Nyankopɔn to nsa frɛ nyimpa nyina dɛ wɔntwe mpin no wɔ mpaabɔ mu. (Ndwom 65:2) Naaso, nnyɛ mpaabɔ nyina na otsie. Dɛ nhwɛdo no, okun a ɔyɛ ne yer ayaayaadze no, ne mpaabɔ kwan botum esiw. (1 Peter 3:7) Bio so, Nyankopɔn enntsie Israelmba no hɔn mpaabɔ ber a wɔkɔr do yɛɛ ndzeyɛbɔn no. Hokwan a yeenya dze bɔ Jehovah mpaa no, ɔnnsɛ dɛ yebu no tootooba da. Sɛ ndzebɔnyɛfo mpo nya nnuho a, Nyankopɔn betsie hɔn mpaabɔ.​—Kenkan Isaiah 1:15; 55:7.

Hwɛ video a wɔato dzin Aso Mpaabɔ Nyina Na Nyankopɔn Tsie?

Mpaabɔ kã hɛn som ho, dɛm ntsi ɔsɛ dɛ yɛbɔ Jehovah, hɛn Bɔfo no, nkotsee mpaa. (Matthew 4:10; 6:9) Bio so, susuampaara dɛ bɔn wɔ hɛn ho yi, ɔsɛ dɛ yɛbɔ mpaa wɔ Jesus ne dzin mu osiandɛ owui maa hɛn bɔn. (John 14:6) Jehovah mmpɛ dɛ yɛbɛkyer mpaabɔ egu hɛn tsir mu anaa yɛbɔkyerɛw na yɛabɔ. Ɔpɛ dɛ yefi hɛn akoma mu bɔ mpaa.​—Kenkan Matthew 6:7; Philippifo 4:6, 7.

Hɛn Bɔfo no botum atse mpaa a yɛbɔ wɔ akoma mu na ommpuei wɔ hɛn ano mpo no. (1 Samuel 1:12, 13) Ɔto nsa frɛ hɛn dɛ yɛmbɔ no mpaa aber biara, dɛ ɔyɛ anapa anaa ewimbir, ber a yeribedzidzi anaa ber a yerihyia nsɛndzendzen.​—Kenkan Ndwom 55:22; Matthew 15:36.

Ɔnnyɛ mberɛw dɛ yɛbɔtwe epin Nyankopɔn, osiandɛ hɔn a yɛnye hɔn tse no yɛ nkorɔfo a wonnyi Nyankopɔn no mu gyedzi na wosi n’anohoba a ɔabɔ dɛ ɔdze asomdwee bɛba asaase do no ho atwetwe. (2 Timothy 3:1, 4; 2 Peter 3:3, 13) Ntsi ohia dɛ yɛnye hɛn mfɛfo agyedzifo hyia mu na yɛhyɛ hɛnho nkuran.​—Kenkan Hebrewfo 10:24, 25.

 Sɛ yɛnye hɔn a wɔdɔ Nyankopɔn no bɔ fɛkuw a, ɔboa hɛn ma yɛtwe pin Nyankopɔn. Jehovah Adasefo nhyiamu ma yenya hokwan ahorow dze hyɛ hɛn enuanom gyedzi dzen.​—Kenkan Romefo 1:11, 12.

Ibotum atwe epin Jehovah dze nam dza esũa efi n’Asɛm mu a ebɔdwendwen ho no do. Dwendwen dza ibotum esũa efi no ndwuma, n’afotu nye n’anohoba ahorow mu no ho. Mpaabɔ na ndzɛmba ho a yɛbɔdwendwen no bɔboa hɛn ma yaakyerɛ Nyankopɔn no dɔ nye ne nyansaa ho enyisɔ wɔ hɛn akoma mu.​—Kenkan Joshua 1:8; Ndwom 1:1-3.

Sɛ inya Nyankopɔn no mu ahotodo, na inya no mu gyedzi nkotsee dze a, ibotum atwe epin no. Naaso gyedzi tse dɛ abɔdze a nkwa wɔ mu. Ohia nsu, edziban na mframa. Ɔsɛ dɛ ekɔ do hyɛ wo gyedzi dzen, dze nam dwen a ebɔdwendwen siantsir a ewɔ gyedzi wɔ ndzɛmba ahorow bi mu no ho no do.​—Kenkan Matthew 4:4; Hebrewfo 11:1, 6.

Jehovah dwen hɔn a wɔdɔ no no ho. Obotum abɔ hɔn ho ban efi biribiara a obotum asɛɛ hɔn gyedzi nye onnyiewiei nkwa ho enyidado a wɔwɔ no. (Ndwom 91:1, 2, 7-10) Ɔbɔ hɛn kɔkɔ wɔ ndzeyɛɛ a otum sɛɛ hɛn apɔwmudzen na enyigye a yɛwɔ no ho. Jehovah kyerɛkyerɛ hɛn asetsena kwan a oye sen biara.​—Kenkan Ndwom 73:27, 28; James 4:4, 8.