1, 2. Ebɛnadze ntsi na isusu dɛ mpaabɔ yɛ akyɛdze soronko, na ebɛnadze ntsi na ɔsɛ dɛ yehu dza Bible no kyerɛkyerɛ wɔ ho?

SƐ YƐDZE asaase no toto wiadze nye no mu ndzɛmba nyina ho a, asaase no suar koraa. Sɛ Jehovah hwɛ asaase no a, ohu dɛ amanaman nye no mu nyimpa nyina tse dɛ bokitsi mu nsosɔe. (Ndwom 115:15; Isaiah 40:15) Ɔwɔ mu dɛ, sɛ wɔdze hɛn toto wiadze nye no mu ndzɛmba nyina ho a, yɛnnsɛ hwee dze, naaso Ndwom 145:18, 19 kã dɛ: “Ewuradze bɛn hɔn a wɔfrɛ no nyinara, hɔn a wosũ frɛ no nokwar mu nyinara. Ɔbɛma hɔn a wosuro no no hɔn apɛdze ayɛ hɔ; obetsie hɔn nkekamu so na ɔagye hɔn nkwa.” Ebɛn hokwan soronko na yeenya yi! Jehovah, Ɔbɔadze a ɔwɔ tum sen biara no, pɛ dɛ ɔtwe pin hɛn na ɔpɛ dɛ otsie hɛn mpaabɔ so. Ampaara, mpaabɔ yɛ hokwan; ɔyɛ akyɛdze soronko a Jehovah dze ama obiara.

² Naaso, sɛ Jehovah betsie hɛn mpaabɔ a, gyedɛ yɛbɔ no mpaa wɔ ɔkwan a ɔgye to mu do. Yebesi dɛn ayɛ dɛm? Ma yensusu dza Bible no kã wɔ mpaabɔ ho.

3. Ebɛnadze ntsi na ɔsɛ dɛ ebɔ Jehovah mpaa?

³ Jehovah pɛ dɛ ebɔ no mpaa anaa enye no kasa wɔ mpaabɔ mu. Yesi dɛn hu dɛm? Yɛserɛ wo dɛ kenkan Philippifo 4:6, 7. Susu dɛm nsato a ayamuyie wɔ mu yi ho hwɛ. Nyia odzi Tum wɔ wiadze nye no mu ndzɛmba nyinara do no enyi gye woho, na ɔpɛ dɛ ekã wo haw ahorow nye mbrɛ etse nkã ho asɛm kyerɛ no.

4. Ebɛn kwan do na mpaa a ebɔ Jehovah daa no hyɛ enye no ntamu ebusuabɔ no mu dzen?

 ⁴ Mpaabɔ boa hɛn ma yɛnye Jehovah nya anyɛnkofa a no mu yɛ dzen. Sɛ anyɛnkofo taa bɔ hɔn nsusui, ndzɛmba a ɔhaw hɔn nye mbrɛ wɔtse nkã wɔ ndzɛmba ho no ho nkɔmbɔ a, ɔma hɔn anyɛnkofa no mu yɛ dzen. Mpaa a yɛbɔ Jehovah no nye iyi dzi nsɛ. Ɔnam Bible no do akã no nsusui nye mbrɛ ɔtse nkã ho asɛm akyerɛ wo, na ɔkã dza ɔbɛyɛ daakye ho asɛm so kyerɛ wo. Ibotum mpo akã mbrɛ etse nkã wɔ w’akoma mu no ho asɛm akyerɛ no daa wɔ mpaabɔ mu. Aber a ekɔ do yɛ dɛm no, enye no ntamu anyɛnkofa no mu bɔkɔ do ayɛ dzen paa.​—James 4:8.

5. Yesi dɛn hu dɛ nnyɛ mpaabɔ nyina na Jehovah tsie?

⁵ Aso mpaabɔ nyina na Jehovah tsie? Oho. Wɔ nkɔnhyɛnyi Isaiah n’aber do no, Jehovah kãa kyerɛɛ Israelmba no dɛ: “Sɛ hom yi mpaa mpo a, mirinntsie: bɔgya  ayeyɛ hom nsa amaama.” (Isaiah 1:15) Ntsi sɛ yɛannyɛ ahwɛyie a, yebotum ayɛ ndzɛmba a ɔbɛma Jehovah atwe noho efi hɛn ho. Iyi nnkɛma oetsie hɛn mpaabɔ.

