho nkaabɔ bɔto gua.