1, 2. (a) Ebɛnadze na ɔma akyɛdze bi yɛ dza ɔsom bo kɛse ma wo? (b) Ebɛnadze ntsi na werdam no yɛ Nyankopɔn n’akyɛdze a ɔsom bo paa?

EBƐN akyɛdze na ɔsom bo paa a wo nsa akã pɛn? Sɛ akyɛdze bi bɛyɛ dza ɔsom bo ma wo a, onnhia dɛ no bo yɛ dzen ana. Sɛ akyɛdze bi ma w’enyi gye anaa akyɛdze no yɛ biribi a ihia ankasa a, ɔma ekyerɛ ho enyisɔ kɛse.

² Nyankopɔn n’akyɛdze a ɔdze ama hɛn nyinara mu no, kor bi dze, ohia hɛn sen biara. Ɔyɛ Nyankopɔn n’akyɛdze a ɔsom bo sen biara a ɔdze ama nyimpa. Yebohu wɔ tsir asɛm yi mu dɛ, Jehovah somaa ne Ba Jesus Christ baa asaase yi do bowui dze no nkwa yɛɛ werdam maa hɛn, mbrɛ ɔbɛyɛ a yebotum atsena ase daa. (Kenkan Matthew 20:28.) Jehovah ada no edzi dɛ ɔdɔ hɛn ankasa dze nam Jesus a ɔsomaa no baa asaase do ma ɔdze no nkwa bɛyɛɛ werdam maa hɛn no.

3. Ebɛnadze ntsi na nyimpa wu?

³ Werdam no yɛ kwan a Jehovah nam do bɛgye nyimpa efi bɔn nye owu mu. (Ephesusfo 1:7) Sɛ yɛbɛtse siantsir a nna werdam no ho hia no ase a, ɔsɛ dɛ yehu dza osii wɔ Eden ture no mu mfrenhyia mpempem pii a etwa mu no. Hɛn awofo a wodzi kan, Adam na Eve yɛɛ bɔn ntsi wowuwui. Osian bɔn a yenyae fii Adam na Eve hɔ ntsi na hɛn so yewuwu no.​—Hwɛ Nsɛm bi a Wɔakyerɛ Mu 9.

4. Nna woana nye Adam? Nna ebɛnadze na ɔwɔ?

 ⁴ Ber a Jehovah bɔɔ nyimpa a odzi kan, Adam no, Ɔmaa no akyɛdze bi a ɔsom bo. Ɔmaa Adam nkwa a odzi mu. Nna Adam wɔ adwen nye nyimpadua a odzi mu. Nkyɛ ɔnnkɛyar, ɔnnkɔbɔ akɔkora na onnkowu ara so da. Osiandɛ Jehovah na ɔbɔɔ Adam ntsi, nna Ɔtse dɛ egya bi ma no. (Luke 3:38) Nna Jehovah taa nye no kasa. Nyankopɔn maa Adam edwuma a ne yɛ ma akomatɔyamu na dza nna ɔhwehwɛ fi no hɔ no, ɔkyerɛkyerɛɛ mu kyerɛɛ no kofee.​—Genesis 1:28-30; 2:16, 17.

5. Sɛ Bible no kã dɛ, wɔbɔɔ Adam wɔ “Nyankopɔn no su do” a, ɔkyerɛ dɛn?

⁵ Wɔbɔɔ Adam wɔ “Nyankopɔn no su do.” (Genesis 1:27) Jehovah maa no su ahorow a ɔtse dɛ Nedze no bi, a ɔdɔ, nyansa, atsɛntsenenee, na tum kã ho. Ɔmaa Adam hokwan a otum dze si dza ɔpɛ biara ho gyinae. Nna Adam nnyɛ robɔt. Nyankopɔn bɔɔ no wɔ kwan bi do a nna obotum apaw dɛ ɔbɛyɛ dza ɔtsen anaa dza ɔnntsen. Sɛ Adam yɛɛ setsie maa Nyankopɔn a, nkyɛ ɔbɛtsena ase daa wɔ Paradise.

