“Ɔsɛ dɛ hom yɛ akyerɛkyerɛfo.” (Heb. 5:12) Dwen ho hwɛ! Jehovah​—Ɔkyerɛkyerɛfo a oye kyɛn obiara no​—to nsa frɛ hɛn dɛ yɛnkyerɛkyerɛ afofor no ho adze! Dwumadzi biara a yebenya dɛ yɛdze bɛkyerɛkyerɛ afofor nokwar a ɔfa Jehovah ho no​—dɛ ɔyɛ ebusua no mu o, asafo no mu o, anaa wɔ asɛnka mu no​—yɛ hokwan soronko nye asodzi a no mu yɛ dur. Naaso, yɛbɛyɛ dɛn etum ayɛ no yie?

Yebenya ho mbuae wɔ nsɛm a ɔsomafo Paul kyerɛwee kɛmaa Timothy no mu: “Ma w’enyi nku akenkan, afotu, nkyerɛkyerɛ mu.” Paul dze kaa ho dɛ: “Eyɛ dɛm a, ebɛgye woho nye w’etsiefo nkwa.” (1 Tim. 4:13, 16) Ewɔ nkwagyesɛm bi a ɔsɛ dɛ ekã kyerɛ afofor. Ntsi no ho hia papaapa dɛ ebɔbɔ mbɔdzen na etu mpon wɔ w’akenkan na wo nkyerɛkyerɛ mu. Woesiesie dɛm nwomaba yi mbrɛ ɔbɔboa wo ma eetum ayɛ dɛm. Ɔwo dze, hwɛ n’afã ahorow bi.

Ɔkyerɛkyerɛfo biara nnyi hɔ a ɔtse dɛ Jehovah. (Job 36:22) Dɛm nwomaba yi bɔboa wo ma eetu mpon wɔ w’akenkan na wo nkyerɛkyerɛ mu dze, naaso mma wo werɛ mmfir da dɛ Jehovah nye asɛm a yɛkã no nyina ne Farbaa, na ɔyɛ ɔno na ɔtwe nkorɔfo. (John 6:44) Ntsi, bɔ mpaa da biara fa serɛ sunsum krɔnkrɔn. Fa Nyankopɔn n’Asɛm dzi dwuma aber biara. Twe adwen kɔ Jehovah do, na nnyɛ wankasa wo do. Bɔ mbɔdzen boa w’etsiefo no ma wonnya ɔdɔ kɛse mma Jehovah.

Wɔato nsa afrɛ wo dɛ kyerɛkyerɛ nkrasɛm a no ho hia kyɛn biara a wɔdze ama nyimpa pɛn no. Yɛwɔ ahotodo dɛ sɛ edze woho to “ahoɔdzen a Nyankopɔn dze ma” no do a, obesi wo yie.​—1 Pet. 4:11.

Wo mfɛfo akyerɛkyerɛfo,

Jehovah Adasefo Akwankyerɛ Kuw