Enuanom Adɔfo:

Osiandɛ yɛdɔ Nyankopɔn na hɛn nyɛnko nyimpa ntsi, ‘yɛkɔ kɛyɛ amanaman nyina esuafo, na yenuma hɔn.’ (Matt. 28:​19, 20; Mark 12:​28-31) Ɔdɔ mapa wɔ tum paa. Sɛ yɛda bi edzi a, obotum aka “hɔn a wɔwɔ akoma pa a obotum ama woeenya daa nkwa” no hɔn akoma ma wɔaabɛyɛ esuafo.—Andw. 13:​48, NWT.

Nkan no, sɛ yɛrokɔ asɛnka a, nna dza ohia hɛn paa nye dɛ yɛbɛkyer dza yɛrekɛka no egu hɛn tsirmu na yɛdze nwoma bi ama. Naaso seseiara dze, yɛpɛ dɛ yɛdze hɛn adwen si mbrɛ yebesi nye nkorɔfo abɔ nkɔmbɔ yie no do. Yɛpɛ dɛ yɛma nkorɔfo hu dɛ yɛdɔ hɔn, ntsi ndzɛmba a hɔn enyi gye ho no na yɛpɛ dɛ yɛka ho asɛm. Iyi ntsi, ɔsɛ dɛ yɛdze hɛn enyi to famu na yehu mbrɛ obiara tse nye dza ɔpɛ, na yegyina ɔno do nye no bɔ nkɔmbɔ. Nwomaba yi besi dɛn aboa hɛn ma yeetum ayɛ dɛm?

Adzesua 12 na ɔwɔ nwomaba yi mu, na no mu biara kyerɛ suban bi a yehia ama yeetum adɔ nkorɔfo na yɛama wɔabɛyɛ esuafo. Adzesua asɛm biara gyina suban pɔtsee bi a Bible no ka dɛ Jesus anaa tsetse Christianfo no mu bi daa no edzi wɔ asɛnka mu no do. Wɔannyɛ nwomaba yi dɛ yɛmfa nkyer nsɛm a yɛbɔkɔ akɛka wɔ asɛnka mu no ngu hɛn tsirmu. Mbom nwomaba yi bɔboa hɛn ma yeehu mbrɛ yebesi akyerɛ dɛ yɛdɔ nkorɔfo. Ɔwɔ mu dɛ yebehia suban ahorow a nwomaba yi ka ho asɛm no nyina wɔ hɛn asɛnka edwuma no mu dze, naaso bi wɔ hɔ a, ber a yɛpɛ dɛ yɛhyɛ nkɔmbɔ ase no na yebehia no kɛse. Bi so wɔ hɔ a, yebehia aber a yɛreyɛ sankɔhwɛ anaa Bible adzesua no.

Suban biara a nwomaba yi bɛka ho asɛm no, tɔ wo bo ara dwendwen ho, na hwɛ mbrɛ ibesi ada no edzi aber a iridzi nkorɔfo dase wɔ beebi a etse no. Akwan a yɛfa do dzi nkorɔfo dase no, sɛ yenyim no yie a, oye paa. Naaso, ɔdɔ a ewɔ ma Jehovah nye wo nyɛnko nyimpa no na ɔbɛma nkorɔfo abɛyɛ esuafo. Ntsi bɔ mbɔdzen na ma dɛm ɔdɔ no nyɛ kɛse.

Hɛn enyi sɔ hokwan kɛse a yenya dɛ yɛnye hom abɔ mu reyɛ edwuma no. (Zeph. 3:9) Yɛserɛ Jehovah ne nhyira kɛse ma hom dɛ ɔmboa hom ma hom nkɔ do ndɔ nkorɔfo ma wɔmbɛyɛ esuafo!