6. Ebɛnadze ntsi na gyedzi ho hia dɛm? Ibesi dɛn akyerɛ dɛ ewɔ gyedzi?

⁶ Sɛ yɛpɛ dɛ Jehovah tsie hɛn mpaabɔ a, ɔsɛ dɛ yenya no mu gyedzi. (Mark 11:24) Ɔsomafo Paul kyerɛkyerɛ mu dɛ: “Gyedzi nnyi mu a, obi nntum nnsɔ n’enyi; na nyia ɔba Nyankopɔn nkyɛn no otwar dɛ ɔgye dzi dɛ ɔwɔ hɔ, na ɔyɛ hɔn a wɔhwehwɛ n’ekyir kwan katuafo.” (Hebrewfo 11:6) Naaso, kã a yɛbɛkã kɛkɛ dɛ yɛwɔ gyedzi no ara nndɔɔ sõ. Ɔsɛ dɛ yɛda gyedzi a yɛwɔ no edzi pefee dze nam setsie a yɛbɛyɛ ama Jehovah daa no do.​—Kenkan James 2:26.

7. (a) Sɛ yɛrobɔ Jehovah mpaa a, ebɛnadze ntsi na ɔsɛ dɛ yɛda obu na ahobrɛadze edzi? (b) Yebesi dɛn efi hɛn akoma mu abɔ mpaa?

⁷ Sɛ yɛrobɔ Jehovah mpaa a, ɔsɛ dɛ yɛda obu na ahobrɛadze edzi. Ebɛnadze ntsi a? Sɛ yɛrokɔ ɔhen anaa ɔmampanyin bi enyim a, yɛyɛ dɛm wɔ obu kwan do. Sɛ Jehovah nye adze nyina do Tumfo Nyankopɔn no a, ana ɔnnsɛ dɛ yɛda obu nye ahobrɛadze a ɔsen dɛm koraa edzi ber a yɛrobɔ no mpaa no? (Genesis 17:1; Ndwom 138:6) Bio so, ɔsɛ dɛ yefi hɛn akoma mu bɔ Jehovah mpaa sen dɛ yebetsĩ nsɛm kor noara mu mpɛn pii.​—Matthew 6:7, 8.

8. Sɛ yɛbɔ biribi ho mpaa a, ebɛnadze na ɔwɔ dɛ yɛyɛ wɔ ho?

⁸ Ewiei koraa no, sɛ yɛbɔ biribi ho mpaa a, ɔwɔ dɛ yɛyɛ dza yebotum biara dze tu dza yɛrobɔ ho mpaa no ho anamɔn. Dɛ nhwɛdo no, sɛ yɛbɔ mpaa dɛ Jehovah mma hɛn hɛn daadaa ehiadze a, ɔnnsɛ dɛ yɛyɛ akwadwefo na yɛhwɛ kwan dɛ, sɛ yɛannyɛ edwuma mpo a, Jehovah dze dza yehia biara bɛma hɛn. Ɔsɛ dɛ yɛyer hɛnho na yɛyɛ edwuma biara a ɔfata a hɛn nsa bɛkã a yebotum ayɛ no. (Matthew 6:11; 2 Thessalonicafo 3:10) Anaa sɛ yɛbɔ Jehovah  mpaa dɛ ɔmboa hɛn ma yengyaa ndzeyɛbɔn bi yɛ a, ɔsɛ dɛ yekwetsi tsebea biara a obotum dze hɛn akɔ dɛm nsɔhwɛ no mu no. (Colossaefo 3:5) Ma yensusu nsɛm a wɔtaa bisa wɔ mpaabɔ ho no bi ho nhwɛ.

9. Woana na ɔsɛ dɛ yɛbɔ no mpaa? Ebɛnadze na John 14:6 kyerɛkyerɛ hɛn fa mpaabɔ ho?

⁹ Woana na ɔsɛ dɛ yɛbɔ no mpaa? Jesus kyerɛkyerɛɛ n’ekyidzifo dɛ, wɔmbɔ ‘hɛn Egya a ɔwɔ sor’ no mpaa. (Matthew 6:9) Ɔsaan so kãa dɛ: “Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do.” (John 14:6) Ntsi, Jehovah nkotsee na otwar dɛ yɛbɔ no mpaa. Ɔsɛ dɛ yɛfa Jesus do yɛ dɛm. Jesus a yɛbɛfa no do abɔ mpaa no kyerɛ dɛn? Sɛ Jehovah betsie hɛn mpaabɔ a, ɔsɛ dɛ yɛkyerɛ obu ma dwumadzi soronko a Jehovah dze maa Jesus no. Dɛ mbrɛ yeehu no, Jesus baa asaase do dɛ ɔrebɛgye hɛn efi bɔn nye owu mu. (John 3:16; Romefo 5:12) Bio so, Jehovah ayɛ Jesus Sɔfopanyin nye Ɔtsɛmbuafo.​—John 5:22; Hebrewfo 6:20.

