Nokwar Nyankopɔn no na Ɔbɔɔ adze nyina. Onnyi ahyɛse na onnyi ewiei so. (Ndwom 90:2) Ɔnoara so na ɔyɛ asɛmpa a Bible no kã ho asɛm no Farbaa. (1 Timothy 1:11) Osiandɛ Nyankopɔn na ɔyɛ hɛn nkwamafo ntsi, ɔno nkotsee na otwar dɛ yɛsom no.​—Kenkan Nyikyerɛ 4:11.

Nyimpa biara nnyi hɔ a oehu Nyankopɔn pɛn osiandɛ ɔyɛ Sunsum. Iyi kyerɛ dɛ ɔkrɔn sen honam abɔdze nyina a wɔwɔ asaase do no. (John 1:18; 4:24) Naaso ndzɛmba a Nyankopɔn abɔ no ma yehu no suban ahorow. Dɛ nhwɛdo no, nduaba na nhyiren asorɔtow a ɔabɔ no ma yehu dɛ ɔwɔ ɔdɔ na nyansa. Bio so, wiadze yi ne kɛse na no mu ndzɛmba nyinara a ɔabɔ no ma yehu dɛ ɔwɔ tum.​—Kenkan Romefo 1:20.

Yebotum esũa Nyankopɔn no suban ho adze pii dze nam Bible no a yɛbɛkenkan no do. Dɛ nhwɛdo no, Bible no ma yehu dza Nyankopɔn pɛ nye dza ɔmmpɛ, mbrɛ ɔnye nkorɔfo dzi, nye mbrɛ odzi tsebea biara ho dwuma.​—Kenkan Ndwom 103:7-10.

Jesus see dɛ: “Hɛn Egya a ewɔ sor, wo dzin ho ntsew.” (Matthew 6:9) Ɔyɛ nokwar dɛ Nyankopɔn wɔ abɔdzin ahorow pii dze, naaso ne dzin yɛ kortsee. Wɔ kasa biara mu no, ɔsor mbrɛ wosi bɔ no. Wɔ Mfantse mu no, wɔtaa bɔ no “Jehovah.” Naaso nkorɔfo binom bɔ no “Yehowa anaa Yahweh.”​—Kenkan Ndwom 83:18.

Woeyi Nyankopɔn ne dzin efi Bible ahorow pii mu na wɔdze abɔdzin ahorow tse dɛ Ewuradze, Nyankopɔn anaa Nyame ahyɛ ananmu. Naaso ber a wɔkyerɛɛw Bible no, nna Nyankopɔn ne dzin no puei wɔ mu bɛyɛ mpɛn 7,000.  Jesus daa Nyankopɔn ne dzin no edzi kyerɛɛ nkorɔfo ber a ɔkyerɛkyerɛɛ hɔn Nyankopɔn ho adze no.​—Kenkan John 17:26.

Hwɛ video a wɔato dzin Aso Nyankopɔn Wɔ Dzin?

Aso amandze a nyimpa pii ruhu no kyerɛ dɛ Jehovah yɛ Nyankopɔn a ɔnndwen hɛn ho? Nyimpa binom kyerɛ dɛ ɔma yehu amandze dze sɔ hɛn hwɛ. Naaso, iyi nnkotum ayɛ nokwar ara da.​—Kenkan James 1:13.

Nyankopɔn dze enyidzi ama hɛn, dɛm ntsi na ɔama hɛn hokwan ma yetum si dza yɛpɛ biara ho gyinae no. Ana ɔnnyɛ hɛn enyigye dɛ hɛnankasa tum si gyinae dɛ yɛbɔsom Nyankopɔn? (Joshua 24:15) Naaso, nyimpa pii hyɛ da yɛ ndzebɔn tsia nkorɔfo. Iyi na ɔama nyimpa pii ruhu amandze no. Sɛ Jehovah hu ndzebɔnyɛ a ɔtse dɛm a, ɔma odzi yaw.​—Kenkan Genesis 6:5, 6.

Jehovah yɛ Nyankopɔn a ɔdwen hɛn ho. Ɔpɛ dɛ yedzi dɛw wɔ hɛn asetsena mu. Ɔnnkɛkyɛr, obeyi amandzehu na hɔn a wɔdze ba nyina efi hɔ. Naaso sesei dze, ɔwɔ siantsir paa bi ntsi a ɔama kwan kakra ma amandzehu rokɔ do no. Wɔ adzesua asɛm a otsĩa 8 mu no, yebosũa siantsir a ɔayɛ dɛm no ho adze.​—Kenkan 2 Peter 2:9; 3:7, 13.

Jehovah to nsa frɛ hɛn dɛ yɛntwe mpin no dze nam mpaabɔ do. N’enyi gye hɛn mu biara ho. (Ndwom 65:2; 145:18) Ɔpɛ dɛ ɔdze hɛn bɔn kyɛ hɛn. Kaansa ɔtɔfabi na yɛfom mpo a, ohu mbɔdzen a yɛbɔ dɛ yɛbɛyɛ dza ɔtsen wɔ n’enyi do. Ntsi ɔmmfa ho dɛ yɛtɔ sin no, yebotum nye Nyankopɔn enya anyɛnkofa a no mu yɛ dzen.​—Kenkan Ndwom 103:12-14; James 4:8.

Osiandɛ Jehovah na ɔakyɛ hɛn nkwa ntsi, otwar dɛ yɛdɔ no sen nyimpa biara. (Mark 12:30) Sɛ isũa Nyankopɔn ho adze pii na edze dza ɔkã kyerɛ wo no dzi dwuma a, iyi bɛkyerɛ dɛ edɔ no na ibepinkyɛn no ber nyina.​—Kenkan 1 Timothy 2:4; 1 John 5:3.