Jehovah pɛ dɛ ihu no yie. Ebɛnadze ntsi a? Osiandɛ onyim dɛ dodow a ihu no su ahorow, n’akwan, nye ne tsirmpɔw no, dodow no ara na ibenya ɔpɛ dɛ ebɛfa no nyɛnko. Aso ibotum abɛyɛ Nyankopɔn ne nyɛnko ma aayɛ yie? (Kenkan Ndwom 25:14.) Ebɛnadze na ɔwɔ dɛ eyɛ na ama aabɛyɛ ne nyɛnko? Bible no yi dɛm nsɛmbisa yi ano na ɔma yehu siantsir a Jehovah a ebɛfa no nyɛnko no yɛ anyɛnkofa a ɔkyɛn biara a ibotum enya.

1. Ebɛn nsato na Jehovah dze rema wo?

“Hom ntwe mpin Nyankopɔn, na ɔbɔtwe epin hom.” (James 4:8) Dɛm asɛm yi kyerɛ dɛn? Jehovah roto nsa afrɛ wo dɛ bɛyɛ ne nyɛnko. Nyimpa binom tse nka dɛ ɔbɛyɛ dzen dɛ wobotum afa Nyankopɔn nyɛnko, osiandɛ wonntum mmfa hɔn enyiwa nnhu no. Naaso, Jehovah ada biribiara a ɔwɔ dɛ yehu fa noho no edzi wɔ n’Asɛm Bible no mu, mbrɛ ɔbɛyɛ a yebotum atwe abɛn no. Sɛ yɛkenkan nsɛm a Nyankopɔn aka akyerɛ hɛn wɔ Bible no mu no a, anyɛnkofa a yɛnye Jehovah wɔ no mu bɛyɛ dzen ɔmmfa ho mpo dɛ yɛmmfaa hɛn enyiwa nnhun no da no.

2. Ebɛnadze ntsi na Jehovah yɛ Nyɛnko a ɔkyɛn biara a ibotum enya?

Jehovah dɔ wo kyɛn obiara. Ɔpɛ dɛ w’enyi gye, na aber biara a ibehia no mboa no, ɔpɛ dɛ ibisa no. Ibotum ‘atow wo dadwen nyina akyen no do, osiandɛ ɔdwen woho.’ (1 Peter 5:7) Jehovah ayɛ krado aber biara dɛ ɔbɔboa n’anyɛnkofo, ɔbɛkyekye hɔn werɛ, na oeetsie hɔn.​—Kenkan Ndwom 94:18, 19.

3. Ebɛnadze na Jehovah pɛ dɛ n’anyɛnkofo yɛ?

Jehovah dɔ nyimpa nyina, naaso ‘atseneneefo mbom na ɔnye hɔn dzi etsirmsɛm.’ (Mbɛbusɛm 3:​32) Jehovah hwɛ kwan dɛ hɔn a wɔyɛ n’anyɛnkofo no bɛyɛ ndzɛmba a obu no dɛ ɔyɛ papa no, na wokwetsir ndzɛmba a obu no dɛ ɔyɛ bɔn no. Bi a, binom bɛtse nka dɛ dza Jehovah bu no dɛ ɔyɛ papa anaa bɔn no, worunntum mmfa mmbɔ hɔn bra da. Naaso, Jehovah wɔ ntseasee. Ɔgye obiara a ɔdɔ no na ɔbɔ mbɔdzen dɛ ɔbɛyɛ dza obotum biara dze asom no no to mu.​—Ndwom 147:11; Asomafo Ndwuma 10:34, 35.

 PƐNSAPƐNSA MU KƆ EKYIR

4. Nna Abraham yɛ Jehovah ne nyɛnko

Bible mu asɛm a ɔfa Abraham (nna wɔsan so frɛ no Abram) ho no boa hɛn ma yehu dza Jehovah a yɛbɛfa no nyɛnko no kyerɛ. Ma yɛnkenkan Abraham ho asɛm wɔ Genesis 12:​1-4. Afei, ma yensusu nsɛmbisa yi ho:

• Ebɛnadze na Jehovah kaa kyerɛɛ Abraham dɛ ɔnyɛ?

• Ebɛnadze na Jehovah dze bɔɔ no anohoba?

• Abraham yɛɛ n’adze dɛn wɔ akwankyerɛ ahorow a Jehovah dze maa no no ho?

5. Dza Jehovah hwehwɛ fi n’anyɛnkofo hɔ

Mpɛn pii no, yɛhwɛ kwan dɛ hɛn anyɛnkofo bɛyɛ ndzɛmba ahorow bi ama hɛn.

• Ebɛn ndzɛmba dɛm na ebɛpɛ dɛ w’anyɛnkofo yɛ ma wo?

Ma yɛnkenkan 1 John 5:3, na yensusu dɛm asɛmbisa yi ho:

• Ebɛnadze na Jehovah hwehwɛ dɛ n’anyɛnkofo yɛ ma no?

Sɛ yebotum ayɛ setsie ama Jehovah a, bi a no ho behia dɛ yɛsesa hɛn suban nye hɛn ndzeyɛɛ bi. Ma yɛnkenkan Isaiah 48:17, 18, na yensusu asɛmbisa yi ho:

• Ebɛnadze ntsi na Jehovah pɛ dɛ n’anyɛnkofo yɛ nsakyer?

 6. Dza Jehovah yɛ ma n’anyɛnkofo

 DZA ESUA

Jehovah pɛ dɛ ɔyɛ wo Nyɛnko, na ɔbɔboa wo ma aatwe abɛn no.

Mbobɔdo

• Jehovah si dɛn boa n’anyɛnkofo?

• Ebɛnadze ntsi na Jehovah ka kyerɛ n’anyɛnkofo dɛ wɔnyɛ nsesa ahorow?

• Isusu dɛ dza Jehovah hwehwɛ fi n’anyɛnkofo hɔ no bor hɔn ahoɔdzen do anaa? Ebɛnadze ntsi na ereka dɛm?