6. Ber a Adam annyɛ setsie no, ebɛnadze na ɔhweree? Ebɛn kwan do na iyi kã hɛn?

⁶ Ber a Adam annyɛ setsie no, Nyankopɔn kãa kyerɛɛ no dɛ obowu. Iyi maa Adam hweer adze kɛse paa. Ɔhweer ebusuabɔ soronko a nna ɔnye Jehovah wɔ, no nkwa a odzi mu nye Paradise asetsena a nna ɔwɔ mu no. (Genesis 3:17-19) Adam na Eve sii gyinae dɛ wɔrennyɛ setsie mma Nyankopɔn, ntsi nna enyidado biara nnyi hɔ mma hɔn. Osian dza Adam yɛe ntsi, ‘bɔn baa wiadze, na owu nam bɔn do bae, na owu twaa mu baa nyimpa nyina do, dɛ hɔn nyina ayɛ bɔn ntsi.’ (Romefo 5:12) Ber a Adam yɛɛ bɔn no, “ɔtɔɔn” noho na hɛn nyina kɔr bɔn  nye owu nkowaayɛ mu. (Romefo 7:14) Aso enyidado bi wɔ hɔ ma hɛn? Nyew, enyidado wɔ hɔ.

7, 8. Ebɛnadze nye werdam?

⁷ Ebɛnadze nye werdam? Werdam kyerɛ ndzɛmba etsitsir ebien. Odzi kan, werdam yɛ sika a wotua dze gye obi, anaadɛ bo a wotua dze gye biribi. Otsĩa ebien, werdam yɛ adze a wɔdze ma dze tua biribi kaw.

⁸ Adze kɛse a Adam hweree ber a ɔyɛɛ bɔn na ɔdze owu baa hɛn do no, nyimpa biara nnyi hɔ a obotum etua ho kaw. Naaso, Jehovah dze werdam no mae mbrɛ ɔbɛyɛ a ɔbɛgye hɛn efi bɔn nye owu mu. Ma yensusu dwuma a werdam no dzi, mbrɛ wosii tuae nye mfaso a yebotum enya efi mu no ho.

9. Nna ebɛn werdam na wohia?

⁹ Nkwa a odzi mu a Adam hweree no, hɛn mu biara nnyi hɔ a obotum etua no ho werdam no da. Ebɛnadze ntsi a? Osiandɛ hɛn nyinara nndzi mu. (Ndwom 49:7, 8) Nna nyimpa fofor no nkwa a odzi mu na otwar dɛ wɔdze tua werdam no. Bible no kã dɛ, Christ Jesus dze noho mae dɛ werdam anaa “asatsir maa nyimpa nyina.” (1 Timothy 2:6) Nna ɔsɛ dɛ werdam no no bo nye nkwa a odzi mu a Adam hweree no no bo yɛ pɛr.

10. Ebɛn kwan do na Jehovah dze werdam no mae?

¹⁰ Ebɛn kwan do na Jehovah dze werdam no mae? Jehovah somaa ne Ba a ɔsom bo kɛse paa baa asaase do. Nna Ɔba yi, kyerɛ Jesus, yɛ n’abɔdze a odzi kan pɛɛ. (1 John 4:9, 10) Nna Jesus wɔ ɔpɛ dɛ ofi n’Egya nkyɛn nye ne fie a nna ɔtse mu wɔ sor no, na ɔba asaase do. (Philippifo 2:7) Jehovah yii Jesus no nkwa fii sor baa  asaase do ma wɔwoo Jesus dɛ nyimpa a odzi mu a bɔn biara nnyi no ho.​—Luke 1:35.

11. Obesi dɛn na nyimpa kor etum dze no nkwa aayɛ werdam ama nyimpa nyina?

¹¹ Ber a nyimpa a odzi kan, Adam, annyɛ setsie amma Jehovah no, ɔmaa nkwa a odzi mu a nyimpa nyina benya no bɔɔ hɔn. Ana nyimpa fofor bi botum eyi owu efi hɔ ama Adam n’asefo nyina? Nyew. (Kenkan Romefo 5:19.) Jesus a ɔannyɛ bɔn da no, dze no nkwa a odzi mu no mae dɛ werdam. (1 Corinthfo 15:45) Wobotum dze no nkwa a odzi mu no eyi owu efi hɔ ama Adam n’asefo nyina.​—1 Corinthfo 15:21, 22.

12. Nna ebɛnadze ntsi na ɔsɛ dɛ Jesus hu amandze dɛm?

¹² Bible no kyerɛkyerɛ amandze a Jesus hunii ansaana oruwu no mu. Wɔhwee no etsirmɔdzen mu, wɔsɛɛn no dua do, na wokum no yayaayaw. (Ndwuma 5:30; 10:39) Nna ebɛnadze ntsi na ɔsɛ dɛ Jesus hu amandze dɛm? Osiandɛ Satan abɔ sombo dɛ, nyimpa biara nnyi hɔ a sɛ ohyia nsɔhwɛ a no mu yɛ dzen a, obedzi nokwar ama Nyankopɔn. Jesus ama ada edzi dɛ, sɛ nyimpa a odzi mu hyia nsɔhwɛ a no mu yɛ dzen sen biara mpo a, obotum edzi nokwar ama Nyankopɔn. Hwɛ mbrɛ Jesus maa Jehovah n’akoma tɔɔ ne yamu fae!​—Mbɛbusɛm 27:11; hwɛ Nsɛm bi a Wɔakyerɛ Mu 15.

