Boa w’etsiefo no ma wɔnyɛ hɔnankasa hɔn mu nhwehwɛmu. Bisa nsɛm bi a ɔbɔboa hɔn a woritsie wo no ma hɔnankasa ahwehwɛ hɔn ho mu ahwɛ mbrɛ wosi tse nkã wɔ ndzɛmba ho.

Enye w’etsiefo no nsusu nsɛm ho ma wonnya adwempa. Hyɛ w’etsiefo no nkuran ma wonsusu siantsir a wɔyɛ ndzepa no ho. Adze a oye sen biara a ɔsɛ dɛ okenyan hɛn ma yɛyɛ dza ɔtsen nye ɔdɔ a yɛwɔ ma Jehovah, hɛn mfɛfo nyimpa, nye dza Bible kyerɛkyerɛ no. Ntsi boa w’etsiefo no ma wonnya dɛm adwempa no. Enye w’etsiefo no nsusu nsɛm ho; mma mmfa wo nsɛm no nnhyɛ hɔn do. Sɛ edze w’asɛm no ba ewiei a, dɛ nkyɛ ebɛma w’etsiefo no atse nka dɛ ahyɛ hɔn enyiwu no, ma wɔntse nka dɛ ahyɛ hɔn nkuran mbom, na ekenyan hɔn dɛ wɔnyer hɔnho nyɛ dza wobotum biara.

Twe adwen kɔ Jehovah do. Kyerɛ mbrɛ Bible nkyerɛkyerɛ, no mu ngyinadonsɛm, na no mu ahyɛdze ahorow ma yehu Nyankopɔn no su ahorow nye mbrɛ osi dɔ hɛn no. Boa w’etsiefo no ma wonsusu mbrɛ Jehovah tse nka no ho na wonnya ɔpɛ dɛ wɔbɛyɛ dza ɔsɔ n’enyi.