10. Ana ɔwɔ dɛ yɛfa ɔkwan pɔtsee bi do bɔ mpaa? Kyerɛkyerɛ mu.

¹⁰ Ana ɔwɔ dɛ yɛfa ɔkwan pɔtsee bi do bɔ mpaa? Oho, Jehovah nnkãa dɛ sɛ yɛrobɔ mpaa a, yembu ntwɛr, yɛntsena ase anaa yengyina hɔ. Bible no kyerɛkyerɛ dɛ, yebotum afa ɔkwan biara a ɔkyerɛ obu do abɔ Jehovah mpaa. (1 Mbermunsɛm 17:16; Nehemiah 8:6; Daniel 6:10; Mark 11:25) Dza ohia Jehovah papaapa nye akoma a ɔfata a yɛdze bɔ no mpaa na nnyɛ ɔkwan pɔtsee bi a yɛfa do no. Ɔmmfa ho beebiara a yɛwɔ, dɛ ɔyɛ adzekyee anaa adzesaa no, yebotum ebue hɛn ano abɔ mpaa anaa yaayɛ dɛm wɔ hɛn tsir mu. Sɛ yɛbɔ Jehovah mpaa a, yebotum enya ahotodo dɛ, sɛ obiara anntse mpo a, Jehovah bɛtse.​—Nehemiah 2:1-6.

11. Ndzɛmba a yebotum abɔ Jehovah mpaa wɔ ho no bi nye dɛn?

 ¹¹ Ebɛnadze na yebotum abɔ ho mpaa? Yebotum abɔ biribiara a ɔnye Jehovah ne pɛ hyia ho mpaa. Bible no kã dɛ: “Sɛ yɛserɛ biribiara dɛ mbrɛ ɔpɛ a, otsie hɛn.” (1 John 5:14) Ana yebotum abɔ hɛn ehiadze ahorow ho mpaa? Nyew. Mpaa a yɛbɔ Jehovah no tse dɛ yɛnye hɛn nyɛnko pa bi rekasa. Yebotum akã biribiara a ɔwɔ hɛn adwen nye hɛn akoma mu ho asɛm akyerɛ Jehovah. (Ndwom 62:8) Yebotum abɔ mpaa dɛ, ɔmma hɛn no sunsum krɔnkrɔn no a tum wɔ mu no ma ɔmboa hɛn ma yɛnyɛ dza ɔtsen. (Luke 11:13) Bio so, yebotum aserɛ Jehovah dɛ ɔmma hɛn nyansa a yɛdze besisi gyinae papa. Nkyii so, yebotum aserɛ ahoɔdzen a yɛdze begyina nsɛndzendzen ano. (James 1:5) Ɔsɛ dɛ yɛserɛ Jehovah hɔ bɔnfakyɛ. (Ephesusfo 1:3, 7) Afei so, ɔsɛ dɛ yɛbɔ mpaa ma afofor, a hɛn ebusuafo nye hɛn enuanom a wɔwɔ asafo no mu so kã ho.​—Ndwuma 12:5; Colossaefo 4:12.

12. Ebɛnadze na ɔsɛ dɛ ohia hɛn tsitsir wɔ hɛn mpaabɔ mu?

¹² Ebɛnadze na ɔsɛ dɛ ohia hɛn tsitsir wɔ hɛn mpaabɔ mu? Jehovah nye ne pɛ a yɛbɛyɛ. Ɔsɛ dɛ yefi hɛn akoma mu da no ase wɔ biribiara a ɔayɛ ama hɛn no ho. (1 Mbermunsɛm 29:10-13) Yenyim dɛm asɛm yi osiandɛ ber a nna Jesus wɔ asaase do no, ɔkyerɛɛ n’esuafo no mbrɛ wɔmbɔ mpaa. (Kenkan Matthew 6:9-13.) Odzi kan no, ɔkyerɛɛ hɔn dɛ wɔmbɔ mpaa dɛ Nyankopɔn ne dzin ho ntsew, kyerɛ dɛ, ɔnyɛ krɔnkrɔn. Afei, Jesus kyerɛɛ hɔn dɛ, wɔmbɔ mpaa dɛ Nyankopɔn n’Ahendzi no mbra na wɔnyɛ Jehovah ne pɛ wɔ asaase nyinara do. Ntsi, ɔyɛ ber a yɛabɔ dɛm ndzɛmba etsitsir yi ho mpaa ewie no nna Jesus se, yɛmbɔ hɛn ehiadze ahorow so ho mpaa. Yɛda dza ohia hɛn tsitsir edzi ber a yɛdze Jehovah nye n’apɛdzeyɛ dzi kan wɔ hɛn mpaabɔ mu no.

