‘Nyankopɔn . . . bɛpepa hɔn enyiwa mu nyinsuwa nyina; na owu nnyi hɔ bio; na awerɛhow nye sũ nye yaw bi nnyi hɔ bio.’​—Nyikyerɛ 21:3, 4, Nwoma Krɔnkrɔn, Fante Bible.

Awerɛhyɛmu dɛ ɔnnyɛ Nyankopɔn na ɔdze haw ba hɛn do.​—James 1:13.

Awerɛkyekyer ber a inyim dɛ Nyankopɔn tse ma hɛn wɔ hɛn amandzehu ber mu.​—Zechariah 2:8.

Enyidado dɛ amandzehu nyina bɛba ewiei.​—Ndwom 37:9-11.

Nyew, nsɛm ebien a odzidzi do yi bɔboa hɛn:

• Nyankopɔn kyir amandzehu na nsisi. Susu mbrɛ Jehovah Nyankopɔn tsee nkã ber a nna woridzi no nkorɔfo emim wɔ Bible mber do no. Bible kã dɛ ɔyɛɛ Nyankopɔn yaw osiandɛ ‘woyii hɔn ahomtsew no ntsi.’​—Atsɛmbuafo 2:18.

  Nyankopɔn kyir hɔn a wopira hɔn nyɛnko nyimpa no kɔkɔɔkɔ. Dɛ nhwɛdo no, Bible kã dɛ “nsa a ɔkã bɔgya a odzi bem gu” no yɛ n’ekyiwadze.​—Mbɛbusɛm 6:16, 17.

• Nyankopɔn dwen hɛn ho nkorkor. Ɔnnyɛ dɛ obi nankotsee na onyim “nankasa no wuyar na nankasa ne yaw,” na mbom Jehovah so nyim papaapa!​—2 Mbermunsɛm 6:29, 30.

  Jehovah nam no sor Ahendzi no do bɛma nyimpa biara n’amandzehu aba ewiei ndaansa yi ara. (Matthew 6:9, 10) Sesei dze, ofi ayamuhyehye mu kyekye hɔn a hɔn enyi ber hwehwɛ n’ekyir kwan no werɛ.​—Ndwuma 17:27; 2 Corinthfo 1:3, 4.