13. Ebɛn kwan do na wotuaa werdam no?

¹³ Ebɛn kwan do na wotuaa werdam no? Jesus dze no nkwa a ɔsom bo no maa n’Egya. Wɔ Jewfo bosoom Nisan da a otsĩa 14, afe 33 mu no, Jehovah maa kwan ma Jesus n’atamfo kum no. (Hebrewfo 10:10) Ndaansa ekyir no, Jehovah nyaan Jesus baa nkwa mu bio dɛ sunsum abɔdze. Iyi ekyir no, ber a Jesus sanee kɔr n’Egya nkyɛn wɔ sor no, ɔdze bo a no nkwa a odzi mu no  som no kɛmaa Jehovah dɛ werdam no. (Hebrewfo 9:24) Afei a oetua werdam no, hokwan no ebuei ama hɛn dɛ wɔbɛgye hɛn efi bɔn nye owu mu.​—Kenkan Romefo 3:23, 24.

14, 15. Ebɛnadze na ɔsɛ dɛ yɛyɛ na yeenya bɔnfakyɛ?

¹⁴ Yɛkɔ do nya Nyankopɔn n’akyɛdze a ɔsom bo sen biara yi do mfaso. Yɛnhwɛ mbrɛ yenya do mfaso ndɛ nye mbrɛ yebenya do mfaso daakye.

¹⁵ Bɔnfakyɛ. Ɔnnyɛ mberɛw dɛ yɛbɛyɛ dza ɔtsen ber nyina. Yɛfom na ɔtɔfabi a, yɛkã nsɛm a ɔmmfa kwan mu na yɛyɛ dza ɔnntsen. Yebesi dɛn enya bɔnfakyɛ? Ɔsɛ dɛ yefi akoma mu nu hɛnho wɔ adzebɔn a yɛayɛ no ho na yefi ahobrɛadze mu serɛ Jehovah dɛ, ɔmfa nkyɛ hɛn. Dɛm a yɛbɛyɛ no bɛma yeenya awerɛhyɛmu dɛ wɔdze hɛn bɔn akyɛ hɛn.​—Colossaefo 1:13, 14; 1 John 1:8, 9.

16. Ebɛnadze na ɔsɛ dɛ yɛyɛ na ama yeenya tsibowa pa?

¹⁶ Yebotum enya tsibowa pa. Sɛ hɛn tsibowa kã kyerɛ hɛn dɛ yɛayɛ adzebɔn bi a, ɔma yɛtse afɔbu nkã, na ibia yɛbɛtse nkã mpo dɛ yennyi enyidado biara na yɛnnsɛ hwee. Naaso, ɔnnsɛ dɛ yɛma hɛn abaw mu bu. Sɛ yɛserɛ Jehovah hɔ bɔnfakyɛ a, yebotum enya awerɛhyɛmu dɛ obetsie hɛn na ɔdze hɛn bɔn akyɛ hɛn. (Hebrewfo 9:13, 14) Jehovah pɛ dɛ yɛkã hɛn haw nye hɛn mberɛwyɛ biara ho asɛm kyerɛ no. (Hebrewfo 4:14-16) Sɛ yɛyɛ dɛm a, yebotum enya tsibowa pa wɔ Nyankopɔn enyim.

17. Osiandɛ Jesus wui maa hɛn ntsi, ebɛn nhyira na yebotum enya?

¹⁷ Yɛwɔ enyidado dɛ yɛbɛtsena ase daa. “Bɔn akatua nye wu, na Nyankopɔn n’adom akyɛdze nye onnyiewiei nkwa wɔ hɛn Ewuradze Christ Jesus mu.” (Romefo 6:23) Osiandɛ Jesus wui maa hɛn ntsi, yebotum atsena ase  daa na yeenya apɔwmudzen a odzi mu. (Nyikyerɛ 21:3, 4) Naaso, ebɛnadze na ɔsɛ dɛ yɛyɛ na ama yeenya dɛm nhyira ahorow no?