13. Ɔsɛ dɛ hɛn mpaabɔ yɛ tsentsen kodu hen?

 ¹³ Ɔsɛ dɛ hɛn mpaabɔ yɛ tsentsen kodu hen? Bible no nnkyerɛ. Hɛn mpaabɔ botum ayɛ tsentsen anaa tsiatsia; tsebea a yɛwɔ mu no na ɔbɛkyerɛ. Dɛ nhwɛdo no, sɛ yeribedzidzi a yebotum abɔ mpaa tsiabaa, naaso sɛ yɛreda Jehovah ase anaa yɛrekã hɛn dadwen ho asɛm akyerɛ no a, hɛn mpaabɔ botum ayɛ tsentsen. (1 Samuel 1:12, 15) Ɔnnsɛ dɛ yepetuw bɔ mpaa atsentsen dze pɛ nyimpa  enyim adom dɛ mbrɛ nyimpa binom yɛe wɔ Jesus n’aber do no. (Luke 20:46, 47) Mpaa a ɔtse dɛm no nnsɔ Jehovah n’enyi. Dza ɔsɔ Jehovah n’enyi nye dɛ, yebefi hɛn akoma mu abɔ mpaa.

14. Mpɛn dodow ahen na ɔsɛ dɛ yɛbɔ mpaa, na ebɛnadze na iyi ma yehu wɔ Jehovah ho?

¹⁴ Mpɛn dodow ahen na ɔsɛ dɛ yɛbɔ mpaa? Jehovah to nsa frɛ hɛn dɛ, yɛmbɔ no mpaa daa. Bible no kã dɛ, ‘yɛnsɔr daa’, ‘yɛnda ho nkura asɔryɛ mu’ na ‘yemfua asɔryɛ mu’ so. (Matthew 26:41; Romefo 12:12; 1 Thessalonicafo 5:17) Jehovah ayɛ krado ber nyina dɛ obetsie hɛn. Yebotum ada no ase da biara wɔ no dɔ nye n’ayamuyie ho. Bio so, yebotum aserɛ no hɔ akwankyerɛ, ahoɔdzen nye awerɛkyekyer. Sɛ yebu hokwan a yɛwɔ dɛ yɛbɔ  Jehovah mpaa no dɛ ɔsom bo ankasa a, yɛdze hokwan biara a yebenya no bɔbɔ no mpaa.

15. Ebɛnadze ntsi na ɔsɛ dɛ yɛkã “amen” wɔ mpaabɔ ewiei?

¹⁵ Ebɛnadze ntsi na ɔsɛ dɛ yɛkã “amen” wɔ mpaabɔ ewiei? “Amen” yɛ kasafua a ɔkyerɛ dɛ, “ɔmbra mu” anaa “ɔnyɛ hɔ.” Ɔyɛ kwan a yɛfa do kyerɛ dɛ yɛgye dza yɛakã wɔ hɛn mpaabɔ mu no to mu, kyerɛ dɛ, ofi hɛn akoma mu. (Ndwom 41:13) Bio so, Bible no kyerɛkyerɛ dɛ, wɔ bagua mu mpaabɔ ewiei no, ɔyɛ papa dɛ yebobue hɛn ano na yaagye do “amen” anaa yɛbɛyɛ dɛm wɔ hɛn tsir mu dze akyerɛ dɛ yɛgye dza wɔakã no to mu.​—1 Mbermunsɛm 16:36; 1 Corinthfo 14:16.

16. Ana Jehovah tsie hɛn mpaabɔ ankasa? Kyerɛkyerɛ mu.

¹⁶ Ana Jehovah tsie hɛn mpaabɔ ankasa? Nyew, otsie. Bible no kã no ho asɛm dɛ, “Ɔwo itsie mpaayi.” (Ndwom 65:2) Jehovah tsie na obua mpaa a nyimpa ɔpepem pii fi hɔn akoma mu bɔ no na ɔyɛ dɛm wɔ akwan ahorow pii do.

