ESUADZE 8
Ebɛnadze Ntsi Na Nyankopɔn Ma Bɔn na Amandzehu Ho Kwan?
1. Ɔyɛɛ dɛn na bɔn hyɛɛ ase?
Ber tsentsen a Nyankopɔn ama nyimpa kwan ma woedzi hɔnho do tum no ada edzi dɛ wonnkotum edzi adasamba haw ho dwuma
Bɔn hyɛɛ ase wɔ asaase do ber a Satan dzii ator a odzi kan no. Nna Satan yɛ ɔbɔfo a odzi mu dze, naaso ‘ɔanntsena nokwar no mu.’ (John 8:44) Onyaa akɔndɔ maa ɔsom a nna ɔsɛ fata Nyankopɔn nkotsee no. Satan dzii ator kyerɛɛ Eve na ɔdaadaa no ma ɔyɛɛ setsie maa ɔno sen dɛ nkyɛ obetsie Nyankopɔn mbom. Adam kɛkãa Eve ho ma wɔyɛɛ Nyankopɔn do asoɔdzen. Gyinae a Adam sii no na ɔdze amandzehu na owu aba.—Kenkan Genesis 3:1-6, 19.
Ber a Satan redaadaa Eve ma ɔaayɛ Nyankopɔn do asoɔdzen no, nna ɔyɛ etũa na ɔrehyɛ ase atsew etsia Nyankopɔn no tumdzi anaa ne dzibew dɛ Ɔsorsornyi no. Nyimpadodow no ara na wɔakɛkã Satan ho ma wɔapow Nyankopɔn dɛ hɔn Tumfo. Dɛm ntsi, Satan na ɔabɛyɛ “wiadze hen no.”—Kenkan John 14:30; 1 John 5:19.
2. Nna mfom wɔ Nyankopɔn n’abɔdze ho?
Nyankopɔn n’abɔdze nyinara dzi mu. Nna nyimpa na abɔfo a Nyankopɔn abɔ hɔn no botum ayɛ setsie a odzi mu ama Nyankopɔn. (Deuteronomy 32:4, 5) Nyankopɔn bɔɔ hɛn no, ɔmaa hɛn hokwan a ɔma yetum kyerɛ dɛ yebotum ayɛ ndzepa anaa ndzebɔn. Dɛm hokwan yi ma yɛda ɔdɔ a yɛwɔ ma Nyankopɔn no edzi.—Kenkan James 1:13-15; 1 John 5:3.
3. Ebɛnadze ntsi na Nyankopɔn ama amandzehu ho kwan dze bodu ndɛ?
Ofitsi Eden ture no mu dze besi ndɛ no, Jehovah ama kwan ma wɔatsew no tumdzi do etũa. Ebɛnadze ntsi a? Mbrɛ ɔbɛda edzi dɛ, sɛ Nyankopɔn ne nsa nnyi mu a, mbɔdzen biara a nyimpa bɔbɔ dɛ obedzi ne nyɛnko nyimpa do tum no bowie mbusu mu. (Ɔsɛnkafo 7:29; 8:9) Mfrenhyia 6,000 ekyir wɔ nyimpa abakɔsɛm mu no da nokwasɛm yi edzi. Nyimpa etumfo nnkotum eyi ɔkõ, emumuyɛ, basabasayɛ anaa yarba efi hɔ da!—Kenkan Jeremiah 10:23; Romefo 9:17.
Nyimpa tumdzi nntse dɛ Nyankopɔn dze no, osiandɛ Nyankopɔn no tumdzi dze mfaso brɛ hɔn a wɔgye to mu no. (Isaiah 48:17, 18) Ɔnnkɛkyɛr, Jehovah beyi nyimpa tumdzi nyina efi hɔ. Hɔn a wɔgye Nyankopɔn no tumdzi to mu no nkotsee na wɔbɛtsena asaase do.—Isaiah 11:9.—Kenkan Daniel 2:44.
Hwɛ video a wɔato dzin Ebɛnadze Ntsi Na Nyankopɔn Ma Amandzehu Ho Kwan?
4. Ebɛn hokwan na penkyɛr a Nyankopɔn wɔ no ama yeenya?
Satan abɔ sombo dɛ, nyimpa biara nnkotum efi n’akoma nyinara mu asom Nyankopɔn. Ana epɛ dɛ eda no edzi dɛ dɛm asɛm no yɛ ator? Ibotum ayɛ dɛm ankasa! Penkyɛr a Nyankopɔn wɔ no ama hɛn nyinara enya hokwan a yɛdze bɛkyerɛ dɛ, yɛgye Nyankopɔn anaa nyimpa no tumdzi to mu. Hɛn abrabɔ na ɔbɛkyerɛ dza yɛgye to mu.—Kenkan Job 1:8-12; Mbɛbusɛm 27:11.
5. Yebesi dɛn agye Nyankopɔn ato mu dɛ hɛn Tumfo?
Hɛn gyinaesi ahorow na ɔbɛkyerɛ dɛ yɛgye Nyankopɔn to mu dɛ hɛn Tumdzifo
Sɛ yɛhwehwɛ nokwar som a ogyina Nyankopɔn n’Asɛm do na yɛdze hɛn ho takyer ho a, ɔbɛkyerɛ dɛ yɛgye Nyankopɔn to mu dɛ hɛn Tumfo. (John 4:23) Tse dɛ Jesus no, yebotum apow Satan no tumdzi dze nam hɛnho a yɛbɔtwe efi ɔkõ na amanyɛsɛm ho no do.—Kenkan John 17:14.
Satan dze no tum a ɔwɔ no hyɛ ɔbrakyew na ndzebɔnyɛ ho nkuran. Sɛ yɛpow ndzeyɛbɔn a ɔtsetse dɛm yi a, hɛn anyɛnkofo na ebusuafo bɛkã hɛn ho nsɛmbɔn anaa wɔbɔsoɛr etsia hɛn. (1 Peter 4:3, 4) Ntsi otwar dɛ yesi gyinae. Ana yɛnye nyimpa a wɔdɔ Nyankopɔn bɔbɔ? Ana yɛbɛyɛ setsie ama ne mbra a ɔkyerɛ ɔdɔ na nyansa wɔ mu no? Sɛ yɛyɛ dɛm a, yɛbɛkyerɛ dɛ asɛm a Satan kãa dɛ, sɛ nyimpa wɔ ahokyer mu a ɔnnkɛyɛ setsie ama Nyankopɔn no yɛ ator.—Kenkan 1 Corinthfo 6:9, 10; 15:33.
Ɔdɔ a Nyankopɔn wɔ ma adasamba no yɛ awerɛhyɛmu a ɔkyerɛ dɛ bɔn na amandzehu bɛba ewiei. Hɔn a wɔgye Nyankopɔn no tumdzi to mu na wɔda no edzi dɛ Nyankopɔn n’akwan dzi mu no benya onnyiewiei nkwa wɔ asaase do.—Kenkan John 3:16.