18. Yesi dɛn hu dɛ Jehovah dɔ hɛn?

¹⁸ Sɛ obi ma wo akyɛdze bi a ɔsom bo a, susu mbrɛ osi ma w’akoma enyi gye no ho hwɛ. Werdam no yɛ akyɛdze a ɔsom bo sen biara, na ɔsɛ dɛ yɛkyerɛ enyisɔ kɛsenara ma Jehovah wɔ ho. John 3:16 kã kyerɛ hɛn dɛ, “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae.” Nyew, Jehovah dɔ hɛn papaapa ma ntsi, ɔdze ne Ba Jesus a ɔsom bo paa no maa hɛn. Afei, yenyim dɛ Jesus so dɔ hɛn, osiandɛ nna ɔwɔ ɔpɛ dɛ obowu ama hɛn. (John 15:13) Werdam no yɛ akyɛdze a ɔsɛ dɛ ɔma egye to mu dɛ Jehovah na Jesus dɔ wo papaapa.​—Galatiafo 2:20.

19, 20. (a) Ibesi dɛn abɛyɛ Jehovah ne nyɛnko? (b) Ibesi dɛn akyerɛ dɛ ewɔ gyedzi wɔ Jesus no werdam afɔrbɔ no mu?

¹⁹ Afei a esũa ɔdɔ kɛse a Nyankopɔn wɔ ma hɛn no ho adze no, ibesi dɛn na abɛyɛ ne nyɛnko? Ɔnnyɛ mberɛw dɛ ibenya ɔdɔ ama obi a innyim no. John 17:3 kyerɛ hɛn dɛ, yebotum aba ebohu Jehovah. Sɛ ekɔ do yɛ dɛm a, ɔdɔ a ewɔ ma no no bɛyɛ kɛse, ebɛpɛ dɛ eyɛ dza ɔsɔ n’enyi, na ebɛba abɛyɛ ne nyɛnko. Ntsi kɔ do sũa Jehovah ho adze dze nam Bible no a ibosũa no do.​—1 John 5:3.

²⁰ Nya Jesus no werdam afɔrbɔ no mu gyedzi. Bible no kã dɛ, ‘nyia ɔgye Ɔba no dzi no wɔ onnyiewiei nkwa.’ (John 3:36) Ɔba no a yɛbɛgye no edzi no kyerɛ dɛn? Dza ɔkyerɛ nye dɛ, yɛbɛyɛ dza Jesus kyerɛɛ hɛn dɛ yɛnyɛ no. (John 13:15) Yerunntum nnkã no kɛkɛ dɛ yɛwɔ gyedzi wɔ Jesus mu. Sɛ yebotum akyerɛ dɛ yɛwɔ gyedzi wɔ werdam no mu a, ɔsɛ dɛ yɛdze ndwuma bata  hɛn gyedzi ho. James 2:26 kã dɛ, ‘Gyedzi nnyi ndwuma a, nna oewu.’

21, 22. (a) Ebɛnadze ntsi na ɔsɛ dɛ yɛkɔ Christ no wu ho Nkaadzi afahyɛ no ase afe biara? (b) Ebɛnadze na yebosusu ho wɔ Etsir 6 nye 7 no mu?

²¹ Kɔ Christ no wu ho Nkaadzi afahyɛ no ase. Anafua ana Jesus rubowu no, ɔkãa kyerɛɛ hɛn dɛ yɛnkaa no wu no. Yɛhyɛ dɛm fã yi afe biara na wɔfrɛ no Nkaadzi anaa “Ewuradze edzidzi.” Wɔsan so frɛ no Ewuradze Ewimbir Edzidzi. (1 Corinthfo 11:20; Matthew 26:26-28) Jesus pɛ dɛ yɛkaa dɛ, ɔdze no nkwa a odzi mu no maa dɛ werdam maa hɛn. Ɔkãa dɛ: “Hom nyɛ yi mfa nyɛ me nkaa.” (Kenkan Luke 22:19.) Nkaadzi afahyɛ no ase a ebɔkɔ no kyerɛ dɛ, ekaa werdam no nye ɔdɔ kɛse a Jehovah na Jesus wɔ ma hɛn no.​—Hwɛ Nsɛm bi a Wɔakyerɛ Mu 16.

²² Werdam no yɛ akyɛdze a ɔsom bo sen biara a yebotum enya. (2 Corinthfo 9:14, 15) Nyimpa ɔpepem pii mpo a woewuwu dadaw no benya dɛm akyɛdze a ɔsom bo yi do mfaso. Yebosusu mbrɛ iyi botum ayɛ yie no ho wɔ Etsir 6 nye 7 no mu.