17. Ebɛn kwan do na Jehovah nam n’abɔfoe nye no nkowaa a wɔwɔ asaase do bua hɛn mpaabɔ?

¹⁷ Jehovah nam n’abɔfoe nye no nkowaa a wɔwɔ asaase do bua hɛn mpaabɔ. (Hebrewfo 1:13, 14) Nhwɛdo pii na ɔwɔ hɔ a ɔkyerɛ dɛ nyimpa binom bɔɔ mpaa hwehwɛɛ mboa a ɔbɛma wɔatse Bible no ase na ɔno ekyir ber tsiabaa bi no, Jehovah Adasefo kɔr hɔn nkyɛn. Bible no ma yehu dɛ, abɔfo no kã ho bi na wɔrekã “asɛmpa” no wɔ asaase nyinara do. (Kenkan Nyikyerɛ 14:6.) Bio so, hɛn mu pii abɔ Jehovah mpaa wɔ haw pɔtsee anaa ehiadze bi ho ma ɔno ekyir no, hɛn nsa akã mboa a yehia no efi hɛn nua Christiannyi bi hɔ pɛn.​—Mbɛbusɛm 12:25; James 2:16.

18. Ebɛn kwan do na Jehovah nam no sunsum krɔnkrɔn nye Bible no do bua hɛn mpaabɔ?

 ¹⁸ Jehovah nam no sunsum krɔnkrɔn no do bua hɛn mpaabɔ. Sɛ yɛbɔ mpaa dze serɛ mboa a yɛdze begyina ɔhaw bi ano a, obotum ama hɛn akwankyerɛ nye ahoɔdzen dze nam no sunsum krɔnkrɔn no do. (2 Corinthfo 4:7) Bio so, Jehovah nam Bible no do bua hɛn mpaabɔ na ɔboa hɛn ma yesisi gyinae ahorow a nyansa wɔ mu. Sɛ yɛkenkan Bible no a, yebenya kyerɛwnsɛm a obotum aboa hɛn. Afei so, Jehovah botum ekenyan hɛn nua bi ma ɔaama mbuae bi wɔ Christianfo nhyiamu ase a obotum edzi hɛn ehiadze bi ho dwuma, anaa asafo mu panyin bi nye hɛn bosusu Bible no mu asɛm bi ho a obotum aboa hɛn.​—Galatiafo 6:1.

19. Ebɛnadze ntsi na ibia yebosusu dɛ, Jehovah nnyɛɛ hɛn ebisadze ho hwee?

¹⁹ Ɔtɔfabi a, ibia yebebisa hɛnho dɛ, ‘Ebɛnadze ntsi na dadaada yi Jehovah nnyɛɛ m’ebisadze ho hwee yi?’ Ma ɔntsena w’adwen mu dɛ, onyim ber no nye mbrɛ obesi ebua hɛn mpaabɔ. Onyim dza yehia. Ibia no ho behia dɛ yɛkɔ do bɔ mpaa ber tsentsen bi dze kyerɛ dɛ, yɛwɔ no mu gyedzi ankasa na hɛn enyi aber wɔ dza yɛrobɔ no mpaa wɔ ho no so. (Luke 11:5-10) Ɔtɔfabi a, Jehovah bua hɛn mpaabɔ wɔ ɔkwan bi do a yɛnnhwɛ kwan. Dɛ nhwɛdo no, ibia yɛbɔbɔ tsebea bi a no mu yɛ dzen a yɛwɔ mu ho mpaa, naaso dɛ nkyɛ obeyi hɛn efi ɔhaw no mu no, ɔbɛma hɛn ahoɔdzen a yebotum dze egyina ano mbom.​—Kenkan Philippifo 4:13.

20. Ebɛnadze ntsi na ɔsɛ dɛ yɛbɔ Jehovah mpaa daa?

²⁰ Hwɛ hokwan a ɔyɛ nwanwa a yeenya dɛ yɛbɔ Jehovah mpaa! Yebotum enya awerɛhyɛmu dɛ obetsie hɛn. (Ndwom 145:18) Mpɛn dodow a yefi hɛn akoma mu bɔ Jehovah mpaa no, mpɛn dodow no ara na yɛnye no ntamu anyɛnkofa no mu bɔkɔ do ayɛ dzen.